الشعر الدهني: طريقة غسله ووصفات للعناية به

الشعر الدهني هو نوع من أنواع الشعر بتعاني منه حوالي واحدة من بين كل 4 سيدات، وبيسبب إفراز روائح وزيوت مختلفة وبيسبب ارتفاع معدل تساقط الشعر مقارنة بغيرهم.

أسباب الشعر الدهني

• طبيعة الشعر، فبعض الأشخاص شعرهم بطبيعته بيفرز كمية كبيرة من الزيوت والدهون
• عدم العناية بالشعر بالطريقة المناسبة من خلال الماسكات أو العناية اليومية
• استخدام مستحضرات عناية بالشعر غير مناسبة أو بكميات كبيرة
• قلة غسل الشعر أو غسله زيادة عن اللزوم

خصائص الشعر الدهني

تقدر تحدد لو شعرك دهني من خلال خصائص معينة زي:

• وجود طبقة دهنية شبه الزيت على فروة الرأس وعلى الشعر عموما
• شكل الشعر بيكون باهت وهامد وبدون حيوية
• سهولة التصاق الأتربة بيه
• شكله دايما مبتل
• معرض للإصابة بالقشرة عن غيره من أنواع الشعر

نصائح العناية بالشعر الدهني

في خطوات معينة متعلقة بغسل الشعر والمنتجات المناسبة ليه هتساعدك تتحكم في فروة الرأس الشعر الدهني، زي:

•  اغسل شعرك من 2-3 مرات في الأسبوع لأن قلة غسله أو غسله بشكل متكرر بيزود إفراز الزيوت فيه
• اخلط الشامبو بالمياه ورجه كويس وبعدين اعمل مساج بيه لفروة الرأس
• اغسل شعرك كويس أثناء عمل مساج لفروة الرأس واستخدم مياه باردة
• استخدم البلسم على خصل الشعر بس على بعد 4 سم من فروة الرأس لتجنب الشعر الدهني أو سقوطه واختار الأنواع الخفيفة 
• ممكن تستخدم البلسم الأول على شعرك وبعدين تغسله بالشامبو لتجنب شكله الدهني
• اعتمد في نظامك الغذائي على الأطعمة الغنية بأوميجا 3 زي الأسماك الدهنية والمكسرات لأنها بتقلل إنتاجها
• تعرض الشعر الدهني للحرارة بيزود دهنية فروة الرأس وضعف الشعر وتلف البصيلات على المدى البعيد
• بعد الاستحمام.. اغسل شعرك بمعلقة كبيرة خل تفاح مع كوب مياه كبير للتخلص من الزيوت فيه
• نضف فرشة الشعر أول بأول لتجنب انتقال البكتيريا المتراكمة عليها لفروة رأسك والإصابة بالالتهابات
• اخلط 3 نقاط زيت الشاي مع زيت حامل زي زيت الزيتون/ الجوجوبا/ اللوز واعمل بيه مساج لشعرك لمدة 7 دقايق واغسله.. كررها مرتين في الأسبوع
• استخدم فرشة الشعر اللي سنونها مناسبة مع كثافة وطول شعرك لأنها لازم توصل لبصيلاته عشان تنشط الدورة الدموية
• لما تسرح شعرك.. ابدأ من نص الشعر وبعدين سرحه من الأعلى للأسفل في حركة منتظمة واقلب شعرك في جميع الاتجاهات
• اعمل سكراب لفروة  راسك كل فترة باستخدام الفرشة المخصصة ليه للتخلص من بقايا الجلد والبكتيريا
• الشامبو المناسب لشعرك لازم يكون في واحد من المكونات دي (benzoyl peroxide)/(selenium sulfide)/(sodium sulfacetamide)
• استخدم جل الصبار أسبوعيا على شعرك للتخلص من الزيوت الزايدة فيه وزيت جوز الهند لترطيبه كويس لأنهم بيساعدوا على التخلص من الزيوت الزايدة في الشعر وبيقلل تراكمها وبيحسن صحة فروة الرأس 
• تجنب لمسه أو لف الخصل واستخدم منتجات شعر مخصصة للشعر الدهني 
• استخدم الشامبو الجاف عند الحاجة لضبط شكل الشعر بدون غسله لأنه بيساعد على تجفيف شكل الشعر بس مهم تستخدمه على فترات متباعدة وتغسله تاني يوم لتجنب تهيج فروة الرأس أو تلف الشعر
• تجنبي لم شعرك للأعلى لأن ده بيسرع توزيع الزيت بين خصله وتعمدي تفرديه أكتر

ماسكات للعناية بالشعر الدهني

ماسك الشاي الأخضر

• نص كوب شاي أخضر
• كوب مياه
• 10 نقاط من زيت عشبة الليمون
• سيب الخليط على شعرك 30 دقيقة وبعدين اغسله بمياه فاترة
• خلي آخر غسلة بمياه باردة

ماسك جل الصبار

• اخلط معلقة كبيرة جل الصبار مع معلقة كبيرة عصير ليمون
• ضيف معلقة كبيرة عسل أبيض
• سيب الخليط على شعرك 20 دقيقة وبعدين اغسله بمياه فاترة وشامبو

 ماسك البيض للشعر الدهني

• اخلط بياض بيضة مع عصير ليمونة
• قلبهم كويس لحد ما الخليط يمتزج كويس
• سيبه على شعرك 30 دقيقة وبعدين اغسله بمياه فاترة وشامبو

 ماسك الروزماري

• اخلط رشة من الروزماري الطازة الناشف مع كوب مياه
• ضيف 7 نقاط من زيت شجرة الشاي و5 نقاط من زيت عشبة الليمون
• حط الخليط في بخاخة وسيبه على شعرك طول الليل واغسله الصبح بمياه فاترة وشامبو

 ماسك خل التفاح

• اخلط معلقتين كبار خل تفاح مع كوب مياه
• ضيف 10 نقاط من زيت اللافندر
• اعمل مساج لشعرك بالخليط وسيبه 15 دقيقة
• اغسله بمياه فاترة

ماسك جل الصبار وزيت بذور العنب

• اخلط معلقتين كبار جل صبار مع معلقة كبيرة زيت بذور العنب
• ضيف معلقة كبيرة عصير ليمون
• اعمل مساج لفروة رأسك بالخليط وسيبها 45 دقيقة وبعدين اغسلها بمياه فاترة وشامبو

 ماسك الزبادي

• اخلط نص علبة زبادي مع معلقتين كبار عصير ليمون
• ضيف معلقة كبيرة بيكنج صودا
• سيب الخليط على شعرك 30 دقيقة وبعدين اغسله بمياه فاترة

 ماسك الفراولة

• اهرس 3 حبات فراولة واخلطهم مع نص علبة زبادي
• سيب الخليط على شعرك 30 دقيقة وبعدين اغسله بمياه فاترة وشامبو

أطعمة يجب تجنبها في حالة الشعر الدهني

بعض العادات الغذائية بتزود وجود الزيوت في فروة الرأس زي:

السكر

• تناوله بكميات كبيرة بيأثر على مستوى الهرمونات في الجسم
• بيزود الالتهاب فيه ومستوى السكر في الدم وزيادة الإفرازات الدهنية في الشعر

الكربوهيدرات المكررة

• من أخطر أنواع الكربوهيدرات وبتسبب زيادة الوزن
• بتساعد على إنتاج الزيوت في فروة الرأس وبالتالي الإصابة بالقشرة

المقليات

بتزود كمية الدهون في الجسم خاصة لو بتعاني من فروة الرأس الدهنية

منتجات الألبان

• فيها كمية كبيرة من الدهون اللي بيحولها الجسم لزيوت
• بتساهم في ظهور قشرة الشعر وحب الشباب

الملح

• الاستهلاك الزايد منه بيسبب تورم فروة الرأس وظهور انتفاخ أسفل العين
• بيسبب حبس المياه في الجسم