صحة جنسية
أنواع اللولب والأعراض المحتملة لتركيبه وتأثيره على الممارسة الجنسية
إزاي تفرقي بين أنواع اللولب؟
المحتويات
اللولب هو وسيلة منع الحمل للسيدات بديلة لحبوب منع الحمل اللي دراسات كتير بتأكد على تأثيرها الخطير على الصحة، وبالتالي ضروري تعرف فوائد تركيبه وأنواعه والأعراض اللي ممكن تحصل للسيدات أثناء وبعد تركيبه بجانب الأعراض الجانبية المحتملة وقت الممارسة الجنسية.
أنواع اللولب
النحاسي
- اللولب النحاسي عبارة عن قطعة بلاستيك صغيرة على شكل حرف T وملفوفة بسلك نحاس في نهايته خيط رفيع مصنوع من النايلون
- بيمتد الخيط من بداية عنق الرحم ودوره مساعدة المرأة على التأكد إنه موجود في مكانه
- دوره هو زيادة سمك إفرازات عنق الرحم وبالتالي صعوبة وصول الحيوانات المنوية للبويضة
- بيمنع التصاق البويضة المخصبة على جدار الرحم في حالة وصول الحيوانات المنوية للبويضة وحدث تخصيبها
- وبتبقى النتيجة منع حدوث الحمل
- مش بيأثر على القدرة على الإنجاب بعد إزالته بجانب إنه بتمتد قدراته وبتوصل لـ 10 سنوات من التأثير
- ممنوع استخدامه على السيدات اللي بيعانوا من حساسية النحاس
الهرموني
- بيعتبر مشابه في الشكل للنحاسي ولكنه مختلف لأنه بيحتوي على هرمون البروجيستوجين (Progestogen)
- تأثيره مشابه لهرمون البروجسترون (Progesterone)
- دوره مشابه لدور النوع المعدني في زيادة سمك إفرازات عنق الرحم ولكن بالإضافة لكده بيغير في طبيعة بطانة الرحم عشان يمنع التصاق البويضة بيها في حالة تخصيبها
- النوع الهرموني أحيانًا بيمنع الإباضة وبالتالي حدوث الحمل
- بداية عمله مش فورية ولكن لازم تنتظري أسبوع كامل قبل بداية مفعوله ولكن بيعمل فورًا لو اتركب خلال الأسبوع الأول من الدورة الشهرية
- تأثيره من 3 لـ 5 سنوات حسب العلامة التجارية للولب وبترجع القدرة على الإنجاب فورًا بعد إزالته
الأعراض الجانبية
أثناء تركيبه
- تشنج أو ألم بتتراوح مدته من دقيقة لدقيقتين
- بعض الأطباء بينصحوا بتناول مسكّن للألام أو حتى حقن مادة مسكّنة قبل تركيبه
- بتقل فرص حدوث الإغماء ولكنه احتمال وارد وبالتالي لازم يبقى معاكي شخص تاني وقت تركيبه
بعد تركيبه
- بعض السيدات بيمروا ببعض أعراض التنشجات أو آلام الظهر بعد تركيبه بمدة بسيطة لكنها بتقل باستخدام كمادات مياه دافية على مكان الألم
- بتستمر الآلام أحيانًا لعدة أيام ولكنها بتقل تدريجيًا بعدها وهي آلام مشابهة لفترة الدورة الشهرية
- بتقل غذارة الدورة الشهرية بعد تركيب اللولب لمدة 6 شهور وعند بعض السيدات بتنقطع تمامًا
- النوع الهرموني أحيانًا بيسبب ألم شديد في الرأس والصدر وتغيرات مزاجية واختلاف في طبيعة البشرة
- العكس صحيح مع النحاسي لأن الدورة الشهرية بتزيد غزارتها بعد تركيبه
- بعض السيدات بيصابوا بنزيف متقطع خلال الـ 3 شهور الأولى من تركيبه لكن النزيف بيقل بعد فترة
مميزات اللولب
- الخبراء بيأكدوا إنه وسيلة عالية الكفاءة لمنع الحمل وبتوصل نسبة كفائتها لـ 99%
- بيزوّد فرص الممارسة الجنسية بحرية بدون عوائق ممكن تقلل استمتاع أحد الأطراف أثناء العلاقة
- ممكن تركيبه بعد يومين فقط من الولادة (ولكن ضروري تستشيري طبيبك المتخصص لأن بعض الحالات بتحتاج تنتظر لمدة 6 أسابيع)
- بيعتبر النوع النحاسي منّه وسيلة منع فعّالة مع السيدات اللي مش عايزين يلجأوا لوسائل منع الحمل الهرمونية
- مفيش أي تداخلات دوائية للولب مع أدوية مختلفة
- سعره متوسط وبترجع القدرة على الحمل بصورة طبيعية بعد إزالته مباشرة
علامات تحذيرية وقت الممارسة الجنسية بعد تركيب اللولب
- تغيّر طول الخيط الممتد من اللولب بعد الممارسة الجنسية سواء أطول أو أقصر من طوله الطبيعية
- الإحساس بأن الجزء البلاستيكي الشفاف للولب بيخرج من عنق الرحم
- ألم شديد وقت الممارسة الجنسية وزيادة التقلصات وآلام أسفل البطن
- زيادة كمية الإفرازات المهبلية عن الطبيعي بجانب ارتفاع درجة الحرارة وصعوبة التنفس
- لو واجهتي الأعراض دي بعد الممارسة الجنسية لازم تستشيري طبيبك فورًا
- لو الخيط الممتد من اللولب بيأثر على العملية الجنسية ممكن تقولي لطبيبك لأنه ممكن يتحكم في طوله
