تخزين البطاريات وقت السفر أو الغياب الطويل عن استخدام جهاز معين شيء أساسي، لأن انتهائها في أجهزة التحكم مثلًا بيعطلك عن استخدام أغلب الأجهزة، ده غير إنها العامل الرئيسي لتشغيل أجهزة تانية، وبالتالي لو هتغيب عن بيتك لمدة ولو قصيرة هنقولك الطريقة اللي تخزن بيها البطاريات عشان تحافظ على كفائتها:
- لو جديدة خليها في الغلاف بتاعها لحد ما تستخدمها عشان تحميها من الرطوبة
- لو بتستعملها بقالك فترة الأحسن تبعدها عن حرارة الشمس
- بلاش تسيبها في جهاز لو مش بتستعمله لأن عمرها الافتراضي بيقل
- احتفظ بيها في علبة بلاستيك وبلاش تحطها في علبة معدن أو تحط معاها أي معدن حتى لو عملة
- رصها بطريقة تبعد فيها الأطراف الموجبة عن لمس الأطراف السالبة
- الأحسن تغطي الأطراف بشريط لاصق عشان تمنع تلامسهم وتحافظ على تخزين البطاريات من أنواع مختلفة في أماكن بعيدة عن بعض
- خلي كل مجموعة بطاريات من نوع وشركة واحدة مع بعضهم وبلاش ترصها جنب بعض
- لأنهم ممكن يتفاعلوا ويسببوا مشكلة كبيرة
- اعرف إن البطاريات اللي بتتشحن ليها سعة شحن مثالية لو زادت أو قلت ممكن تأثر عليها وتتلف
- اقرأ التعليمات اللي على كل نوع
- البطاريات زي الليثيوم الأيونية الأفضل تستخدمها وتخزنها مشحونة على 30% لحد 50% لتحقيق أفضل نتيجة
- أما بطاريات النيكل فممكن تستخدمها وتخزنها في أي حالة شحن
