عمرو دياب أو الهضبة زي ما جمهوره بيحب يلقّبه هو المطرب الأنجح والأكثر استمرارية لمدة طويلة في نفس المكانة، سواء بمبيعات حفلاته أو بنسب مشاهدات أغنياته أو حتى أخباره اللي بتتصدر الترند في كل مرة، واللي جزء كبير منها مرتبط بشبابه المتجدد اللي أغلب الناس بتتكلم عنه وبيسألوا دايمًا عن سر عدم ظهور ملامح لتقدم السن، وفي عيد ميلاده النهاردة (11 أكتوبر) هيتم سن الـ 60 وبالتالي هنقولك تعمل إيه عشان تبقى شباب وإنت في سن عمرو دياب.
أداء التمارين الرياضية
- الرياضة من أكتر الحاجات اللي بتساعد على تدفق الدم لكل أعضاء الجسم وبالتالي بتحافظ على زيادة الدورة الدموية للجسم وبالتالي الوقاية من أمراض زي القلب والسكر والضغط اللي بتسرع علامات الشيخوخة
- الدراسات بتأكد إن الرياضة بانتظام بتمنع إفراز هرمون الكورتيزول المسؤول عن التوتر والخبراء بيأكدوا إنه من العوامل الأساسية للإصابة بأمراض الشيخوخة وبيزوّد فرص ظهور التجاعيد في الوجه والجسم وتكتل الدهون على الأعضاء وتحديدًا على البطن
- بتنمي الرياضة العضلات وبتقوّيها وبالتالي بتقلل فرص أي إصابات بالكدمات أو الكسور بجانب إن الإنسان بطبيعي بيفقد من 3% لـ 5% من العضلات وبالتالي بتعوّض الكتلة العضلية المفقودة بحكم بطبيعة السن
- بجانب إنها بتحافظ على التوازن خلال المشي وبتسهّل الحركة بانسيابية وسهولة
- بيظهر لكل المشاهدين وقت الحفلات مدى انسيابية حركة عمرو دياب وسلاسة حركته على المسرح والقدرة على الغناء لفترة طويلة بدون تعب
- وبينشر فيديوهات في بعض الأوقات أثناء ممارسته للرياضة في الجيم وبتظهر مدى لياقته البدنية وقدرته على أداء تمارين شاقة صعبة حتى على بعض الشباب
النظام الغذائي
- بعض التقارير التليفزيونية لمقربين من عمرو دياب بتتكلم عن نظام عمرو دياب الغذائي
- مثلًا عمرو دياب في برنامجه (كل يوم) قال إنه شاف عمرو دياب بياكل سمك مشوي بكميات قليلة بدون أرز أو عيش
- الدراسات بتأكد إن السمك غني بالأوميجا 3 بيحافظ على كميات الكولاجين في الجسم وبتقلل فرص الالتهابات اللي بينتج عنه تصلب الشرايين وضيق الأوعية الدموية
- وعمرو أديب قال كمان إن أكل عمرو دياب في أغلب الوقت خالي من الأرز والعيش وهم من الكربوهيدرات اللي بتتحول لسكر في الجسم وبيأثروا على اللياقة البدنية وبيزوّدوا فرص السمنة المرتبطة بأمراض كتير بتسرّع ظهور علامات الشيخوخة
- أغلب الأمراض بتأثر على هرمونات الجسم وبتسرّع ظهور علامات الشيخوخة عليه ولكن الوقاية منها بتزوّد إفراز الهرمونات بشكل طبيعي وبالتالي بيستمر الجسم في الحفاظ علي صحة أعضائه وبيصلّح أي خلايا أو أنسجة تالفة بسهولة
حب العمل
- العلماء بيأكدوا في أكتر من دراسة إن فيه علاقة قوية بين حب العمل وبين استمرار الحياة بصحة وقلة فرص النوبات القلبية والوفاة وبتقل فرص الوفاة بنسبة 35% لو الشخص بيحب شغله مهما كان بيبذل مجهود فيه
- تحقيق النجاح فيه والوصول لأعلى مكانة فيه بيزوّد إفراز هرمونات السعادة وبيحس الشخص بالنجاح والتحقق وبالتالي بتقوى المناعة وبتقل فرص الإصابة بالأمراض
- حب الشغل والحرص عليه الممزوج بالتوتر البسيط مش بيسبب أعراض صحية خطيرة ولكنه بيحسس الشخص لوجود معنى لحياته وطموح بيكبر مع الوقت
- في لقاءات كتير لعمرو دياب بيتكلم فيها عن مدى حبه لعمله وقضائه لوقت طويل لاختيار أغاني محبوبة تلمس الناس وتعبر عنهم خصوصًا الشباب بجانب حرصه المستمر للاطمئنان على عدد الجمهور قبل الصعود على المسرح قبل إحياء أي حفل حتى بعد مسيرته الطويلة وشعبيته الجارفة
الاندماج مع الشباب
- عمرو دياب مؤمن إن الاندماج مع الشباب وقضاء أطول وقت ممكن معاهم هو اللي هيساعده يفهم طبيعة أفكارهم وميولهم وبالتالي بيقدم منتج فني مناسب ليهم ولذوقهم وفي نفس الوقت يعيش بروح سن أصغر من سنّه
- في برنامج الموهوبون في الأرض اللي بيقدمه بلال فضل حكى قصة مقابلة له مع عمرو دياب سنة 2010 واللي قاله إنه قرر إن أغلب الناس المحيطين بيه لازم يكون متوسط أعمارهم حوالي 21 سنة
- مش بس الموزعين والملحنين ولكن الموظفين في مكتبه ومساعديه في البيت كلهم لازم يكونوا في سن العشرينات بجانب إنه بيقضي أغلب وقت مع أصدقاء من الشباب عشان يندمج معاهم أكتر ويعيش نفس روحهم
- قضائه لوقت طويل مع الشباب ملحوظ في صوره على السوشيال ميديا مع أصدقاء أغلبهم أصغر منه بسنين كتير
- علماء النفس بيأكدوا على مدى تأثير العلاقة القوية مع أشخاص أصغر من الشخص على نفسيته ومهاراته الذهنية
- بتقوي الروابط العصبية في المخ وبيتزوّد حدة الذكاء بجانب قدرته علي فهمهم والتصرف بطريقتهم وتنمية الإحساس الداخلي كأن الشخص واحد منهم وده بينعكس على صحته وأدائه الجسدي والذهني
