المحتويات
النباتات واحدة من أهم طرق تزيين المكان لأنها بتضفي منظر طبيعي وبتساعد على تحسين جودة الهواء من خلال خفض مستوى الملوثات وعكس أصوات الضوضاء الصادرة من الخارج، وده بيساعد على الهدوء والاسترخاء.
فوائد النباتات في البيت
الدراسات أثبتت إن ليها فوائد للصحة العقلية والجسدية، زي:
- بتقلل فرص الإصابة بنوبات الحساسية لأنها بتنقي الهواء وبتحجز الأجزاء الملوثة اللي فيه
- بتساعد على تحسين الحالة المزاجية خاصة الأنواع اللي فيها أكتر من لون وبتقلل معدل التوتر
- في أنواع بتساعد على تحسين نسبة الرطوبة في الهواء من 20-30% زي نبات العنكبوت
- النباتات المنزلية بتساعد في امتصاص المركبات المتطايرة اللي بتخرج من السجاد والمنظفات والطلاء، وده بيقلل فرص الإصابة بالحساسية وضيق التنفس وتهيج العيون
- بعض الأنواع بتساعد على الشعور بالاسترخاء سواء من خلال استنشاق رائحتها أو عن طريق تنقية الهواء
- الدراسات أثبتت إن في أنواع من النباتات زي زهرة الأقحوان بتمتص ثاني أكسيد الكربون وتطلق الأكسجين بكميات كبيرة وبالتالي تحسين جودة النوم
- بتقلل مستوى الضغط العصبي والتوتر لأنها بتأثر إيجابا على مستوى ضربات القلب والكورتيزول (هرمون التوتر)
- دراسة أثبتت إن البيئة الدراسية اللي فيها نباتات ساعدت الطلاب في زيادة تركيزهم وسرعة إنجاز المهام وتقوية ذاكرتهم
- أبحاث أمريكية أثبتت إن الأشخاص اللي خضعوا لعملية جراحية وبيتعافوا في مكان فيه نباتات بيتحملوا الألم بشكل أفضل وبيحتاجوا أدوية أقل
- بعض المعالجين بيستخدموا أنواع مختلفة من النباتات لعلاج مشاكل زي الاكتئاب والتعافي من الصدمات
فوائد النباتات في العمل
- دراسة أثبتت إن النباتات في مكان العمل بتساعد على تقليل التوتر بحوالي 38% وخطر الإصابة بالاكتئاب بحوالي 58% وقللت معدل الغضب والعدوانية بحوالي 44% والشعور بالتعب بحوالي 38%
- وده بسبب إن اللون الأخضر بيساعد على الاسترخاء والهدوء، ده غير إنها بتزود إنتاجية العمل بحوالي 15% وساعدت الموظفين يحصلوا على درجات عالية في اختبارات مختلفة
- دراسة تانية على أكتر من 16 بلد أثبتت إنها بتقلل معدلات التعب والإصابة بنزلات البرد وأيام الأجازة المرضية لأنها بتحسن شعور الشخص تجاه نفسه لأنه بيكون ملتزم للعناية بيها
- البعض الآخر أثبت إن ديكور بيئة العمل المعتمد على الطبيعة بيخلي المكان أكتر جاذبية للموظفين الجدد
- بتنضف الهواء من الملوثات والمواد الكيميائية وبالتالي الموظفين بيتنفسوا بشكل أحسن
- الأحجام الكبيرة منها بتساعد على حجب الأصوات وبالتالي توفير بعض الخصوصية بين المكاتب
- دراسة أمريكية أثبتت إن المكاتب اللي فيها زرع طبيعي بتزيد عندهم نسبة الابتكار بحوالي 15% عن غيرهم لأن النظر على مناظر طبيعية بتدخل العقل في مراحل مختلفة زي الشعور بالاسترخاء والتركيز
نصائح لري النباتات
في خطوات معينة لازم تتبعها لحماية الزرع من الجفاف أو المياه الزايدة، زي:
- لازم وعاء الزرع يكون فيه خروم في قعره
- النباتات في الأوعية الصغيرة بتنشف أسرع من الأوعية الكبيرة
- اسقي الزرع بس لما تكون طبقة الطين اللي فوق جافة
- اتأكد بإيدك لو الطين جاف ولا رطب عشان تحدد لو محتاج مياه ولا لأ
- تجنب ركن الزرع في المياه
المياه
- الوقت الأنسب عشان تسقي الزرع هو الصبح لكن بعيد عن أوقات الشمس الشديدة
- لازم المياه تخرج من الخروم اللي في القعر عشان تعرف إنه أخد مياه كفاية وتحس إن شكل الطين مشبع والمياه وصلت لحد عمق 2 بوصة
- كمية المياه بتختلف باختلاف حجم الزرع.. الأحجام الصغيرة عندها كمية طين أقل وبالتالي بتجف أسرع وهتحتاج مياه بشكل متكرر أكتر
- إتباع معاد معين يوميا لري الزرع غلط
حجم الأصيص
- بيفرق في كمية المياه اللي النبات محتاجها
- لو كبير جدا على النبات.. هياخد كمية مياه أكبر من احتياج النبات وبالتالي تراكمها وده هيسبب تعفن الجذور
- مهم تسقي الزرع على فترات متباعدة لتجنب تراكم المياه وتتأكد إن التربة نشفت لحد القاع
- لو الأصيص صغير على النبات.. هياخد كمية مياه أقل من اللي النبات محتاجها وهيشربها بسرعة
- ده هيسبب ظهور علامات الجفاف وذبول وميلان الساق وانكماش الأوراق فمهم تراقبه عشان تسقيه كل فترة عند الاحتياج
احتياج المياه
- النبات في بداية مرحلة الجفاف يمكن إنقاذه بمجرد ما ترويه تاني بانتظام
- لكن في حالة كمية المياه الكبيرة.. الزرع بيتعفن وصعب جدا إنقاذه
- اغرس شوكة في تربة الزرع عشان تحدد احتياجها للمياه.. لو طلعت ناشفة ونضيفة يبقى محتاج مياه
- لو طلعت عليها طين أو مبلولة.. يبقى مش محتاج مياه
- السماد مهم لزراعة النباتات بأنواعها خاصة اللي المفروض تزهر