المحتويات
الدايت أنواعه مختلفة، والفروق بينهم هي مواعيد الأكل ونوعه والممنوعات والأطعمة المسموح بيها اللي وطرق تقسيم الوجبات على مدار اليوم، فمهم تختار الدايت المناسب ليك ولنظام يومك.
أنواع الدايت المختلفة
الدايت قليل السعرات
- من أبسط وأسهل أنواع الدايت لأنه معتمد على تقليل عدد السعرات الحرارية في اليوم
- احسب أكلك على مدار اليوم بس مهم تبقى مش أقل من 1200 سعر حراري
- عدد السعرات المسموح بيها بتختلف على حسب السن/ الجنس/ درجة النشاط
- في خيارات واسعة لكل أنواع الأكل بس مهم تتحكم في الكميات وبيحتاج تركيز وحساب لعدد السعرات الحرارية في كل حاجة بتاكلها وبتشربها
- مش مناسب ليك لو بتحب الوجبات الخفيفة وصعب تحسبه على مدار اليوم بسبب طبيعة شغلك
الدايت قليل الكربوهيدرات
- بيعتمد على أكل كميات كبيرة من البروتين والدهون زي اللحوم/ الأجبان/ الخضار/ المكسرات
- بيسبب نزول الوزن السريع بس مش لكل الناس
- لما الكربوهيدرات بتقل الجسم بيدخل مرحلة الكيتوسيس وبينتج جزيئات الكيتونات ولما بتاكل كربوهيدرات قليلة وكميات كبيرة من البروتين الجسم بيحرق الدهون المخزنة فيه
- بيسمح بأكل الدهون بأنواعها اللي بتمنعها عنك أنظمة الدايت التانية
- لا يوجد حد للسعرات الحرارية ولو التزمت بيه بالطريقة الصحيحة هتحس بالشبع معظم الوقت
- المرحلة الأولى منه (أول أسبوعين) بتحس بالتعب والدوخة نتيجة لقطع الكربوهيدرات والفاكهة والسكر
- صعب للأشخاص اللي مش بيعرفوا يطبخوا لأنه بيحتاج لوصفات معينة وعلى اللي مش بيحبوا اللحوم والفراخ وبيحبوا السكريات
- ليه آثار جانبية على مرضى السكري من النوع الأول والنساء المرضعات والحوامل
الدايت قليل الدهون
- بيعتمد على تقليل نسبة الدهون في نظامك الغذائي وزيادة نسبة البروتين والكربوهيدرات
- السعرات الحرارية في الدهون أعلى من الموجودة في الكربوهيدرات والبروتين وبالتالي تقليلها هيقلل الوزن
- بيعتمد على أكل الخضار والفاكهة بكميات كبيرة وتقليل كميات الدهون من الأكلات زي الزبدة والجبنة والشوكولاتة والبيض وزيت جوز الهند
- بيحتاج تقرا مكونات الأكل بتركيز عشان تتأكد من نسب الدهون فيه
- مشكلته إنه ممكن يأذي الجسم لأن في أنواع أحماض دهنية ضرورية للجسم
- ممكن تميل لأكل الكربوهيدرات عشان تعوض قلة الدهون
- في أنواع من الأكل المكتوب عليه (قليلة الدهون) بتكون نسب السكر أو الملح عالي فيه وده غلط
- غير مناسب لمحبي اللحوم والأجبان أو لو عايز تخس بسرعة
النظام النباتي
- بيمنع أكل اللحوم أو المنتجات الحيوانية زي البيض واللبن
- في أنواع مختلفة زي اللي بيسمح بأكل اللحمة مرة أسبوعيا أو بيسمح بأكل الأسماك أو أكل البيض بس
- قليل السعرات الحرارية والدهون ومليان عناصر غذائية
- مناسب لخفض الكوليسترول وضغط الدم وبيعتمد على كل أنواع الخضار والفاكهة.. والحلويات مسموحة فيه
- بيحتاج تاخد كمية البروتين اللي محتاجها من الخضار
- ضروري تلتزم بيه بالطريقة الصحيحة عشان تحافظ على صحتك
- مناسب لغير محبي اللحوم واللي بيعرفوا يطبخوا لأنه بيحتاج تنويع وابتكار في الوصفات
دايت البحر المتوسط
- بيعتمد على الأكل الطازج والبسيط زي الخضار والفاكهة وزيت الزيتون والمكسرات ومنتجات الألبان غير المعدلة وكمية قليلة من اللحوم الحمرا
- مستمد من الأنظمة الغذائية للأشخاص في اليونان وجنوب إيطاليا
- الدراسات أثبتت إن سكان المناطق دي عندهم نسب أقل من أمراض القلب/ السرطان/ السكري/ السمنة
- لا يمنع أكلات كتير بس بيسمح لكميات بسيطة جدا من الكربوهيدرات المعقدة زي الشوفان والأكل المصنع
- بيعتمد على اللحوم البيضا والأسماك والحبوب الكاملة والزبادي والأجبان
- بيحتاج تاكل كميات قليلة من كل حاجة ونتايجه بطيئة لأنه بيعتمد على تغيير طبيعة النظام الغذائي
- تكلفته عالية
نظام الباليو
- بيحد من الأكلات اللي كانت غير متوفرة للبشر البدائيين زي منتجات الألبان والأكل المصنع والسكر المضاف والبقوليات والحبوب والبطاطس
- بيعتمد على اللحوم اللينة والأسماك والبذور والخضار والفاكهة والزيوت المشتقة من المكسرات والفاكهة
- بيساعد على خسارة الوزن سريعا لو التزمت بيه بالطريقة الصحيحة وبيحسن الحالة الصحية العامة للجسم لكن خيارات الأكل قليلة وبتحتاج تركيز في الكمية اللي هتاكلها
- هيحتاج مجهود في وصفات الطبخ والتنوع
- بيساعدك على التحكم في الشهية وضغط الدم وخفض الدهون الثلاثية
نظام الصيام المتقطع
- الصيام المتقطع هو تحديد عدد ساعات معينة في اليوم للأكل والصيام عنه في باقي الساعات
- مسموح تشرب مشروبات خالية من السعرات الحرارية زي المياه/ قهوة/ شاي/ يانسون بدون سكر أو لبن خلال وقت الصيام
- مدة الصيام بين 12- 16 ساعة في أي جزء من اليوم حسب ظروف حياتك
- استغل ساعات النوم في ساعات الصيام
- قسم وجبتين كبار ووجبة خفيفة في النص بينهم وقت الفطار
- الأكل بيعتمد على الألياف/ البروتينات الحيوية والنباتية/ الدهون الصحية زي المكسرات النية والأفوكادو وبذور الكتان
- وبذور الشيا والسمسم الني وزيت الزيتون وزيت جوز الهند/ النشويات المعقدة زي العيش البلدي والرز البني والشوفان والبليلة
- تجنب الوجبات السريعة/ اللحوم المصنعة/ الأغذية المحفوظة/ السكريات/ النشويات البسيطة زي الفينو/ الدهون الضارة زي الزيوت المهدرجة
- بيزود معدل هرمون النمو في الجسم خاصة مع الرياضة والنوم الكافيذ
- هيقلل مقاومة الأنسولين ويعلي حساسية الجسم ليه
- بيحافظ على عضلات الجسم وبيحل مشكلة ثبات الوزن
- مناسب لنزول دهون البطن وهيحسن المناعة
- ممكن يأذي الصحة لو أهملت العناصر الغذائية في وجباتك
- غير مناسب لكبار السن/ الأطفال/ مرضى الكلى والكبد/ مرضى السكر من النوع الأول/ الحوامل والمرضعات لطفل أقل من 6 شهور
نظام أكل الـ3 ساعات
- بتقسم الوجبات الأساسية لوجبات صغيرة تاكلها كل 3 ساعات عشان تعلي الحرق
- ممكن تاكل وجبات خفيفة (100 سعر حراري) بين وجباتك
- تجنب الأكل قبل النوم بـ3 ساعات
- مسموح بكل أنواع الأكل بس بكميات قليلة
- بيساعدك على الشبع طول اليوم
- لا توجد أبحاث علمية تثبت فعاليته بشكل كبير
- مناسب ليك لو بتحب الوجبات الخفيفة أو بتعاني من ألم المعدة بعد الوجبات التقيلة