المحتويات
تركيز الطفل من الأشياء اللي بتتأثر سلبا بالتعرض المستمر للتلفزيون والموبايل، وضعفه بيأثر على جوانب مختلفة زي صعوبة المذاكرة وإنهاء المهام، هنقولك على أنشطة وأطعمة مختلفة تقدر تقويه بيها.
أنشطة لتقوية تركيز الطفل
لعبة الكوتشينة
- اعمل مجموعتين متماثلتين من أوراق الكوتشينة والمجموعة فيها خمس أرقام وألوان مختلفة
- رتب المجموعة الأولى قدامه وخليه يبص عليهم لمدة 10 ثواني
- وبعدين غطيهم وخليه يعمل نفس الترتيب بورق المجموعة التانية
- خصص وقت 5 ثواني عشان يخلص وكررها لحد ما ينجح فيها
لعبة تقليد الصورة
- هات صورة أو رسمة معينة لشخصية أو كرتون بيحبه بس يكون فيها تفاصيل
- اديله ورقة وقلم وخصص له وقت 30 ثانية عشان يرسم زيها فيها
- كل مرة زود الوقت لحد ما يقدر يرسم أقرب صورة ليها وينقل تفاصيلها
لعبة كيم
- اختار 20 قطعة من أدوات البيت غير متعلقين ببعض زي فرشاة الشعر/ معلقة/ قلم
- رتبهم في صينية وخليه يبص عليهم لمدة 20 ثانية
- غطيها وبعدين ممكن تعمل حاجتين: اسأله عن الحاجات اللي كانت في الصينية وخصص له 10 ثواني
- أو خليه يغمض عينه وشيل قطعة معينة من الصينية وخليه يحاول يفتكر القطعة الناقصة
لعبة السوبر ماركت
- دي محتاجة عدد من الأطفال.. خليهم يقعدوا على ترابيزة وواحد منهم يبدأ يقول (أنا هروح السوبرماركت عشان أشتري…)
- ويختار حاجة يشتريها تبدأ بحرف الألف أو (A) زي الأفوكادو مثلا
- اللي بعده يبدأ جملته بـ(أنا هروح السوبرماركت عشان أشتري أفوكادو وبسكوت) وكل واحد يزود حاجة هيشتريها ويبقى فيها تسلسل أبجدي
لعبة العد العكسي
- اختار رقم عشوائي وخليه يعد بالعكس وينط بالتلت أرقام
- فمثلا اختار 147 وخليه يعد 144.. 141 ويكمل على كده
لعبة عد الكلمات
- دي مناسبة للأطفال من سن 7- 10 سنين
- خليه يعد الكلمات في الفقرة الواحدة وبعد ما يخلص خليه يعيد الموضوع تاني
- لو طلع نفس الرقم يبقى اختار له فقرة أكبر المرة الجاية ولو طلع أرقام مختلفة.. خليه يعيد لحد ما يوصل للرقم الصح
لعبة صيد الكنز
- اختار 5 أدوات من البيت ووزعهم في أماكن مختلفة
- اطلب منه
- يدور عليهم وخصص له وقت لده
لعبة الرز
- اخلط كمية كبيرة من الرز مع كمية صغيرة من العدس
- خليه ينقى العدس في طبق خارجي وخصص له وقت معين لده
لعبة الحكي
- اقرأ له قصة مناسبة لسنه وممتعة ولو سنه ينفع خليه يقراها لوحده
- اعمله امتحان فيها بإنك تطلب منه يحكيها تاني أو تسأله فيها أسئلة محتاجة تركيز
- ممكن تسأله في نص الحكي عن توقعاته للأحداث عشان ده هيعزز تركيزه ويساعد في تطوير خياله
الألعاب المختلفة
زي البازل (باختلاف عدد القطع بناء على السن) واوجد الاختلافات بين الصورتين والمتاهات والألعاب المعتمدة على ترتيب أحداث هتساعده
أطعمة لزيادة تركيز الطفل
في أطعمة مختلفة الانتظام عليها هتساعد الطفل على التركيز، زي:
المكسرات
الأسماك الدهنية
التوت
التفاح
البتنجان
الأفوكادو
البيض
البنجر
البروكلي
الخضار الورقي الأخضر
الشوكولاتة الغامقة
الطماطم
بذر الكتان
المياه
الكركم
الموز
نصائح عامة لتزويد تركيز الطفل
في خطوات عامة الانتظام عليها هتساعدك على زيادة مدة تركيز طفلك بين سن 1-4 سنين لأن التركيز ومدة استمراره بيحتاج تمرين مستمر زي عضلات الجسم زي:
اطلب منه يساعدك في مهام البيت والطبخ وينتج حاجة معينة بنفسه زي الساندويتش
طول مدة قراءة القصص عن طريق إضافة أفكار خاصة بيك واسأله عنها
اطلب منه يعبر عن رأيه في أحداث القصة والصور اللي فيها وممكن يضيف الأفكار أو شخصيات جديدة للقصة لما تخلص
اطلب منه يخلص حاجة أو لعبة معينة أثناء الجلوس في مدة محددة
شاركه ألعاب بسيطة فيها منافسة زي إن كل واحد فيكم يكون قدامه علبة كبيرة ويرتب فيها حاجات معينة والأسرع هيكسب
اهتم إن الوقت اللي تقضيه معاه يكون ليه لوحده بدون استخدام الموبايل
شجعه على الاستمرار في النشاط اللي بيعمله مدة بسيطة كمان فمثلا لو بيلون وخلص.. اطلب منه يلون دقيقة كمان لأن ده هيحمسه يكمل وزود المدة تدريجيا كل مرة
اهتم بالألعاب اللي فيها صور/ حروف/ كلمات وساعده يتعلمها بشكل مرح
علمه يستخدم مهارات الكلام مع النفس أوقات العصبية والتوتر والزعل عن طريق اختيار جملة معينة ويقولها في أربع مراحل:
- الأولى: يقولها بصوت عالي
- التانية: يهمسها
- التالتة: يقولها بتحريك الشفايف بس
- الرابعة: يقولها في باله
اهتم بالتجمعات العائلية والكلام عن مواضيع مختلفة وشجعه يشترك فيها وخليه يختار وياخد قرارات في حاجات بسيطة خاصة بيه زي اختيار الأكل في مطعم
قلل وقت التعرض للتلفزيون وألعاب الفيديو
اربط المهام اللي وراه بعلامات معينة زي تحديد أغنية بيحبها وتشغيلها عشان تطلب منه يرتب سريره
زود ثقته في نفسه واهتم بالألعاب اللي فيها حركة
استخدم الموسيقى الهادية أثناء نومه
