المحتويات
الكذب من الصفات المذمومة أخلاقيًا ومجتمعيًا رغم إنه فعل منتشر بين أغلب الناس ولكن بتختلف درجاته من شخص للتاني حسب هدفه من الكذب وبيئته المحيطة، وبيتمنى أغلب الأشخاص امتلاك القدرة على اكتشاف كذب الآخرين عليهم وفي نفس الوقت التدريب للتخلص من العادة دي لو عندهم من فترة طويلة.
تأثير الكذب على المخ وطريقة التعود عليه
- دراسات كتير بتقول إن الكذب بيبقى أسهل كل ما زاد وبيتحول لعادة صعب التخلص منها
- بيستمر من حل المشاكل لحد المواقف اللي الكذب مش ضروري فيها
- دراسة في جامعة ديوك الأمريكية بتقول إن الدماغ بيلجأ للتكيف العاطفي وهو الأساس البيولوجي للكذب
- فرص الكذب بتبقى أعلى بغرض تحقيق منفعة سواء ليك أو لحد تاني
- نشاط اللوزة الدماغية ومناطق في الدماغ مرتبطة بمعالجة العواطف والاستجابة ليها بيزيد في بداية الكذب
- مع زيادة مرات الكذب بيقل نشاطها تدريجيًا وده بيشجع على الكذب بدرجة أكبر في موضوعات أهم لتحقيق النفع
- في بداية الغش في الامتحانات بيزيد الخوف والتوتر لكن مع الاستمرار فيه بيقل وبيدور الشخص على حيل إضافية
- الكذب بيخلي اهتمامك بنفسك على حساب الآخرين وبتبقى الأولوية لتحقيق مصلحتك بس
- مع الوقت بيقل الإحساس بالذنب لما تكدب وبتتعود عليه
- المخ بيعمله كأي شيء بيصيبه بالضيق والخوف زي الضوضاء أو الريحة الكريهة لكن مع تكراره بيقل الضيق منه وبيبقى شيء عادي بالنسبة له
أنواع الكذب
- دراسة أمريكية في 2008 فصلت الكدب الأبيض عن أنواع تانية وقسمتها في شكل مختلف وقسم خبراء علم النفس الكدب على 4 ألوان وهم: أبيض وأسود ورمادي وأحمر
الأبيض
- في الأصل هو نوع غير أناني بيساعد به الشخص الآخرين وحتى لوعلى حساب نفسه وهو طريق لحل المشاكل أو مدح الآخرين وبيمنح الكذاب رضا عن أفعاله
الرمادي
- معظم الأكاذيب اللي بتتردد يوميا هي أكاذيب رمادية وبيتخيل الكذاب إنه بيساعد بيها الآخرين ونفسه في نفس الوقت وبتختلف اعتمادًا على توازن المساعدة والضرر
الأسود
- مصدرها أنانية الشخص الكذاب ومش بتفيد الآخرين ولكن غرضها الوحيد هو إما إخراج الشخص لنفسه من المشاكل أو تقليل الضرر على الأقل
- ممكن يبقى هدفه كسب شيء يرغب فيه وبتزداد درجة السوء في حالة إنه سبب ضرر لشخص تاني في مقابل مكسب شخصي
الأحمر
- وهدفه إيذاء الأخرين حتى لو هيأذي الكذاب نفسه معاهم وممكن سببه يبقى نزاع طويل أو رد الإساءة أو تحقيق العدل من وجهة نظره تجاه خيانة طرف معين وغالبًا بيبقى شخص كان قريب منه في فترة معيّنة
طريقة كشف الشخص الكذاب
- الكاتب بول سيجر، مؤلف كتاب Would I lie to you قال في مقابلة مع بي بي سي إنك هتقدر تكشف الكدب لو ركزت مع الكلام اللي بيقوله الشخص واللي بيسميه Verbal cues
- دراسة في جامعة أمريكية تناولت دور اللغة في التفريق بين الحقيقة والخداع، وأكدت إن اختراع قصة مزيفة عملية إدراكية معقدة لأنها بتتطلب وصف تفاصيل وأحاسيس مزيفة
- وأكدت إن اللي بيكدب عادة بيستخدم عدد أكبر من أفعال الحركة زي الفعل يجري أو يحمل لأنها بتدي صورة مادية ملموسة أسهل في التخيل من أفعال الآراء زي الفعل يعتقد
- الرأي ده بيختلف معاه بول سيجر وبيقول إن أفعال الحركة مش شرط أساسي للحكم على الشخص إنه كذاب وإن أشخاص كتير بيستخدموها من فرط حماسهم أثناء حكي موضوع مشوق بالنسبة لهم
- ونصح باستخدام حاجة اسمها (Honest Baseline) وهي رصد سلوك وطريقة كلام الشخص في الوضع الطبيعي اللي مفيهوش ضغط
- زي إنك تسأله سؤال عادي عن الجو أو الأكل، وبعدها توجه له السؤال المهم اللي عايز إجابته، وتقارن الطريقة اللي رد بيها في الحالتين، ولو طريقة كلامه ونبرة صوته اتغيرت فده ممكن يكون مؤشر على الكدب
- افتكر إن الكذاب في أغلب الأوقات بينسى وبالتالي ضروري تسأله أكتر مرة عن أدق التفاصيل في القصة المشكوك في صحتها
- لو اكتشفت إنه بيتوتر أو غيّر التفصيلة أكتر من مرة اعرف إنه بيكذب فورًا
- علماء كتير بيدرسوا لغة جسد الآخرين خصوصًا وقت الكذب وحددوا بعض الحركات الجسدية اللي بيقوم بيها الكذاب لاإراديًا ومنها:
- تغطية الفم والأنف باستمرار
- فرك العين ولمس الرقبة
- بتوسع فتحة الأنف
- اختلاف نبرات الصوت وتكرار الجمل أكتر من مرة
- الإيد بتتحرك طول الوقت ومش ثابتة
- بيحاول مايبصش في عينك أو بيتعمد يبص فيها طول الوقت زيادة عن اللزوم عشان يخفي ارتباكه
- لكن خبراء تانيين بيقولوا إنها علامات ممكن تبقى معروفة للأشخاص اللي بيكدبوا باحترافية وبالتالي بينتبهوا إليها كويس لعدم كشف كذبهم
- بس ضروري تعرفها لإن إفراط أي شخص في الحركات دي مؤشر قوي على كذبه
التخلص من عادة الكذب المستمر
- ركز مع نفسك وفي الوقت اللي هتلاقي نفسك هتكدب ووقف كلام
- اسأل نفسك بعض الأسئلة زي:
- أنت فين؟ مع مين؟ إيه شعورك؟ هل بتكدب عشان تحس إنك أحسن أو تتجنب شعور سيء؟
- الإجابة على الأسئلة دي هتساعدك تحدد السيناريوهات أو المشاعر أو العوامل التانية اللي بتدفعك للكدب
- اكتشف نوع كذبك حسب الأنواع الأربعة الأشهر عشان تحاول تفهم سبب كذبك المستمر
- تحديد نوع الكذب هيساعدك تفهمه وتجنب أسبابه
- ابدأ بالرد بصراحة بإجابات كاملة مش اللي الشخص التاني عايز يسمعها
- تقدر تقول الحقيقة لكن مش كاملة بدلا من الكدب
- اسأل نفسك إيه أسوأ نتيجة لو قلت الحقيقة لو بتكدب لأنك بتعتقد إن الحقيقة ممكن تسبب لك أذى أو تزعج شخص وغالبا هتكتشف إنها مش بدرجة السوء اللي أنت متخيلها
- تجنب التبريرات و المجاملات المبالغ فيها
- فكر إذا كلامك إنه هيظهر احترامك لنفسك وللآخرين
- استشير دكتور متخصص لو حسيت إنك مش قادر تسيطر على نفسك أو بتعاني من الكدب المرضي
