زيت السمسم: فوائده للجسم والشعر وطرق استخدامه

زيت السمسم من الزيوت الصحية المستخدمة في الطبخ ووصفات العناية بالبشرة والشعر، لأنه غني بالعناصر الغذائية والفيتامينات زي الكالسيوم وفيتامين ب ومضادات الأكسدة اللي بتحمي الجسم من الأمراض.

العناصر الغذائية لزيت السمسم

كل معلقة كبيرة منه فيها:

• 120 سعر حراري
• 0 جم بروتين
• 14 جم دهون
• 0 جم كربوهيدرات وسكر وألياف
• فيه كمية متوسطة من أوميجا 3 و6 وهي أحماض دهنية ضرورية للوقاية من أمراض خطيرة زي أمراض القلب والسرطان وبتساعد على تقوية المناعة

فوائد زيت السمسم

غني بمضادات الأكسدة

زيت السمسم فيه مادتين للأكسدة (Sesamol) و(Sesaminol) اللي ليها آثار قوية على الصحة زي تقليل خطر تدمير خلايا الجسم اللي اللي بتسبب الالتهاب والأمراض

مضاد للالتهابات

• الالتهاب المزمن سبب لأمراض خطيرة زي أمراض القلب وضغط الدم وزيت السمسم ليه خصائص مضادة للالتهاب
• الأبحاث كشفت إنه بيساعد على تقليل علامات الالتهاب في الجسم

زيت السمسم مفيد للقلب

• الدراسات أثبتت إن النظام الغذائي الغني بالدهون غير المشبعة مفيد لصحة القلب، وزيت السمسم فيه حوالي 82% أحماض دهنية غير مشبعة
• دراسات قليلة اكتشفت إن الأشخاص اللي تناولوا 4 معالق كبيرة يوميا منه (59 مللي) قل عندهم معدلات الدهون الثلاثية والكوليسترول الضار عن الأشخاص اللي بيتناولوا زيت الزيتون، ولكن الدراسات لسه محدودة.

مفيد لضبط مستوى السكر في الدم

دراسات محدودة أثبتت إن الأشخاص المصابة بداء السكري 2 اللي انتظموا على تناول زيت السمسم يوميا لمدة 90 يوم قل عندهم معدل السكر في الدم

بيساعد في الوقاية من التهاب المفاصل

• التهاب المفاصل بيصيب حوالي 15% من الناس وبيسبب آلام المفاصل
• دراسات محدودة أثبتت إن تناوله يوميا بيقلل علامات الإجهاد التأكسدي في الجسم واللي منها آلام التهاب المفاصل

فوائد محتملة

فيه بعض الفوائد اللي دراسات قليلة دعمتها زي:

• عمل مساج بزيت السمسم لجبهة الرأس لمدة 30 دقيقة بيحسن جودة النوم
• المساج بيه على أماكن الألم زي الضهر والركبتين بيساعد على تقليل الآلام
• فيه نسبة حماية من الشمس حوالي 30% لكن لازم تستخدم واقي الشمس معاه

فوائد زيت السمسم للشعر

بيقلل تساقط وتقصف الشعر

لأنه غني بأحماض أوميجا 3 و6 الدهنية وهي أحماض مهمة للجسم، دراسة سنة 2017 أثبتت إن نقصهم بيسبب ضعف الشعر العام

تناول السمسم كحبوب ليه دور مهم في تحسين شكل وصحة الشعر لأنه غني بـ:

• فيتامين ب1
• الكالسيوم
• النحاس
• الفوسفور
• الحديد
• المغنيسيوم
• الزنك
• المنجنيز

بيعالج جفاف الشعر

الأحماض الدهنية اللي فيه بتساعد على تنعيم وترطيب خصل الشعر وبتقلل جفاف قروة الرأس، وهي نفس الأحماض اللي بيتم إضافتها للشامبو والكريمات زي:

• حمض الأوليك
• اللينوليك
• حمض البالميتيك

مفيد لصحة فروة الرأس

الأحمض الدهنية اللي فيه بتساعد على تقليل التهاب وتهيج فروة الرأس وبالتالي علاجها في حالة ظهور أماكن حمراء نتيجة الالتهاب

بيقلل قشرة الشعر

• السمسم وزيت السمسم فيهم خصائص مضادة للبكتيريا والفطريات، وبالتالي بيحمي فروة الراس من العدوى المختلفة والإصابة بالقشرة
• استخدامه على فروة الرأس بيقلل تقشر أو تهيج أو جفاف فروة الرأس

بيقوي وبيحسن حالة الشعر

• استخدامه كماسك للشعر بيقلل تقصف الأطراف وبيخلي مظهر الشعر أقوى
• بيقلل كمية المياه اللي بتمتصها خصل الشعر أثناء الاستحمام لأن مع زيادة كمية المياه فيها الشعر بيميل للضعف والشكل الباهت

الحماية من أشعة الشمس

ليه دور في حماية الشعر من الأشعة فوق البنفسجية اللي بتحرق الشعر وبتسبب تلفه

طرق استخدام زيت السمسم للشعر

في أكتر من طريقة مناسبة للانتظام على استخدامه زي:

• ضيفه لماسك الشعر الأسبوعي اللي منتظم عليه
• دفي من 2-3 معالق كبار منه واعمل مساج بيه لفروة رأسك وبعدين غطي خصل الشعر ولف رأسك بفوطة دافية واغسله بعد ساعة
• ضيف قطرات بسيطة منه لماسك الزبادي أو المايونيز
• ممكن تستخدمه مع ماسك البيض للشعر
• خلطه مع زيوت تانية مفيدة للشعر زي زيت الأفوكادو وزيت الزيتون وزيت الأرجان واعمل ماسك زيت لشعرك