الجبن بأنواعها المختلفة وطرق إعدادها في البيت بخطوات سهلة

الجبن من منتجات الألبان المفضلة لمعظم الناس سواء الكبار أو الأطفال، أنواعها بتختلف على حسب طريقة إعدادها ونكهتها ونسيجها ومدة تخزينها، ومكونها الأساسي إذا كان اللبن البقري أو الجاموسي، فهي لا غنى عنها خاصة في وجبة الفطار والعشاء، وكمان بتدخل في أكلات ووصفات مختلفة لأطباق رئيسية ومقبلات وسلطات.

تصنيف الجبن

بيتم تصنيفها على حسب أكتر من عامل:

• النسيج (كريمي/ شبه كريمي/ خشنة)
• النكهة (خفيفة/حادة)
• مدة تخزينها
• طريقة التحضير
• نوع اللبن المستخدم (البقري/ الماعز/ الجاموسي)
• اللون
• بلد ومنشأ التصنيع

أنواع الجبن

بتتقسم لنوعين:

أنواع الجبن الرئيسية

بتقسم لـ6 أنواع وتحتها بيجي باقي الأنواع الفرعية 

• الجبن القاسي
• الجبن متوسط القساوة
• جبنة العفن الأزرق
• الجبن الأبيض
• الجبن الطازج
• جبن الماعز

أنواع الجبن الثانوية

الموتزاريلا

• من أنواع الجبن الطازج وبيرجع أصلها لإيطاليا
• بيم تصنيعها من حليب الجاموس أو البقر 
• بتتميز بقوامها الكثيف المرن، وبتضيف طعم وقوام كريمي بعد إضافتها للوصفات المختلفة زي الصلصة الحمراء والبيتزا والمعجنات وأطباق المكرونة وغيرها

الشيدر

• بتندرج تحت الأجبان متوسطة القساوة، وبتتميز بإنها قليلة الملح ومتوازنة الرطوبة
• منشأها بيرجع إنجلترا، وبيتم تصنيعها من اللبن البقري المبستر، لونها أصفر الشاحب لكن بعض الشركات المصنعة بتضيف ألوان طعام  عشان تكون برتقالي فاتح اللون

الإمنتال

• أو الجبنة السويسرية، بيتم تصنيعها من اللبن البقري غير المبستر ومن الجبن متوسطة القساوة
• بتتميز بطعم لذيذ وريحة مميزة، أكتر ما يميزها بوجود فراغات فيها وبتتكون بسبب تجمع فقاعات غاز ثاني أكسيد الكربون اللي بيُنتج بسبب نوع من البكتيريا النافعة

الجاودا

• من الأجبان متوسطة القساوة، زي الشيدر
• منشأها الأصلي هولندا، وبيتم تصنيعها من اللبن البقري، وبتتميز بملمسها الكريمي وتفتتها السريع

الفيتا

• بيتم تصنيعها من لبن الماعز أو الأغنام المبستر أو غير المبستر، ومنشأ الأصلي اليونان
• قوامها وملمسها شبه كريمي وسريعة التفتت وبتميل للملوحة بنسبة قليلة
• بتستخدم في الساندوتشات السلطات والفطاير

البارميزان

• من الأجبان القاسية، ومنشأها إيطاليا، بيتم تصنيعها من لبن البقر غير المبستر 
• بيتم إضافتها للشوربة والبيتزا والمكرونة

الماسكربوني

• من الجبن الإيطالية بيتم تصنيعها من اللبن البقري المبستر، من خلال خلط اللبن وهو رايب وحمض الستريك
• بتستخدم في الحلويات زي التيراميسو، والتشيز كيك لأنها لها قوام دسم وكريمي

 الروكفور

• من جبن العفن الأزرق، وبيتم تصنيعها من لبن الأغنام، ومنشأها فرنسا
• البقع الزرقاء اللي بتظهر عليها هي بسبب مستعمرات فطر البنسيليوم، وللي بيديها طعم مميز  

القريش

• من الجبن البيضاء لها قوام طري، وبيتم صنعها من خثارة لبن البقر، ويبعتقد أن منشأها أمريكا
• بتحتوي على نسبة عالية من البروتين مقارنة بأنواع الجبن التانية بسعرات حرارية قليلةوعشان كدة تعتبر من أكتر الأنواع الصحية ومفيدة في إنقاص الوزن

الريكوتا

• من الجبن البيضاء الإيطالية ومعروفة باسم تاني (جبن مصل اللبن) لأنها بتصنع من مصل اللبن المتبقي من عملية صنع الجبن التانية
• بتحتوي على نسبة قليلة من الملح
• ممكن تاكلها مع العيش المحمص والسلطات

العكاوي

• من الجبنة البيضاء بيتم تصنيعها من لبن الماعز والبقر، ومميزة بنكهتها المالحة، وبتدخل في وصفات المعجنات والغموس
• أخدت الاسم ده نسبة لمدينة عكا في شمال فلسطين كموطن أصلي لها، لكن كمان بيتم تصنيعها في مدن منطقة البحر المتوسط زي قبرص ولبنان وسوريا  

طرق عمل الجبن المختلفة في البيت

الجبنة الموتزاريلا

المكونات

• 2 كيلو لبن حليب
• ربع كوباية عصير ليمون
• نص كوباية خل

الطريقة

• حط اللبن في حلة على نار متوسطة 
• ضيف عصير الليمون والخل وقلب الخليط  
• استمر في التقليب.. لحد ما يظهر كتل بيضاء ويبدأ يتجبن (ظهور قطع جبن طرية)
• حط الشياطة تحت الحلة واستمر في التقليب
• اضغط على قطع الجبن لحد ما تتماسك وتبقى في قوام مطاطي لما تحاول تقطع منها
• خرج الجبنة من السائل الأبيض وحطها في قطعة شاشة بيضاء نضيفة 
• اعصر الجبنة كويس عشان تتخلص من أي سوايل
• حط الجبنة في الفريزر لحد ما تتجمد
• شكلها حسب الرغبة.. ممكن تقطعها شرايح أو أصابع أو تبشرها

الجبنة القريش

المكونات

• 5 كيلو لبن حليب
• معلقة صغيرة ملح

الطريقة

• حط اللبن في حلة على نار متوسطة وضيف الملح 
• دفي اللبن.. وانقله في طاجن فخاري
• سيب الطاجن في مكان دافي لمدة 12 ساعة 
• صفي الجبنة في شاش أبيض نضيف واحتفظ بالمياه (الشرش)
• سيبها على مصفى لمدة 6 ساعات عشان تتخلص من أي مياه زيادة
• حط الجبنة القريش في علبة ووزع عليها الشرش ودخلها التلاجة

الجبنة الكريمي

المكونات

• كيلو لبن حليب
• 3 معالق كبار زبدة 
• ربع كوباية خل
• ربع معلقة صغيرة ملح

الطريقة

• حط اللبن في حلة على نار متوسطة وضيف الخل 
• قلب الخليط لحد ما يبدأ اللبن يتجبن (يتكتل)
• صفي الخليط في شاش أبيض نضيف لمدة ساعتين 
• حط الجبنة في الخلاط الكهربائي مع الزبدة والملح 
• اضرب الجبنة لحد ما يبقى قوامها كريمي
• انقلها في علبة نضيفة وحطها في التلاجة 
• ممكن تزود 3 قطع جبنة مثلثات عشان تعزز القوام والنكهة

الجبنة الشيدر

المكونات

• كوباية لبن بودرة
• ربع كوباية مياه
• 2 صفار بيض
• كوباية زيت درة
  
• بياض بيضة
• 2 جبنة مثلثات
• معلقة صغيرة ملح 

الطريقة

• اخلط اللبن البودرة وزيت الدرة في الخلاط الكهربائي 
• ضيف صفار البيض والجبنة المثلثات والملح 
• استمر في الخفق لحد ما يبقى قوام الخليط تقيل
• ضيف المياه مع بياض البيض وكمل خفق لحد ما يبقى خليط متماسك
• ادهن علبة بلاستيك بكمية صغيرة زيت.. ووزع فيها خليط الجبنة 
• اقفلها كويس ودخلها التلاجة لمدة 24 – 32 ساعة 
• خرجها من العلبة وشكلها زي ما تحب (تبشرها أو شرايح)