أنواع المكرونة والصوصات المختلفة وطريقة استخدامها

المكرونة من أكتر الأطباق المحببة للجميع، وبتتنوع أشكالها لأكتر من 80 نوع، في منها للسلطات واللحوم أو الفراخ، ومنها اللي بتتشرب الصوصات زي البيستو والبينك والوايت صوص أفضل، وهنقولك أشهر الأنواع المتواجدة بالأسواق واستخداماتها.

أنواع المكرونة

البنا – Penne أو القلم

• مناسبة في الأطباق اللي بتدخل الفرن زي البشاميل بجميع أنواعها مع اللحم المفروم أو الفراخ والمشروم والسبانخ وغيرها 
•  وممكن تقدمها مع الصوص الأحمر أو الأبيض

الإسباجيتي

• من الأنواع اللي بتمتص النكهات القوية زي التوم والريحان ومناسبة مع الصوصات الخفيفة كالصلصة والوايت والبينك صوص
• وعادة بيتم تناولها مع اللحمة المفرومة 

المكرونة الريجاتوني

• لها شكل أسطواني مضلع وفارغ من جوه، وفتحتها واسعة بيخليها مناسبة مع الصوصات السميكة مع مكونات تانية زي اللحمة المفرومة
• مثالية للطواجن والصواني اللي بتدخل الفرن

المكرونة الفوسيلي

• لها شكل سوستا مميز وتعتبر مثالية للسلطات الباردة

الفيتوتشيني

• من أطول وأعرض الأنواع وهي أكثر شعبية في المطبخ الروماني
• بيتم تحضيرها بالصوص الأبيض مع الفراخ أو الجمبري والجبن

ماكاروني

• النوع ده معروف تقديمه في أكلة (الماك أند تشيز)
• كمان بتفضل الأمهات تقديمها للأطفال بسبب شكلها الجذاب

المكرونة الصدف

• اسمها بالإيطالي (أوريكيشيتتي) يعني الأذن الصغيرة
• بيتوافر منها أحجام مختلفة في منها الأحجام الكبيرة بيفضل حشوها بأنواع مختلفة زي التونة وخليط الجبن

المكرونة الفارفيلي

• النوع ده ملائم مع الأسماك زي التونة والجمبري، والصوصات الكريمية والسلطات 

الخواتم

• مكرونة حجمها صغيرة من أكتر الأنواع الشعبية والمنتشرة 
• بيتم تقديمها محمرة مع الصلصة الحمراء 

المكرونة المرمرية 

• نفس شكل الخواتم لكن حجمها أصغر، وتتعمل في وصفات الصلصة الحمراء مع اللحمة المفرومة وأطباق الكشري

اللازانيا

• هي شرايح من المكرونة وبتتقدم مع صوص البولونيز باللحم المفروم والطماطم وطبقات صوص البشاميل
• وممكن تستبدل اللحمة مع الفراخ أو السبانخ والمشروم

صوصات المكرونة المختلفة

صوص مارينارا

المكونات

• ربع كوباية زيت
• بصلة صغيرة مفرومة
• 4 فصوص توم مفروم
• كوبايتين عصير طماطم
• رشة رقايق الفلفل الحار
• معلقة صغيرة زعتر
• ملح وفلفل أسود
• عودين ريحان طازة

الطريقة 

• شوح البصل في الزيت لحد ما يبقى طري وضيف التوم وشوحهم لمدة 5 دقايق
• ضيف عصير الطماطم وممكن تقطع حبة طماطم قطع صغيرة
• بعد ما الخليط يسخن.. تبله بالزعتر والفلفل الأحمر والملح والفلفل الأسود 
• اغسل الريحان بلطف وضيف العودين وهدي النار لمدة 10 دقايق

صوص البيستو 

المكونات

• كوبايتين أوراق ريحان طازة 
• نص كوباية زيت زيتون/ عباد شمس
• فصين توم 
• ربع كوباية صنوبر
• ملح وفلفل أسود
• نص كوباية جبنة بارميزان مبشورة 

الطريقة

• في الكبة.. اخلط أوراق الريحان مع الزيت والصنوبر والتوم
• تبل الخليط بالملح والفلفل الأسود وضيف الجبنة البارميزان

صوص البولونيز

المكونات

• نص كيلو لحمة مفرومة
• معلقة كبيرة زيت الزيتون
• بصلة متوسطة مفرومة
• ثمرة جزر مفرومة ناعم
• عود كرفس مفروم
• فصين توم
• نص كوباية خل
• كوباية عصير طماطم
• 3 معالق كبيرة صلصة
• كوباية شوربة
• كوباية لبن حليب
• ملح وفلفل أسود
• ورق لورا 

الطريقة

• شوح البصل في الزيت مع الجزر والكرفس لحد ما كل المكونات تطرى
• ضيف اللحمة المفرومة والتوم وورق اللورا وقلب لحد ما لونها يبقى بني
• ضيف الخل وعصير الطماطم والصلصة والشوربة وقلب كويس
• هدي النار وسيب الخليط ساعة وقلب كل شوية عشان النكهات تتجانس
• اتخلص من ورق اللورا وضيف اللبن وقلب كويس وغطي الخليط لمدة 45 دقيقة
• ضيف ملح وفلفل أسود 

صوص بيستو البروكلي 

المكونات

• راس بروكلي (الزهرة بس)
• كوباية أوراق ريحان طازة
• نص كوباية زيت زيتون/عباد شمس
• فص توم مفروم
• ربع كوباية جبنة بارميزان مبشورة
• ملخ وفلفل أسود
• ربع كوباية لوز 

الطريقة

• في الكبة.. اخلط البروكلي والريحان والزيت
• ضيف الجبنة البارميزان واللوز والثوم والملح لحد ما يبقى خليط متجانس 

صوص الروزيه 

المكونات

• 3 معالق كبار صلصة
•  معلقة كبيرة زيت
• 3 فصوص توم
• نص كوباية جبنة بارميزان مبشورة
• كوباية كريمة طبخ
• ملح وفلفل أسود 

الطريقة

• شوح التوم في الزيت وضيف صلصة الطماطم
• ضيف معلقة كبيرة مياه لتخفيف الصلصة، وبعد كده ضيف الجبنة البارميزان والكريمة وقلب كويس
• بعد ما الصوص يغلي.. تبله بالملح والفلفل الأسود

صوص الأعشاب والزيتون الأخضر

المكونات

• نص كوباية زيت زيتون
• 8 فصوص توم مفروم
• كوباية بقدونس مفروم
• معلقة صغيرة قشر ليمون
• كوباية زيتون أخضر حلقات
• نص كوباية كريمة طبخ
• معلقتين صغيرين عصير ليمون
• كوباية أوراق ريحان طازة

الطريقة

• شوح التوم في الزيت لحد ما ريحته تبان
• ضيف البقدونس وقلب كويس لحد ما يغمق ويطلع مياه، وضيف الزيتون والكريمة وخفف بمياه سلق المكرونة 
• سيب الخليط لحد ما يغلي وهدي النار وسيبه 5 دقايق
• بعد ما ترفعه من على النار.. ضيف قشر وعصير الليمون والريحان وقلب كويس

 صوص وايت بيستو

المكونات

• نص كوباية عين جمل
• كوباية ونص جبنة ريكوتا
• فص توم مفروم
• كوباية ونص جبنة بارميزان
• قشر حبة ليمون
• معلقتين صغيرين زعتر 
• نص كوباية زيت زيتون
• ملح وفلفل أسود 

الطريقة

• حمص عين الجمل في الفرن لمدة 5 دقايق
• افرم عين الجمل في الكبة
• شوح التوم في الزيت وضيف عليه عين الجمل وقلب كويس ل ما يبقى لونه دهبي
• ضيف الجبنة الريكوتا والجبنة البارميزان وقلب كويس لحد ما يتجانس
• تبل الخليط بالملح والفلفل الأسود والزعتر