الدورة الشهرية: أعراضها وطرق تخفيفها ومتابعتها

الدورة الشهرية هي علامة على البلوغ، وبتحتاج لتجهيزات ومعلومات عشان تقدري تتعاملي معاها بالطرق الصحيحة وتتجنبي آلامها، وتتبعها هيساعدك تفهمي طبيعتها وتحددي التغييرات اللي بتحصل لجسمك.

ما هي الدورة الشهرية؟

هي مجموعة من التغييرات الشهرية في جسم المرأة، بينتج المبيض بويضة واحدة والعملية دي اسمها الإباضة، وفي نفس الوقت الجسم بيحصل فيه تغييرات هرمونية بتجهزه للحمل، وفي حالة حدوث عملية الإباضة وعدم تلقيح البويضة، بيبدأ الدم اللي اتكون في بطانة الرحم بالنزول وبيصاحبه مجموعة من الأعراض

موعد الدورة الشهرية

• بتبدأ الدورة الشهرية عند البنات ما بين سن 12-14 سنة، وممكن تبدأ بدري أو متأخر عن السن ده حسب طبيعة جسمها
• تختلف دورة الحيض اللي بيتم حسابها من أول يوم في الدورة الشهرية لأول يوم في الدورة التالية من امرأة للتانية، فتدفق الدم ممكن يحصل كل 21-35 يوم، ويستمر من يومين لـ7 أيام
• في السنين الأولى منها، ممكن مدتها تختلف عن المعدل الطبيعي لكن مع التقدم في العمر مدتها ومواعيدها بتكون منتظمة أكتر
• ممكن تستغرق نفس المدة كل شهر، وممكن تتغير تغييرات بسيطة سواء للأقل أو للأكتر
• شدة أو قلة تدفق الدم والآلام الشديدة أو القليلة أشياء طبيعية وبتختلف حسب طبيعة الجسم
• عند الاقتراب من سن اليأس Menopause بتبدأ الدورة الشهرية في الضعف مع الوقت لحد ما تتوقف تماما

طرق تتبع الدورة الشهرية

طرق تتبع الدورة الشهرية متعددة، ومهمة عشان تكتشفي الموضوع بطريقة طبيعية، اكتبي مواعيد بدايتها ونهايتها في ورقة كل شهر لأشهر متتالية واهتمي بتسجيل معلومات زي:

• تاريخ الانتهاء وفترة استمرارها
• التدفق، هل هو نفس الشكل كل شهر أو متغير
• النزيف غير الطبيعي، فهل بتعاني من نزيف ما بين الدورات الشهرية؟
• الألم واوصفي حدته وقارنيها بين كل الأشهر
• تغييرات تانية بتمري بيها زي السلوك والحالة المزاجية أو ظهور الحبوب

أسباب عدم انتظامها

• الحمل أو الرضاعة، فممكن تفويت دورة شهرية يكون علامة مبكرة على الحمل
• فقدان الشهية أو فقدان وزن شديد
• ممارسة الرياضة بإفراط ممكن يعيق الحيض
• متلازمة المبيض المتعدد الكيسات، فبعض السيدات المصابات باضطراب الغدد الصماء ممكن تعاني من عدم انتظام الدورة الشهرية بالإضافة لتضخم المبايض
• فشل المبايض المبكر وهو فقدان الوظيفة الطبيعية للمبايض قبل سن الـ40، واللي بيسبب عدم انتظامها
• مرض التهاب الحوض وهي عدوى في الأعضاء التناسلية
• الأورام الليفية الرحمية وهي أورام غير سرطانية في الرحم وممكن تسبب الدورات الشهرية الطويلة أو الغزيرة
• التوتر والضغط العصبي الشديد ممكن يسبب تأخيرها أو عدم انتظامها لأنه بيأثر على هرمونات الجسم
• الإجهاد الشديد

أعراض الدورة الشهرية

في بعض الأعراض ممكن تظهر قبل الدورة الشهرية ما بين 2-4 أيام وبتختلف حدتها ما بين سيدة للتانية وهي:

• ألم البطن من أسفلها لحد الجزء الأعلى وممكن يمتد للضهر
• العصبية والشعور بالضغط النفسي الزايد قبل نزولها وسهولة البكاء
• الرغبة في النوم، وبتزيد بعد نزولها بسبب الشعور بالتعب والنعاس
• ظهور حب الشباب (Acne) خاصة في الوجه
• اضطرابات الجهاز الهضمي زي الغصابة الإمساك أو الإسهال والانتفاخ والغازات
• انتفاخ الجسم وخاصة في جزء البطن قبل الدورة الشهرية أو أثناء حدوثها مع زيادة الوزن ما بين 2-3 كيلو وبتختفي بعد انتهائها
• الغثيان والرغبة في القيء
• ألم الرأس والصداع المصاحب لهالة اللي بيسبب صعوبة في التركيز والتشوش الذهني

الدورة الشهرية والصداع

1. هرمون الأستروجين بيقل مع قرب الدورة الشهرية ومعدل هرمون البروجستوجين بيعلى والاضطراب ده بيسبب تغيرات مزاجية عند الستات وبتكون أكتر عرضة للإصابة بالصداع النصفي
2.  في أنواع مختلفة من الصداع مرتبطة بالدورة الشهرية زي:

•  صداع التوتر بيظهر قبلها بأسبوع وبيكون نفس إحساس ربط راسك ببندانة
•  الصداع النصفي وقتها وبعد انتهائها بسبب قلة نسبة الحديد في الدم
•  الصداع وقت الحيض عادة بيرتبط بمرحلة الأورة وهي حالة عصبية بتظهر خلال 5 لـ20 دقيقة قبله وهي اضطراب وتشوش الرؤية وظهور خطوط غير محددة الشكل
• وبتسبب شعور بالوخز في الإيد والدراع والوجه وبيصعب التركيز وفتح العيون
• وممكن يصاحبه الغثيان والقيء والحساسية من الصوت العالي والنور والشعور بالتعب الشديد

الدورة الشهرية والحمل

سيدات كتير صعب تفرق بين أعراض الدورة الشهرية والحمل لتشابههم ببعض ولكن ممكن تفرق بينهم عن طريق تفاصيل بسيطة

أعراض الدورة الشهرية

• تورم وألم الثديين قد يصاحبه بعض الإفرازات وبتنتهي آثارها بعد انتهائها مباشرة
• كثافة الدم العادية اللي بتستمر لحد أسبوع
• التقلبات المزاجية والشعور بعدم الارتياح والميل للبكاء وبتنتهي بانتهائها
• قلة الطاقة أو الرغبة في التحرك والشعور بالصداع النصفي
• صعوبة النوم والشعور بالتعب قبلها وبينتهوا مع بدايتها
• الشعور بالغثيان وعدم ارتياح المعدة والهضم
• زيادة الشهية بنسبة كبيرة والميل للسكريات والنشويات والموالح
• الشعور بالتقلصات قبلها بيوم أو يومين وبتقل مع بدايتها تدريجيا لحد انتهائها

أعراض الحمل

• ملمس الثدي بيكون أنعم وشديد الحساسية ومتورم ومنتفخ وبيستمر لحد أسبوع لأسبوعين بعد الحمل وقد تستمر الحالة لفترة من الوقت نتيجة ارتفاع مستوى هرمون البروجسترون في الجسم
• تتعرض الستات لنزيف مهبلي بسيط في شكل بقع حمرا أو بني غامق بعد 10- 14 يوم من الحمل وبتستمر لمدة يوم أو يومين
• الشعور بالقلق والتوتر والرغبة في البكاء طول فترة الحمل وبتستمر لبعد الولادة وقد تصل للاكتئاب
• الشعور بالتعب بسبب ارتفاع هرمون البروجسترون في الجسم
• الغثيان الصباحي وقد يصاحبه القيء بعد أول شهر من الحمل
• الرغبة الشديدة لأكلات معينة أو الابتعاد تماما عن الأكل
• كره روايح معينة كانت محببة ليكي وممكن يستمر طول فترة الحمل
• الإصابة بمتلازمة بيكا وهي الميل لأكل حاجات معينة خالية من القيمة الغذائية أو خطر زي التلج/ الطين/ الشعر. فضروري استشارة دكتور
• في بداية الحمل التقلصات بتكون بسيطة أسفل البطن والضهر وممكن تستمر لحد أكتر من شهر

 أهمية متابعة الدورة الشهرية

1. حساب مواعيدها هيساعدك تتوقعيها وتجهزي ليها، أو لاكتشاف أمراض مرتبطة باضطرابها زي داء السكري واضطرابات الكبد وتكيس المبايض
2. هتقدري تتبعي رغبتك الجنسية والوقت الأنسب للحمل أو لتقليل فرص الحمل بشكل آمن
3. في تطبيقات كتير ممكن تساعدك في تتبعها زي:

• Period Tracker.. My Calendar
• Flo
• Bunny’s Period
• Women Diary
• متعقب فترة الحيض

طرق تخطي آلامها

في طرق معينة تقدري تتغلبي بيها على آلام الدورة الشهرية وتقدري تنتظمي عليها عشان تحققي نتياج أفضل زي:

• استخدام كمادة سخنة على بطنك لتخفيف الألم
•  اعملي مساج للبطن بخليط بين أحد الزيوت الأساسية زي اللافندر والزيوت الحاملة زي الجوجوبا  
• مارسي رياضة (الأيروبكس) من 3 لـ 4 مرات في الأسبوع
•  اقعدي في مياه سخنة لمدة ربع ساعة عشان عضلاتك تسترخي 
• مارسي اليوجا لاسترخاء العضلات وتحسين الحالة المزاجية مرة في الأسبوع
•  الدراسات أثبتت إن عناصر زي الكالسيوم والماغنسيوم والزنك وفيتامين ب1-6-12 بتخفف الألم
•  تجنبي الموالح والكافيين والأكل اللي فيه دهون
•  اشربي على الأقل 2 لتر مياه في اليوم

الفيتامينات لتخفيف آلام الدورة الشهرية

بعض الدراسات أثبتت إن في أنواع معينة من الفيتامينات نقصها بيسبب زيادة الآلام الناتجة عنها والانتظام على الأطعمة الغنية بيها أو المكملات الغذائية هيساعدك تقلليها، زي:

 المغنيسيوم

• بيساعد على استرخاء العضلات
• بيقلل آلام المعدة
• بيقلل التقلبات المزاجية
• موجود في السبانخ وبذور القرع العسلي والسلمون والرز البني والبطاطس

 الحديد

• بيقلل إحساس الدوخة والتعب قبلها وأثنائها
• بيقلل تشنج العضلات
• موجود في الخضار الورقي الأخضر/ الفاصوليا/ اللحوم/ الكبدة/ البنجر

 الزنك

• مهم لإنتاج هرمونات الجسم
• بيساعد على استرخاء العضلات وممارسة الحياة اليومية بشكل طبيعي أثنائها
• ليه خصائص مضادة للالتهاب وبالتالي بيحسن حالة الجسم الفترة دي
• موجود في المحار والكاجو والموز وبذور القرع العسلي واللحوم والفاصوليا

 أوميجا 3

• معظم التشنجات العضلية والصداع المصاحب ليها سبب مادة كيميائية اسمها (Prostaglandin)
• الانتظام على الأوميجا 3 بيقلل آثارها على الجسم
• بيقلل معدل اضطرابها وعدم انتظام مواعيدها
• موجود في الأسماك الدهنية وبذر الكتان وفول الصويا وعين الجمل وزيت كبد الحوت

فيتامينات ب

• الجسم بيقلل الشعور بالتعب/ الصداع/ التقلبات المزاجية
• موجود في البيض/ اللحوم والبقوليات والبروكلي والسبانخ والأفوكادو والموز

 برايم روز

• مستخلص من زيت كان بيستخدم في علاج آلام البطن والتهاب الحلق ومشاكل الجلد
• موجود في شكل مكملات غذائية
• بيساعد على تقليل أعراض اضطراب المزاج وآلام العضلات وترقق الثدي المصاحب ليها

 فيتامين د والكالسيوم

• الدراسات أثبتت إنهم مرتبطين ببعض في تحسين حالة العظام
• نقصهم بيسبب زيادة أعراضها زي التعب والصداع وتشنج العضلات واضطراب الشهية
• الكالسيوم موجود في السردين والأجبان والسبانخ وفول الصويا والزبادي
• فيتامين د موجود في السلمون والسردين والرنجة واللحوم الحمراء وصفار البيض والكبدة

 فيتامين هـ

• بيقلل ترقق الثدي والألم المصاحب ليه
• بيقلل الإحساس بالتهاب الجسم قبل الدورة الشهرية
• موجود في اللب السوري واللوز والبندق والبيض

 البروبيوتيك

• بيساعد على التخلص من اضطرابات المعدة زي الغثيان والقيء والآلام
• بيقلل التوتر والاكتئاب والتقلبات المزاجية المصاحبة ليها
• موجود في الزبادي والأكل المخمر والمخلل والموز والكرنب

 التغذية وقت الدورة الشهرية

الاهتمام بالتغذية وقتها هيساعد في تقليل أعراضها وهيقلل إحساسك بالألم زي:

• بعض الأطعمة بتساعد في تقليل أعراض الدورة الشهرية زي المغص/ الصداع/ غثيان/ الانتفاخ/ تشنج العضلات/ تقلب المزاج 
• الفاكهة والخضروات الغنية بالمياه زي البطيخ والبرتقال والكوسة والبروكلي والخيار بتساعد في الحفاظ على رطوبة الجسم
•  مستويات الحديد بتقل أثناء الدورة الشهرية وده بيسبب الإرهاق والألم الجسدي والدوخة وتناول الخضروات الورقية زي الجرجير والخس والسبانخ مهم لأنها بتزود مستوى الحديد
• السبانخ غنية بالمغنيسيوم اللي بيساعد في تقليل التشنجات العضلية 
• كوباية جنزبيل دافية ممكن تساعد في تهدئة آلام العضلات لأنه بيحتوي على مضادات الالتهابات   
•  أوميجا 3 في الأسماك الدهنية زي السردين والتونة والسلمون بيقلل شدة آلام الدورة الشهرية
• دراسة قالت إن أوميجا 3 بتقلل نوبات الاكتئاب في  فترة الحيض
•  الشوكولاتة الغامقة غنية بالحديد والمغنيسيوم وبتقلل الصداع والدوخة وتشنج العضلات
• دراسة قالت إن مادة الكركمين في الكركم بتأثر على أعراض الدورة الشهرية 
• المكسرات غنية بأحماض أوميجا 3 والبروتين 
• دراسة قالت إن شاي النعناع بيهدي تقلصات الدورة الشهرية والغثيان والإسهال

معاد توقف الدورة الشهرية

1. بتتوقف تماما في حالة الحمل ولكنه توقف مؤقت، وبترجع تنتظم تاني بعد الولادة
2. التوقف النهائي ليها بيكون في مرحلة انقطاع الدورة الشهرية، وبيكون بعد سن الـ45، وبتمر السيدة فيه بأعراض زي:

• اضطراب الدورة الشهرية الناتج عن اضطراب الهرمونات
• انخفاض مستوى هرمون الإستروجين
• عدم القدرة على الحمل
• التقلبات المزاجية والهبات الساخنة المفاجئة