المحتويات
حل مسائل رياضيات موضوع مش صعب خصوصًا مع ظهور تطبيقات جديدة لحلّها في أسرع وقت، ولكن تمرين المخ على حلها بيزوّد نشاطه وبيربط بين خلايا المخ العصبية، والدراسات بتأكد إن القدرة على حل المسائل بسرعة وبدقة دليل على اكتساب نوع معيّن من الذكاء اسمه (الذكاء الرياضي)، وبالتالي عجز شخص عن حل مسألة الرياضيات بدقة مش معناه ضعف مستوى ذكائه لكن ممكن نقطة تميّزه تبقى في مجال تاني غير الرياضيات اللي ليها دور كبير في حياتنا.
تأثير الرياضيات على حياتنا
- بتتفاوت مشاعر الطلاب تجاه الرياضيات سواء حب ليها أو خوف ونفور وبتتكون علاقة سواء متينة أو ضعيفة بينهم وبين الأرقام رغم إن تأثيرها على حياتنا كبير خصوصًا وقت تعلمها في فترة الطفولة والمراهقة
- دراسة في جامعة ويسترن أونتاريو الكندية بتقول إنها بتفيد المخ لأن حل الرياضيات بينشط مناطق زي ثنائي الفص الجداري، والجبهية الظهرية، والصدغية السفلية
- بتحسن مهارات التفكير المنطقي وحل المشكلات
- الرياضيات بتعلمنا دروس في حياتنا بتعتبر مفاتيح الوصول لأهدافنا وتحقيق النجاح زي إن الحل الخاطيء لأي مشكلة رياضية بيخلينا نحلها من أول وجديد وبنتعلم منها الاعتراف بالخطأ وسرعة تداركه
- بدايتنا من جديد هترتبط بإدراكنا للخطأ وبالتالي هيزيد تركيزنا لعدم تكراره
- كل مصطلح رياضي له تعريف محدد ودقيق وكل كلمة بتعبر عن شيء والمعادلات الرياضية ثابتة وبتعبر عن حالة معينة ولازم تطبق عليها عشان توصل لنتيجة صحيحة
- بنتعلم منها استخدام المصطلحات المناسبة والدقيقة لكل حاجة بنشوفها أو بنحسها والوصف الدقيق لموقف أو لحالة شعورية خطوة أساسية في حلها
- التطبيق الدقيق لحل معين سواء من وجهة نظرنا أو وجهة نظر خبير هيوصلنا للنتيجة الصح
- كل خطوة في حل مسألة رياضية مترتبة على اللي بعدها وأي خطأ ولو بسيط بسبب قلة التركيز بيترتب عليه أخطاء أكتر وبالتالي بتعلمنا نركز في حياتنا وفي نتايج كل خطوة
- لو فقدت الأمل في حل المسألة الرياضية غيرك هيحلها وهتحس بالفشل
- بتعلمنا نحاول مهما كانت الظروف صعبة عشان نحقق أهدافنا
- بجانب تأثيرها في بناء شخصياتنا لأن الرياضيات بتأثر في كل حاجة حوالينا
- كل حاجة في حياتنا بتتنظم بكمية محددة باستخدامها زي إدارة الأموال والتعاملات الاقتصادية وقت البيع والشراء والأنشطة اليومية زي إدارة الوقت والطبخ والتنضيف وتزيين المنزل
- وفروع الرياضة زي الهندسة وعلم المثلثات بيستخدم في تحسين مهارات الرياضيين في ألعابه
- بجانب استخداماتها في فروع العلوم المختلفة ودورها الأساسي في أغلب الاختراعات
تنمية مهارات حل مسائل رياضيات
- خصص وقت في يومك لتمرين نفسك عليها وواظب يوميًا
- افتكر إنها زي تمرينات الجسم بس الفرق إنك بتمرن عقلك على حلها بسرعة وبدقة
- مرّن نفسك في البداية على المسائل البسيطة بأرقام محدودة
- بلاش تلجأ لاستخدام الآلة الحاسبة إلا في أضيق الحدود
- دراسات كتير بتأكد إن لعبة زي الشطرنج بتنمي ذكائك الرياضي وقدرتك على الحساب بدقة وحل المسائل الرياضية الصعبة
- حفظ جدول الضرب لحد 15 هيساعدك تحسب أسرع
- دراسات بتأكد إن نطقك للأرقام بصوت عالي بيساعدك تحسب أسرع وأدق
- لما بتقول الرقم وبتسمعه بتنسخ صورة تانية من الرقم في ذاكرتك وبيتعامل مخك على أساسها
- في البداية استخدم الآلة الحاسبة فقط للتأكد من صحة النتيجة اللي بتوصلها أثناء التدريب
- فكر بشكل رياضي في أغلب المواقف زي إنك تحسب سعر منتج قبل وبعد الخصم لو مكتوب بنسبة مئوية
- احسب باقي فلوسك وقت الشراء قبل معرفته من البائع
- ارسم صورة ذهنية للأرقام كأنك بتكتبها بإيدك عشان توصل للنتيجة الصح وممكن تكتب المسائل الحسابية في ورقة كبداية تسّهل عليك
تطبيقات حل مسائل رياضيات
Microsoft Math Solver
- بتحل عليه المسائل الرياضية بكل فروعها عن طريق تصويرها بالموبايل ومسحها بالماسح الضوئي (Scanner)
- متوفر للآيفون والأندرويد
NCalc Scientific Calculator
- بيسمح بكتابة المعادلات والمسائل الرياضية بالطريقة اللي تختارها سواء كسور أو جذور وبيحتفظ بالعمليات الحسابية اللي عملتها عليه
- متوفر للآيفون
PhotoMath
MalMath
- بيساعدك تعرف حل المسألة بتفاصيل الخطوات
- متوفر على الأندرويد
Graphing Calculator
- بيساعدك تكتب المسائل الرياضية بشكلها المكتوب قدامك عشان توصل للنتيجة في أسرع وقت
- متوفر على أندرويد
