المحتويات
الامطار بتتسبب أحيانًا في كوارث خطيرة في البيوت وأشهرها تعرّض البيت لماس كهربائي بينتج عنه حريق ضخم، أو أحيانًا بتسبب في تلف الممتلكات والأثاث والجدران، عشان كده تطبيق قواعد الأمان أوقات المطر أساسي لتفادي أي خطر سواء في البيت أو ماشي على رجلك في الشارع أو سايق عربيتك على الطريق.
خطوات حماية البيت من الأمطار
- اتأكد إن مواد التنضيف والدهان وكل المواد القابلة للاشتعال مغطاة كويس واحتفظ بيها في مكان جاف بعيد عن الشبابيك والبلكونات والأسطح
- افصل الأجهزة الكهربائية عن الكهرباء وابعد الفيشة عن مصدر الكهرباء
- اتأكد إن بلاعات الحمام وصرف الغسالة شغالين بانتظام
- اقفل الشبابيك كويّس واملا أي ثقوب أو شقوق بأكياس بلاستيك لو مش هتقدر تسدّهم بمعجون قوي والأمطار مستمرة
- اقفل أي فتحة صغيرة في الشباك بشريط لاصق قوي عشان تقلل فرص تراكم المياه داخل البيت
- ركّب مزراب في البلكونة أو السطح لو ساكن في الدور الأخير عشان تقلل فرص تجمّع مياه الأمطار
- افحص فتحات تهوية السخان خصوصًا لو غاز لأنها ممكن تبقى مصدر لنزول الأمطار للحمام أو المطبخ حسب مكان السخان
كيفية منع حدوث حريق في البيت
- بلاش تحط حاجة قابلة للاشتعال أو ستاير جنب البوتجاز أو الفرن
- خليك عارف أماكن القفل العمومي للغاز والكهرباء واستخدمهم في حالة الخطر
- أغلب الحرايق سببها المطبخ .. اتأكد دايما إن البوتجاز مطفي والغاز مش بيسرب وإن أنبوبة الغاز مقفولة بعد ماتخلص عشان ماتسربش
- لو هتولع شموع خليها على حوامل بعيدة عن الأثاث أو المفارش عشان النار ماتمسكش فيهم
- افصل الأجهزة الكهربائية اللي مش بتستخدمها خصوصا الدفايات تحديدًا في وقت الأمطار الشديدة
- بدل الأسلاك القديمة بالجديدة وماتحطش شريط لاصق عليها عشان تتفادى أي ماس كهربائي
- لو مدخن اتأكد من طفي السجارة بعد ما تخلص لأنها ممكن تسبب كوارث وحط طفاية حريق في مكان سهل توصله
- وعي أطفالك بخطورة اللعب في الأجهزة الكهربائية أو دخول المطبخ وبلاش تخزّن أي مادة سريعة الاشتعال في البيت زي الجاز أو السبرتو واعرف إن إنذار الحريق هيساعدك تحل أي مشكلة صغيرة قبل ما تكبر
خطوات المشي بأمان أثناء الامطار
- قلل فرص المشي قدر المستطاع أثناء سقوط الامطار
- البس بالطو تقيل يدفّيك والتزم برفع الشمسية فوقيك عشان تحميك من البلل أثناء سقوط المطر
- ابعد عن كشافات النور أو أي مصدر مكشوف للكهرباء في الشارع
- تجنّب لمس الأجسام المعدنية في الشارع وقلل احتكاك بيها قدر المستطاع أو حتى المرور بجانبها
- امشي على الرصيف وخليك حريص على المشي بقدمك في طريق ممهد وابعد عن الطرق المبللة الطينية
طريقة القيادة بأمان وقت المطر
- ضاعف المسافة بينك وبين العربية اللي قدامك وقلل السرعة
- شغل المساحات على سرعة عالية تضمن رؤية واضحة وبلاش تفرمل فجأة عشان انزلاق الكاوتش
- اتأكد إن معاك الكاوتش الاستبن
- افتح جزء صغير من الشباك عشان تمنع تكثيف بخار المياه جوه العربية
- استخدم أضواء الانتظار عشان تكون ظاهر للحواليك واستخدم الضوء العادي من الفوانيس مش العالي
- اركن في أقصى اليمين وحط المثلث التحذيري لو حصل أي عطل
