الصبر من الصفات اللي بتنعكس على حياتك لأنه بيزوّد إنتاجك وبيحسّن نظرتك للحياة وبيشجعك على تحمّل الظروف الصعبة وبيمرنك تتحكم في مشاعرك وانفعالاتك وتسيطر عليهم وتقلل نسبة الخطأ في قراراتك، وبالتالي مهم تعرف طريقة اكتساب الصفة دي وإزاي تنقلها لطفلك بسلاسة عشان ينجح في حياته.
أهمية الصبر
- الدراسات بتقول إنه بيقلل نسبة هرمون الكورتيزول وهو هرمون التوتر وبالتالي بيساعد على الاسترخاء
- بينظم معدلات ضغط الدم والسكر وبيحافظ على انتظام ضربات القلب
- بيقلل الإحساس بالخوف والقلق وعدم الأمان اللي تفاقمه ممكن يسبب مشاكل صحية ونفسية زي القلق والاكتئاب
- بينمي قدرة الشخص على الخيال والتركيز وإتخاذ القرارات الصحيحة بناء على المعطيات وبيطوّر مهارات التفكير النقدي
- بيحافظ على جودة النوم وبيقل الإحساس بالألم وبينشغل الشخص في التفكير لخططه المستقبلية
- بيزوّد فهمك العميق للأشياء المحيطة بيك وبيشجعك تستغل الوقت في تطوير مهاراتك
- الخبراء بيأكدوا إن كفاءة أي مهمة بتعملها ممكن توصل للضعف لو بتعملها بتأني وبصبر وبتقدر تستفيد من نتايجها الإيجابية
طريقة اكتساب صفة الصبر
- اسأل حد بتثق فيه عشان تعرف لو صفة الصبر دي عندك ولا لأ خصوصًا لو مش عارف تقيّم نفسك
- اعمل جدول قبل ما تنام لليوم اللي بعده وحدد الحاجات اللي هتعملها بالمواعيد
- اختار عدد الأنشطة المناسب لطاقتك ورتّبهم حسب الأهمية عشان توازن بين عدم إهدارك للوقت أو التسرع الزايد
- قيم الحاجة اللي قدامك إذا كانت تستحق الاستعجال المفرط ولا لأ وافتكر إن التأني بيلهمك بأفكار مختلفة وبيخليك تنظر للأمور من زاوية مختلفة
- اتحكم في خوفك من الفشل لأنه سبب رئيسي في تسرعك وافتكر دايمًا إن استعجالك بيأثر على جودة شغلك أو مذاكرتك
- بيخليك تنسى حاجات أو مواعيد أو تفاصيل مهمة وممكن يسببلك مشاكل
- اهتم بتمارين التنفس لأنها بتساعدك تقلله زي إنك تتنفس بعمق وبعدها تكتم النفس لمدة 5 ثواني وبعدها تخرج الهواء ببطء وتستنى 10 ثواني قبل تكرار التمرين تاني
- حدد وقت معين ترد فيه على الرسايل حسب الأهمية عشان توفر وقت وهترد باهتمام وبتفاصيل أكتر
- الخبراء بيأكدوا إن تفكيرك في نتايج أي حاجة بتعملها مهما كانت بسيطة هتساعدك
- ممارسة الرياضة وتحديد نتايج معيّنة في وقت زمني محدد هيساعدك تبقى صبور وتستحمل أي مجهود بدني زائد
- افتكر فوائد القراءة على تفكيرك ونفسيتك والتزم بيها يوميًا واعرف إنك لازم تتعود تقرأ الكتاب لآخره عشان تفهم هدف الكاتب منّه
- الصيد نشاط أساسي للتدريب على الصبر بس الأحسن تبدأ ممارسته مع شخص شاطر فيه عشان تعرف الطريقة المثالية للصيد وفي نفس الوقت تتعود عليه ويقل إحساسك بالملل
- الخبراء بيقولوا إن اليوجا والتأمل دورها مهم في تعليم الصبر للكبار والأطفال
ممارسة تمارين التأمل
- اختار مكان هادي خالي من أي مصادر تشتيت انتبه لمدة 5 دقايق لحد ساعة على حسب قدرتك
- البس ملابس مريحة ومناسبة لحالة الجو عشان تتجنب تشتت انتباهك واقلع الجزمة قبل ما تبدأ
- حدد المدة اللي تقدر عليها الأول واظبط منبه أو اربط انتهاء الوقت بحدث معين زي شروق الشمس
- حاول تكمل المدة اللي حددتها لنفسك عشان تقدر تحقق نتايج إيجابية
- اعمل تمارين استرخاء لمدة دقيقتين عشان تهيأ نفسك وجسمك قبلها وتتجنب الشد العضلي
- اختار أريح وضع جلوس مناسب ليك سواء على الأرض مباشرة أو على مخدة
- اقعد في وضعية اللوتس أو نصف اللوتس أو أي وضع متوازن ومناسب لفرد ضهرك تماما بس مهم قدمك تكون مفرودة على الأرض وإيدك في حجرك
- لو الجلوس مش مريح.. مارس التمارين أثناء المشي أو الوقوف أو التمدد
- العمود الفقري لازم يدعم جسمك من الوسط لحد فوق ويكون مفرود بوضعية مريحة ليك
- غمض عينك عشان تتجنب تشتت الانتباه وركز على حركة أنفاسك وهي بتدخل وتخرج من جسمك
- تجنب بذل مجهود مبالغ فيه واتنفس بطريقة طبيعية
- طبيعي إن تسرح في صور وأفكار مختلفة بس لازم تتجنب الحكم على نفسك وحاول تسحب نفسك منها بالراحة وركز تركيزك على التنفس تاني
- اعرف إن مهمة التأمل هي مراقبة والتركيز على أفكارك والتعامل معاها باتزان وقبول للوصول للاسترخاء
- ممكن تردد لحن أو كلمات محددة مناسبة ليك للوصول لأكبر درجة من التركيز وركز على كل جزء من جسمك بالتدريج وحدد شعورك في اللحظات دي
- ابدأ بعضلات أصابع قدميك وارخيها تماما من أي تشنجات وتوتر وأول ما تحس إنها مسترخية تماما اتحرك للجزء اللي بعده وكرر نفس العملية
- خد الوقت اللي محتاجه في التركيز مع كل جزء من جسمك
- كثف تركيزك على جسمك كله واستمتع بشعور الاسترخاء اللي حققته وابعد ذهنك عن أي أفكار أول ما تحس إن جسمك استرخى
- ركز مع تنفسك (الشهيق والزفير) لمدة دقايق قبل ما تطلع من حالة التأمل
- الانتظام على الممارسة هيساعدك تستمر لمدة أطول وتحقق نتايج إيجابية أكتر واعرف إن الوقت الأنسب لممارسة التمرين هو الصبح عشان ذهنك يكون خالي من أي توتر
- ثبت معاد التمارين وتجنب ممارستها بعد الأكل أو مشاهدة التلفزيون لمدة طويلة وابعد عن التدخين أو تناول الكحوليات
- الخبراء بيأكدوا إن الانتظام على نظام غذائي صحي والنوم عدد ساعات كافي مهم لنجاح عملية التأمل
تربية الطفل على الصبر
- شاركه في تجارب مختلفة فيها انتظار لمدة طويلة زي انتظار الأكل لحد ما يجهز أو تعلمه الصيد في وقت الفراغ
- أكد على متعة الحصول على نتيجة بعد الصبر والانتظار سواء من خلال الإحساس بطعم الأكل الشهي أو اصطياد السمك بعد مدة طويلة
- فهّمه إنه اللي بيعمله مش سهل وخليه يعتبره نوع من التحدي بس مهم تختار الوقت المناسب عشان توصل لأحسن نتيجة
- خليه يساعدك قدر المستطاع في الأعمال المنزلية اللي بتطلب صبر
- بلاش تضايق منه في الأول لما يعبر عن ضيقه لأن الهدف الأكبر إنه يتحمل
- علّمه إن الصبر هيساعده يكتسب مهارة أو معلومة جديدة هتفيده في حياته وإنه صفة أساسية لتحقيق النجاح والتميّز
- كافئه لما يصمد معاك عشان يحس بقيمة الإنجاز وعلمه يستغل وقت الانتظار في شيء مفيد زي الرسم أو التفكير في حل مشكلة
- وبلاش تستسلم لضيقه وتخليه يلعب بالموبايل
- الأحسن يتدرب على نشاط مفيد يعمله واشرحله الساعة وقيمة الوقت عشان يدرك إن لكل شيء نهاية
- خليك قدوة قدامه واصبر في أبسط المواقف وافتكر إن تنمية صفة الصبر عندك هتساعدك تنقلها لطفلك أحسن
