المحتويات
الثقة بالنفس هي أساس تحقيق الأهداف، لأنها بتساعد الشخص على تكوين علاقات سوية مع المحيطين، وبتشجعه يبقى شخص إيجابي في دوايره المقربة، وده بينعكس على نفسيته، وقدرته على تحقيق طموحاته سواء الشخصية أو العملية، وبتزوّد فرصه إقدامه على التجارب المختلفة اللي بتنمي شخصيته وبتطورها، وبتساعده يكتسب خبرات جديدة في الحياة.
تعريف الثقة بالنفس
- هي إيمان الإنسان بنفسه، وبقدراته، ونظرته الإيجابية للحياة، وتقديره الواضح لنفسه
- الثقة لازم تكون بناء على علم وقراءة وبحث مستمر، وقابلية للتجريب والتعلم من الأخطاء
- بيقدر يقيّم الشخص نفسه صح بدون مبالغة أو تقليل منها، وبيسعى دايمًا للوصول للأفضل
- الإنسان الواثق بيقدر ياخد قرارات حتى لو بعد وقت بس بتقل فرص ندمه عليه لأنه بيحلل المعطيات اللي حواليه بدقة
- التناقض والتسرع والشك المستمر في الآخرين دليل على ضعف الثقة في النفس وقدراتها
الفرق بين الثقة بالنفس والغرور
الثقة
- الاعتزاز بالنفس والثقة في قدراتها على حل مشكلة معينة أو الوصول لهدف بعينه
- بيتّسم بيها الشخص المتفائل اللي بيتوقع الخير دايمًا ومش بيهتز بسبب أي نقد لاذع
- بيختار الإنسان الواثق الآراء اللي يستفيد منها وبيتجاهل أي رأي هدّام، بيخاف من الفشل وبيسعى لتحقيق أقصى مجهود عشان يبعد عنه
- واثق في قدرته على النجاح، بيعرف نقاط ضعفه بس بيحاول يشتغل عليها عشان يصلحها.
الغرور
- بيعبر عن الإحساس بالكمال وبيزيد لما الشخص بيشوف إنه مش بيغلط، وبيظن إن رأيه الوحيد هو الحقيقة المطلقة
- بيحاول يثبت قدرته على مهارة معينة أو إتقانه لشيء ما حتى لو بعيد عن تخصصه
- بيقارن نفسه بالآخرين مهما كان الفرق كبير بينهم وبيشوف إنه عايز يبقى الأحسن
- عايز يظهر كأنه واثق من نفسه رغم إنه في اللاوعي شايف إنه أقل من المحيطين بيه
- إحساس النقص بيترجمه العقل اللاواعي عند المغرور للتعامل بتكبر مع اللي حواليه وإظهار كأنه أعلى منهم
- عالم النفس الكندي ناثانيال براندن بيلخص مشكلة المغرور في كتابه “المفاتيح الستة للثقة في النفس” إنه مجرد محاولة لإثبات إنه شخص قوي/ ذكي/ مبدع
- ده معناه إنه بيعترف إن ده محل شك وبالتالي بيحاول يثبته في كل لحظة بيحس بيها بالغرور
أسباب قلة الثقة في النفس
- عدم الرضا عن المظهر والشكل الخارجي والوزن
- قضاء أوقات طويلة مع أشخاص سلبيين بينتقدوا اللي قدامهم باستمرار
- الاستخدام المفرط لمواقع التواصل، ومقارنة الشخص نفسه بالآخرين
- صدمات بسبب فشل تجارب حياتية سواء كانت علاقات عاطفية أو حتى العجز عن تحقيق هدف عملي أو في الدراسة
- فرض السيطرة المستمر من الوالدين على الشخص من الطفولة وحتى بعد وصوله لسن النضج
- كثرة لوم الآخرين للشخص على تصرفاته خصوصًا المقربين
- ضعف مهارات التواصل الاجتماعي
- عدم القدرة على تحويل الارتباك والتوتر لطاقة محفّزة للشخص تساعده على النجاح
- انتظار التقدير من الآخرين
- المبالغة في تحليل تصرفات الآخرين والإحساس المستمر باحتقارهم للشخص
طريقة بناء الثقة بالنفس
- افتكر إن الموضوع محتاج جهد منّك ومش هيحصل في يوم وليلة
- اعرف إنك لازم تبقى شخص منظّم وعندك هدف عايز تحققه في حياتك وواثق من تحقيقه
- قضي وقتك مع أشخاص إيجابيين بيدعموك وبيحسسوك بقيمة نفسك
- تقدير الذات خطوة أساسية عشان تعرف تثق في نفسك ومهاراتك وقدراتك
- وهو احترامك وتقديرك لنفسك ومعرفة نقاط قوتك وضعفك وحدود مسؤوليتك عن أفعالك وعدم تحميل نفسك فوق طاقتها
- بيساعدك تقدير ذاتك على نظرة متوازنة للأمور من كل الزوايا عشان تعرف تصدر حكم صحيح سواء لحل مشكلة أو لإتخاذ قرار مصيري
- خليك منفتح وابني علاقات اجتماعية مع المحيطين بيك، بس بلاش تثق فيهم زيادة
- اتعامل معاهم بشكل طبيعي وافترض حسن النية مع الحذر أحيانًا بس بدون مبالغة، أو التفكير المفرط في نواياهم
- اشترك في أنشطة تشغل تفكيرك عن بعض الأفكار السلبية وخليها فرصة تبني فيها علاقات
- حدد مدة زمنية تحقق فيها هدف نفسك تحققه واسعى لتحقيقه خلالها
- خلي عندك قدوة في حياتك وراقب تصرفات الشخص ده عشان تتعلم من نجاحاته وتستفيد من تجاربه الفاشلة
- التفاؤل هيساعدك تجرّب أي حاجة جديدة بدون خوف أو تردد مهما كانت التجربة صعبة عليك
- امسك ورقة وقلم واكتب اللي حصل في يومك وراجع تصرفاتك بدون جلد للذات
- كافيء نفسك لو اتصرفت صح واتعلم من أخطائك
- استكشف مواهبك المدفونة عن طريق تحديد الحاجات اللي بتتبسط وإنت بتعملها
- أو افتكر حياتك زمان وشوف إيه الأنشطة اللي كنت شاطر وناجح فيها وحاول تمارسها تاني
- دراسات بتأكد إن لعب الرياضة بانتظام والالتزام بنظام حياة صحي في الأكل أو ظبط الساعة البيولوجية بيحسن المزاج، وبيزوّد الثقة بالنفس
تطبيقات بتساعد على الثقة بالنفس
Shine: Calm Anxiety & Stress
- بيساعدك تمارس تمرينات التأمل وتصفي ذهنك عشان تشحن طاقتك
- بيشجعك تقوي مهارات التواصل والإبداع وتحقيق السعادة
- بيحتوي على نصايح ومقالات وطرق تقدر تحس بيها بقيمة الأشياء اللي عندك وقيمة نفسك وتزود ثقتك فيها
CBT Thought Diary
- بيساعدك تقوي ثقتك في نفسك من خلال أدوات علم النفس الإيجابي والعلاج السلوكي المعرفي
- بيخليك تسجل أفكارك ومشاعرك وتقيّمها صح عشان توصل لحل
- بيقدملك نصايح تقدر تستفيد منها عشان تحقق الثقة
ThinkUp
- بيشجعك تحقق أهدافك وتحقق الثقة من خلال مدربين وخبراء بيقدموا نصايح وخبرات شخصية تساعدك تطور صورتك الذهنية عن نفسك
- بيساعدك تدرب عقلك على تقليل الأفكار السلبية واستبدالها بأفكار إيجابية
Courageous self-love
- بيبعتلك رسايل شخصية يوميًا باسمك تشجعك على مواجهة أي صعوبات في الحياة وتزود ثقتك في قدراتك
StickK
- بيساعدك تحدد هدفك وبيتابع معاك خطوة بخطوة مدى تحقيقك له وبيحسسك بالإنجاز والثقة مع تقدمك في أي نشاط بتعمله
تجاهل تعليقات الآخرين
- خليك هادي في التعامل معاهم لأن هدفهم الأكبر إحباطك وإضعاف ثقتك في نفسك
- أحسن طريقة هي تجاهلهم وعدم الرد على كلامهم السلبي بالكلام أو حتى بتعبير الوجه
- اطلب منهم عدم التعليق على أي شيء يخصّك لو تمادوا في الكلام
- حط حدود في التعامل وقلل كلامك عن حياتك معاهم قدر المستطاع
- غيّر الموضوع خصوصًا لو طبيعتهم التعليق على تصرفات المحيطين بيهم
- بلاش ترد عليهم بنبرة دفاعية لو أصرّوا يفتحوا الموضوع معاك
- بص في عينهم واهتم بإظهار الثقة في كلامك وفي لغة جسدك
- هينعكس على إحساسك الداخلي وهتحس بموقف القوة مش الضعف
- اختار هدف لنفسك تحققه وابذل كل جهدك وتركيزك فيه
- دراسات بتأكد إن اهتمامك بأكلك الصحي ونومك لعدد ساعات كافية بيقلل تأثيرهم عليك
- تمرينات التنفس دورها أساسي في الحفاظ على سلامك الداخلي وتحسين مزاجك
- قضي وقت أطول مع الأشخاص الإيجابيين اللي بيمنحوك الثقة
- لو مش قادر تتخلص من تأثيرهم عليك لازم تستشير طبيب نفسي
تربية الطفل على الثقة بالنفس
- خليك قدوة واظهر له ثقتك في نفسك وطرق تخطي العقبات بتفاؤل عشان يتعلم منك
- تجنب العصبية في حالة الفشل سواء دراسيا أو الرياضة وعلمه إن دايما في مساحة للأخطاء ولازم يتعلم منها
- ساعده يتعلم ويجرب حاجات جديدة وينجح فيها لأن ده هيزود ثقته وإيمانه بنفسه
- تجنب الحماية الزايدة واديله مساحة للغلط عشان يتعلم إنه مش نهاية العالم ويبذل مجهود أكتر المرة اللي بعدها
- علمه عدم اليأس والإحباط من المرة الأولى وشجعه يجرب تاني بكلامك أو بالمكافآت
- ساعده يلاقي الحاجة اللي بيحبها زي هواية أو رياضة لأن إنجازه فيها هيحفزه يبذل مجهود أكبر
- ساعده يخطط لخطواته بشكل مناسب وواقعي عشان يقدر يحققها
- اثبت له دايما بالكلام والأفعال إنك بتحبه حب غير مشروط واتكلم معاه عنه دايما بإيجابية حتى أوقات الفشل
- ناديه دايما باسمه مصاحب بتعبير وجه ودود وتجنب استخدام الألفاظ أو الأسامي الواصفة
- اعمل له مهام (خاصة) ومناسبة لسنه في البيت يوميا وكلمة (خاصة) هتحسسه بأهميتها وأهمية دوره
- خصص وقت للعب معاه بس خليه يختار اللعبة ويقودها لأن ده هيحسسه إنه مسؤول
- اطلب منه طلبات بسيطة واسأله عن رأيه في موضوعات مناسبة لسنه وحسسه إن رأيه هو الحل الأنسب
- خصص وقت ليه زي اللعب/ الأكل/ الخروج بعيد عن أي نشاطات تانية زي التلفزيون أو الموبايل
- امدحه على مجهوده مش على الإنجاز.. فمثلا لو جاب درجات عالية قول له (أنا مبسوط إنك اجتهدت وركزت)
- تجنب التوقعات العالية أو المنخفضة منه وركز مدحك على قدراته وعائد الإنجاز اللي عمله عليه مش عليك
- فمثلا لو نضف غرفته.. تجنب (أنا مبسوط إنك نضفت غرفتك) وخليها (شايف غرفتك نضيفة ومرتبة إزاي)
- تعمد إنه يسمعك بالصدفة بتتكلم عنه بإيجابية ومدح مع شخص تاني
- تجنب مقارنته بالآخرين أو وصفه بكلمات معينة لما يعمل حاجة غلط
- ساعده يعبر عن مشاعره وياخد قرارات مناسبة لسنه زي لو خارجين.. خليه يختار هو الأكل
- عبر له عن حبك ليه دايما وخصص حائط في البيت تعلق عليها إنجازاته زي الرسومات والشهادات
