المحتويات
استيكر مختلف الأشكال والألوان والأحجام بيعتبر عنصر جذب لأشخاص كتير بمختلف مراحلهم العمرية، ولكنه جذْاب أكتر للأطفال بسبب شكله ولونه وملمسه المميز وبيتباع بأسعار متفاوتة سواء في المكتبات أو في بعض المحلات أونلاين، بس أحيانًا مش بتتوفر الأشكال اللي عايز تعملها وبالتالي مهم تعرف الطريقة اللي تساعدك في صناعته في البيت وفي نفس الوقت طريقة إزالة بقاياه لو تضرر بسبب المياه أو حاولت تغيّر مكانه.
طريقة صناعة استيكر في البيت
- هات مقص عشان تفرّغ الرسمة أو التصميم اللي عايز تحوله لستيكر
- خليك دقيق قدر المستطاع عشان توصل لأحسن نتيجة
- اعمل صمغ في بيتك بمكونات طبيعية
مكونات الصمغ
- كيس جيلاتين
- 4 معالق مياه دافية
- معلقة سكر صغيرة
- 10 نقط من مستخلص النعناع أو الفانيليا
طريقة تحضير الصمغ
- حط المكونات على بعض في طبق محكم الغلق ودخّله التلاجة لمدة يوم
- عشان ترجعه سايل تاني حط الطبق في وعاء فيه مياه دافية
استخدام الصمغ في صناعة الاستيكر
- حط الرسومات اللي عايز تحولها لستيكر على ورق مشمع أو ألومنيوم
- حط صمغ بكمية بسيطة على ضهر كل رسمة باستخدام فرشة رسم
- وبعد ما تجف تمامًا خزّنها في صندوق أو كيس بلاستيك لحد ما تستخدمها
- خلي معاك بخاخ مياه وقت الاستخدام عشان تبلل ضهر الستيكر قبل ما تلزقه
- ممكن تستخدم صورة من مجلة أو كتاب وتغطيها بشريط لاصق عريض
- لازم تختار صورة مناسبة لحجم الشريط اللاصق أو تستخدم طبقتين منه عشان يغطوا كل جوانبه
- هات قطعة معدنية ومررها على الشريط اللاصق والصورة عشان تتأكد من عدم وجود فراغ هواء
- وحط الصورة تحت مياه دافيه ووجّه الجانب الورقي ناحية المياه و مع الوقت هتلاقي الورقة بتقع والحبر والرسمة هيفضلوا ثابتين
- اترك الصورة المغطاة باللاصق لحد ما تجف تمامًا.. ساعتها تقدر تلزقها فوق أي سطح
إزالة بقايا الاستيكر
- حاول تشيلها بإيدك بفركها بقطعة قماش في كل الاتجاهات وادعكها بالمناديل المبللة أطول مدة ممكنة
- حط خل عليها وبعد فترة نضفها كويس بالمياه وافركها بآلة حادة
- لو السطح مش هيتعرض لشرخ أو كسر ممكن تعرضه لبخار المياه المغلية
- استخدم المنظفات اللي بتحتوي على مواد حمضية وغنية بالليمونين اللي بيتخلص من المواد اللاصقة بسهولة
- أو ممكن تستبدلها بقشر ليمونة أو برتقالة
- الزيوت هتساعدك تتخلص منها بسهولة خصوصًا زيت الزيتون وزيت الكانولا
- سيب الزيت دقايق عليها وافركها بقطعة قماش أو سكينة بلاستيك
- كررها أكتر من مرة ولو لقيت الموضوع صعب استخدم المياه والصابون سواء صابون غسل الصحون أو منظفات النوافذ الزجاجية
- الزيوت العطرية مفيدة في إزالة بقايا اللواصق خصوصًا من السيراميك أو الخشب زي زيت الخزامي وشجرة الشاي
- بس الأحسن تجربه على جزء غير ظاهر من السطح عشان ممكن يسبب بقع
