المحتويات
الروتين اليومي هو تكرار أفعال معينة في مواعيد محددة، واللي الدراسات أثبتت إنه بيساعد على تحسين الصحة العقلية خاصة أوقات التوتر لأنه بيمنحك إحساس السيطرة على الأشياء.
فوائد الروتين للصحة البدنية
- اتباع نظام محدد وتوفير الوقت اللازم ليه هيساعدك في الحفاظ على صحتك زي الصحيان بدري عن معاد الصحيان العادي لعمل فطار بتحبه أو ممارسة اليوجا
- بيحسن جودة النوم ودرجة انتظامه لأن عمل روتين بسيط قبل النوم وتحديد معاد ليه وللصحيان بيساعد على تقوية درجة اليقظة والانتباه وتحسين الحالة النفسية والعاطفية
- عمل روتين لمواعيد الأكل وتنظيم وجباتك على مدار اليوم من حيث الجودة والكمية هيساعدك على الوقاية من أمراض الجهاز الهضمي وتحسين صحة جسمك
- بيحسن حالة الجسم لأنه بيمده بالطاقة الكافية لإنجاز النشاطات
- بيساعدك على إدخال عادات صحية في اليوم بطريقة أسهل وبيسرع تعودك عليها
- بيمنحك الفرصة والوقت للتركيز مع جسمك واحتياجاته والقدرة على التغيير طبقا لتغييراته
فوائد الروتين اليومي للصحة النفسية
- دراسة أمريكية أثبتت إن الروتين المنظم في المراحل الأولى من الحياة بيساعد على تحقيق النجاح والتفرد في المراحل العمرية اللي بعد كده
- وقلة تنظيم وقتك والأحداث اليومية بتزود فرص الفشل الدراسي وضعف الصحة العامة والقدرة على ضبط النفس
- بيساعدك تبدأ اليوم بهدف محدد وتلتزم بيه.. فمثلا الصحيان في معاد محدد وممارسة اليوجا أو تمارين التأمل 20 دقيقة وبعدين شرب القهوة بيمدك بشعور جيد في بداية اليوم
- الدراسات أثبتت إن تحديد مواعيد ثابتة للأشياء زي الفطار والغداء والنوم بيمنحك شعور السيطرة على الأشياء
- والقدرة على تغييرها والتعامل معاها وبيسبب إحساس الأمان والاستقرار
- بينظم تفكيرك لأنه بيخرج كل الأشياء اللي لازم تنجزها يوميا على ورق وبالتالي بيقلل التشتت الذهني أو الشعور بتعدد المهام
- الدراسات أثبتت إن الانتظام عليه بيقلل التوتر وبيزود قدرتك على التعامل مع المواقف المفاجئة اللي ممكن تسبب لك قلق
طرق الالتزام بروتين يومي محدد
في خطوات معينة اتباعها هيساعد تبدأ روتين جديد وتلتزم بيه، زي:
- تحديد احتياجك من الروتين والتغيير اللي عايز تعمله زي ممارسة الرياضة أو قضاء وقت أكبر مع نفسك
- ابدأ بأهداف صغيرة، فممكن تقسم الهدف الكبير لأهداف صغيرة على مراحل متباعدة لأن تغيير الأشياء تدريجيا أسهل في الاعتياد عليه، فمثلا لو الروتين هو الالتزام بالأكل الصحي ممكن تدخل عنصر صحي يوميا في وجبة مختلفة
- خليك صبور وخد الوقت اللي محتاجه عشان تغير عادة قديمة أو الالتزام بعادة جديدة بياخد 21 يوم والتعود عليها بشكل دائم بيحتاج 90 يوم
- اختار الوقت الأنسب ليك لممارسة الروتين، فمثلا لو عايز تتعود على الرياضة، ممارستها الصبح اختيار مناسب لو إنت شخص نهاري وبتكون أكتر نشاط الصبح أو مارسها بعد العمل قبل الذهاب للبيت لتجنب الكسل
- ضيف جزء من المرح في الروتين عشان ده هيسهل عليك الالتزام بيه، فلو الروتين متعلق بالقراءة اختار القصص الخفيفة المتنوعة في البداية
- اعمل لوحة على الحائط بالإنجازات اللي حققتها في الالتزام بالروتين وعلقها في مكان بتشوفه بشكل دوري عشان تحس بالفخر
- كافئ نفسك أول بأول، فمثلا لو الروتين هو ترويق البيت قبل النوم يوميا، ممكن تشتري قطعة أثاث مريحة ليك أو حاجة كان نفسك فيها وتستمتع بيها في البيت وهو نضيف
