الواقي الذكري: مميزاته وآثاره الجانبية والطريقة الصحيحة لاستخدامه

الواقي الذكري دوره أساسي في تقليل فرص الإصابة بالأمراض المنقولة جنسيًا، والخبراء بيأكدوا إنها من أكتر الوسائل الفعّالة لمنع الحمل، ومن مميزاته سهولة الاستخدام مع عدم وجود آثار جانبية مؤثرة على صحة الرجل أو المرأة طالما الخامة مريحة ومش بتسبب مشاكل للبشرة وبيستخدم مرة واحدة بس.

تعريف الواقي الذكري 

• أنبوب أو غلاف بيضعه الرجل فوق القضيب وقت الانتصاب لتغطيته وتغليفه وبيصنع في أغلب الأحيان من مادة اللاتكس أو والبولي يوريثان
• الخبراء بيأكدوا إن الاستخدام الصحيح للواقي الذكري وقت الممارسة الجنسية بيقلل فرص انتقال الأمراض الجنسية خصوصًا مرض نقص المناعة البشري (الإيدز)
• الواقي الذكري فعال بنسبة 98% لو استخدم بطريقة صحيحة

الأعراض الجانبية لاستخدامه

• الحساسية من اللاتكس أحيانًا اللي بتظهر في شكل طفح جلدي أو سيلان الأنف
• الأنواع غير المضمونة أو العلامات التجارية المشبوهة ممكن تنقل بعض الالتهابات أو ممكن مع الوقت تزود فرص انقطاعه وممكن ينتج عنه تسريب السائل المنوي وحدوث حمل غير مرغوب فيه
• بعض الرجال بيعانوا من قلة الاستمتاع وقت ممارسة العلاقة الجنسية

طريقة اختيار الواقي الذكري

• اعرف إن اختيار الواقي الذكري المناسب ليك هيحتاج منك بعض المحاولات مش هتنجح من أول مرة
• التجربة هتخليك تختار النوع والمقاس المناسبين ليك
• اتأكد من تاريخ الصلاحية قبل استخدامه واختار واقي تاريخ إنتاجه جديد
• اقرأ كويس الملصق قبل شراء الواقي واتأكد إنه مصنوع من اللاتكس أو البولي يوريثان فقط

استخدام الواقي الذكري

• استخرج الواقي من العبوة بحرص وقلل استخدامك لضوافرك أو أسنانك
• اقطعها برفق من الطرف اللي فيه أسنان مش من الطرف المستقيم
• امسك طرفه الرئيسي من فوق وابدأ في وضعه علي القضيب بإيدك الاتنين
• خليك حريص إن الطرف العلوي من القضيب يدخل في طرف الواقي بإحكام
• سيب مساحة متوسطة بين الطرف العلوي للقضيب وبين الواقي عشان تسمح بخروج السائل المنوي
• بعد الانتهاء من الممارسة الجنسية شيله برفق بعيد عن شريكتك وغطيه بمناديل وارميه في القمامة
• بلاش تتخلص منه في المرحاض لأنه ممكن يتسبب في انسداد المواسير
• خليك حريص على ارتدائه قبل الممارسة الجنسية وبلاش تنتظر حتى اقتراب القذف
• افحصه كويس قبل استخدامه عشان تتأكد إن مفيش ثقب أو قطع