خدمات
البورصة المصرية: طريقة تداول الأسهم والاستثمار فيها بمبالغ بسيطة
إزاي تستثمر في البورصة المصرية؟
المحتويات
البورصة المصرية بتعتبر من أقدم بورصات العالم اللي ظهرت بدايتها في الإسكندرية لعقد صفقات القطن وتطورت مع الوقت وتبلورت عشان تبقى من أهم الأسواق المالية اللي بتدعم خطط التنمية الاقتصادية والاجتماعية.
تاريخ البورصة المصرية
- المحاولات الأولى كانت سنة 1861 في الإسكندرية وكانت أقدم بورصات التعامل في القطن
- بعدها بفترة وتحديدًا سنة 1890 كان فيه محاولة أولى وفشلت وحاولوا مرة تانية سنة 1898 لما فكّر بعض السماسرة الكبار في إنشاء بورصة لتداول الأوراق المالية
- فكّروا في التعاقد مع شركة معيّنة تتولى الموضوع ولكنه فشل ولكنهم فضلوا يتعاملوا بقواعد للتداول مش مكتوبة ولكن معتمدة على العادات والتقاليد
- اتأسست البورصة في القاهرة سنة 1904 بعد اتفاق جزء كبير من أصحاب رؤوس الأموال والسماسرة على إنشاء شركة تتولى الموضوع
- تجّار القطن انفصلوا عنهم وأسسوا نقابة لوحدهم وبورصة منفصلة عنهم واصبحت البورصة للمضاربة المالية فقط
- ظهرت نقابة سماسرة الأوراق المالية اللي وضعت القواعد الأولية لتنظيمها وبعدها أصدرت الدولة تشريعات كتير لتنظيم عمل البورصة بداية من سنة 1933
مفهوم البورصة
- هي سوق كبير لبيع وشراء الأوراق المالية سواء في شكل أسهم أو سندات وبيتحدد سعرها حسب الطلب عليها
- الشركات الكبيرة أو المتوسطة وبعض الشركات الناشئة بتطرح أسهمها في البورصة عشان تجمّع راس مال أكبر
- الفايدة بتعود على الجميع سواء الشركة اللي تدفق الاستثمارات فيها بيسمحلها بالتوسّع
- وبالتالي بتزيد الأرباح اللي بيستفيد منها أصحاب الشركات والمستثمرين معاهم في البورصة
السهم
- هو نسبة في رأس مال الشركة ومعناه إنك لما تشتري سهم من شركة معينة يبقى إنت جزء منها (شريك فيها)
- حتى لو نسبتك بسيطة بتكسب أو بتخسر حسب قيمة سهم الشركة يوميًا
السند
- بيعتبر كأنه قرض بتمنحه للشركة وبيبقى جزء من المديونية عليها وبتتحدد مدة معينة بتسترجع أموالك فيها وبتحصل على نسبة من الربح أو فوايد خلال مدة زمنية محددة
- وقت إفلاس الشركة صاحب السند بيبقى له الأولوية في استرداد رأس المال قبل صاحب السهم
- فلوس السند مديونية لازم تتسدد في البداية لكن السهم في قائمة رأس المال ومن الشركاء اللي مديونين لصاحب السند
التداول
- هو عملية بيع وشراء الأموال في البورصة عن طريق وسطاء أو سماسرة أو شركات متخصصة في الوساطة المالية
طريقة الاستثمار في البورصة المصرية
صناديق الاستثمار في البنوك
- بيعتبر وعاء مالي بيديره البنك وتحديدًا عن طريق متخصصين في استثمارات البورصة لتحديد الأسهم والسندات اللي هيشريها البنك عشان يكوّن الصندوق الخاص بيه
- إدارة الصندوق هي اللي بتاخد كل قرارات البيع والشراء لتفادي الخسارة وتحقيق أعلى استفادة أو ربح ممكن
- بتتنوع ملكية الشخص المساهم في الصندوق لأنه بيشتري وثيقة فيها أسهم مختارة بدقة من قبل متخصصين
- التنوع بيسبب فوائد ربحية عالية وبيقلل الخسارة قدر المستطاع
- ليها أنواع كتير تقدر تختار بينها حسب النوع اللي بتفضله أو حاسس إنه هيحقق الفائدة اللي محتاجها
- صندوق الدخل الثابت أو السندات وبيستثمر في ديون الشركات سواء في القطاع العام أو الخاص
- صناديق الأسهم اللي بيرشحها أغلب خبراء الاقتصاد على أنها النوع الأفضل لأنك بتستثمر في رأس مال الشركات نفسها
- الصناديق المتاوزنة بتعمل مزج بين الاستثمار في الأسهم وبين السندات وغالبًا بتضم 60% أسهم و40% سندات
- صناديق السوق المالي اللي بتختار شركات واستثمارات بجودة مرتفعة لضمان الربح وغالبًا بتبقى مدة الاستثمار فيها بسيطة
- بيفضل بعض الناس الاستثمار في دول خارج حدود بلدهم وبالتالي بيستثمروا في صناديق دولية وغالبًا بتضم قطاعات استثمارية مختلفة
- المهم يكون ليك حساب بنكي وتستشير حد متخصص تعرفه عشان تختار الصندوق الأنسب لهدفك
صناديق المؤشرات
- هي صناديق بتقيس أنشط 30 شركة موجودين وبتجمعهم في مؤشر واحد (زي مؤشر EGX30 في مصر)
- شراءك لوثيقة واحدة من المؤشر ده معناه إنك بتستثمر في مجموعة الشركات دي كلها وليك أسهم فيها
- سعر الوثيقة في المؤشر ده بيختلف من وقت للتاني عشان كده مهم تستثمر فيه ولكن على المدى الطويل (مش أقل من سنتين أو تلاتة)
- ليك مطلق الحرية في البيع أو الشراء في أي وقت لكن مهم تحدد الفلوس اللي مش هتحتاجها خلال مدة زمنية قصيرة)
مميزات صناديق المؤشرات
- بتسهّل عليك أصعب قرار وهو اختيار أسهم الشركات اللي هتستثمر فيها
- بتقدر تتتابع المؤشر بشكل يومي ولحظي بدون تشتيت لأن المؤشر كله مجمّعلك الأسهم اللي استثمرتهم في شركات مختلفة
- تقدر تستثمر فيها بمبالغ بسيطة (أحيانًا بتتراوح قيمة الوثيقة بداية من 13 أو 14 جنيه وبالتالي تقدر تجمع قدر كبير من الوثائق)
شركات السمسرة في البورصة المصرية
- بتعتبر وسيط للتداول وبتقدملك نصايح عشان تستثمر في أضمن أسهم موجودة
- من خلال التواصل التليفوني أو عن طريق تطبيق محدد تقدر تاخد قرارات البيع والشراء
- سعر العمولات مش كبير (حوالي 3 في الألف) وممكن يزيد أو يقل بنسب بسيطة
- بتسجل فيها عن طريق الذهاب للفرع وعمل إجراءات أشبه بفتح الحساب وبعدها بيبقى معاك كود
- عمومًا تقدر تتابع أسعار الأسهم سواء من خلال الشركة اللي بتتعامل معاها أو من خلال الموقع الرسمي للبورصة المصرية
