إزاي تنمي روح المشاركة والعمل الجماعي عند طفلك؟

المشاركة والعمل الجماعي من المهارات اللي معظم الأطفال بيواجهوا صعوبة في تعلمها، وفي خطوات معينة هتساعدك تعلمها لطفلك بسهولة.

الأنانية قبل المشاركة

• فكرة الامتلاك موجودة بشكل طبيعي عند الطفل وبتزيد مع السنين الأولى من نموه، ولكن بعد السنة التانية وبداية مراحل انفصاله التدريجي عن البيت بيبدأ يتعلم مفهوم الاستقلالية
• بيبدأ يكون مشاعر الارتباط وبتطور من الارتباط بالأشياء للارتباط بالأشخاص التانية حواليه

السن المتوقع لبد المشاركة عند الطفل 

• الأطفال أقل من 6 سنين بيكون عندهم شعور الامتلاك لكل الألعاب والأشخاص اللي حواليهم، وبيهتموا بنفسهم وبألعابهم أكتر من اهتمامهم بمشاعر الآخرين لقلة إدراكهم
• لكن مع التعليم والمثل الأعلى، يقدر يكتسب مهارة المشاركة واللعب الجماعي مع الأطفال التانية مع نموه بيبدأ يفهم قيمتهم مع الوقت
• ممكن يبقى انتقائي في درجة المشاركة والحاجات اللي هيشارك بيها، وبيحدد بشكل ضمني أنواع الشخصيات اللي بيشارك حاجته معاهم
• زي إنه يختار الأطفال الأضعف أو الأهدى أو الغريبة عنه لأن سهل التحكم فيهم

الإجبار على المشاركة

• من أكتر الأخطاء اللي بيقع فيها الآباء هي إجبار الطفل على المشاركة، فممكن تستبدله بتمثيل سلوك إيجابي عشان تسهل على الطفل اكتسابه
• راقب سلوكه عشان تعرف أساس عدم حبه للعمل الجماعي مع الآخرين
• فمثلا لو بيخطف الأشياء من إيد الناس قوله بشكل واضح إن ده سلوك مرفوض وهيخلي الناس تتجنب اللعب معاه

التواصل والمثل الأعلى

• الدراسات أثبتت إن أولاد الآباء اللي بيمارسوا حبهم لطفلهم عن طريق التعلق الشديد بيواجهوا صعوبة في المشاركة والعمل مع الآخرين
• مهم تمارس السلوك اللي عايزه يكتسبه أمامه عشان يحس إنه تصرف طبيعي
• فلما تعمل فشار اسأله لو عايز شوية أو اطلب منه يقعد بينكم أثناء مشاهدة الفيلم واتعمد توسعله مكان

الألعاب

• جمع أفراد العيلة وجهز مجموعة أشياء مختلفة للطفل اللي عايز تعلمه زي الكراكرز والشوكولاتة ولعبة
• اطلب منه يدي واحدة لكل شخص موجود وفهمه إن دي اللعبة
• اتكلم معاه عن أهمية صفات إيجابية كتير منها الاستعانة بالآخرين وإن ده هيزود الاستمتاع بالموضوع
• راقب لو في أي مواقف فيها مشاركة حصلت أمامه أو مع أشخاص يعرفهم وقول جملة تشجيعية زي (الولد ده شاطر وخلي أصحابه يلعبوا معاه بألعابه)
• استغل أي نشاط في البيت واعمل فيه أدوار فمثلا لو بتاكلوا حاجة مع بعض قول (ده دوري فأنا هاكل دلوقتي وانت استنى)
• أو العب معاه بالمكعبات بإنك تبني شكل معين لوحدك وبعدين تقول له (دورك إنت تعمل شكل تاني)

النشاطات الجماعية

اهتم تشجعه يشارك في نشاطات جماعية فيها اعتمادية على مشاركته ومشاركة الآخرين زي الشطرنج والرياضة والرقص

استغل وقت استخدامهم للموبايل أو الكمبيوتر في مشاهدة نماذج إيجابية في أفلام الكرتون مناسبة لسنه زي:

• من 2-4 سنين: Wonder Pets وPaw Patrol وNeverland Pirates
• 5-7 سنين: Mermaid Adventures
• 8-9 سنين: The Descendants وThe Amazing Race
• 10-12 سنة: Xena:Warrior Princess

قراءة القصص والمشاركة

القراءة من أكتر النشاطات اللي بتأثر في الطفل في بداية مراحله العمرية الأولى واختيار كتب بشخصيات إيجابية هتساعده يفهم الموضوع بطريقة مبسطة

دعم حدس الطفل 

• راقب سلوكه أثناء التعامل مع الآخرين عشان تحدد سبب رغته لمشاركته
• فمثلا لو بيرفض يشارك ألعابه مع شخص معين راقب سلوك الطفل ده لأنه ممكن يكون مهمل وطفلك خايف على ألعابه وبالتالي لازم تدعمه
• لو حسيت إنه بيسبب له توتر أو بيسبب دخوله في نوبات غضب وقف الموضوع فترة وبعدين ارجع حاول معاه مرة تانية بطريقة مختلفة