المحتويات
البطاطس من أشهر الخضروات اللي بتستخدم في العالم، وأشهر طبق مقبلات مفضل هو الفرايز أو البطاطس المحمرة للكبار والأطفال، وتعتبر مصدر جيد لفيتامين سي والبوتاسيوم والألياف وفيتامينات ب والنحاس والتربتوفان والمنجنيز، وبالتالي لها فوايد صحية كتيرة، لكن مهم تركز على طرق إعدادها بشكل صحي أكتر من تحميرها.
فوايد صحية للبطاطس
- غنية بالحديد والفسفور والكالسيوم والمغنيسيوم والزنك.. وبتساعد الجسم على بناء والحفاظ على بنية العظام وقوتها
- كمان الحديد والزنك لهم دور كبير في إنتاج ونضوج الكولاجين اللي بيعزز صحة البشرة والمفاصل
- لأنها بتحتوي على نسبة مهمة من البوتاسيوم.. بتساعد على توسع الأوعية الدموية ومعادلة نسبة الصودويم المضرة والحفاظ على ضغط الدم
- الألياف والبوتاسيوم وفيتامين ج وفيتامين ب 6 بتدعم صحة الدم وبتساعد في تقليل الكمية الإجمالية للكوليسترول وبالتالي بتقلل خطر الإصابة بأمراض القلب وتصلب الشرايين
- بتحتوي على حمض الكولين وهو عنصر غذائي دوره مهم ومتعدد الاستخدامات زي إنه بيساعد على حركة العضلات وبيحسن المزاج والقدرة على التعلم والذاكرة
- وكمان بيساعد الكولين في الحفاظ على بنية الأغشية الخلوية والنبضات العصبية وامتصاص الدهون بشكل أفضل وتطور المخ
- بتحتوي على الفولات وبتساعد على إصلاح الشيفرة الوراثية المتضررة في الجسم ومنع انتشار الخلايا السرطانية مع فيتامين سي والكيرسيتين كمضاد للأكسدة اللي بيحموا الخلايا من التلف بسبب الجذور الحرة
- التربتوفان الموجود فيها بشكل طبيعي يعتبر مهدئ طبيعي بيضمن النوم المريح والاسترخاء
- بتساعد في تخفيف أعراض متلازمة ما قبل الحيض لأن الكربوهيدرات بترفع مستويات التربتوفان وبالتالي زيادة إنتاج هرمون السيروتونين (هرمون السعادة) في الجسم وتقليل القلق والتوتر
نصائح لتناول البطاطس
- تجنب تقشيرها لأن القشرة بتحتوي على معظم القيمة الغذائية
- اغسلها كويس جدا قبل الطبخ (انقعها في خل أو بيكربونات الصوديوم)
- تجنب تناول البراعم الخضراء في الثمرة لأنها بتكون سامة
- سلقها أو خبزها في الفرن مع قشرتها أفضل للصحة من القلي
- تجنب حفظها في التلاجة لأن انخفاض درجة الحرارة هيحول النشا لسكريات ويسبب ظهور رائحة كريهة
- ابتعد عن الإفراط في تناولها خاصة لو مريض السكري أو بتعاني من السمنة لأنها بتحتوي على كميات كبيرة من الكربوهيدرات اللي بتتحول لسكريات
الفرق بين بطاطس التحمير والطبخ
التحمير
- غنية بالنشا ورطوبتها قليلة
- لونها من جوه مايل للأبيض
- القشرة الخارجية فاتحة ورقيقة
- الثمرة صلبة
- مناسبة للقلي أو للفرن
- تجنب استخدامها في الشوربة عشان هتمتص كمية كبيرة من السوايل وتتفتفت (مياه أو مرقة)
الطبخ
- فيها كمية أقل من النشا
- لونها من جوه أصفر غامق
- قشرتها لونها غامق وسميكة
- الثمرة بتكون طرية
لو مش عارف تحدد نوعها.. انقعها في مياه لو طفت على السطح يعني صالحة للتحمير ولو غرقت في البولة تبقى طبيخ
طرق مختلفة لتحضيرها
شوربة بطاطس مع الدرة
المكونات
- كوباية ونص بطاطس مقشرة ومقطعة مكعبات
- علبة درة صفراء
- بصلة صغيرة مفرومة
- فص توم مفروم
- كوبايتين مياه
- معلقة صغيرة زيت
- ربع كوباية جزر مبشور
- معلقتين صغيرين بقدونس مفروم أو مجفف
- 3 معالق كبار دقيق
- ربع كوباية شوربة
- نص كوباية جبنة شيدر مبشورة
- كوباية ونص لبن حليب
- ملح وفلفل أسود
الطريقة
- سخن الزيت وضيف البصل والتوم وقلب لحد ما ريحتهم تظهر
- ضيف البطاطس والجزر والبقونس وقلب كويس
- تبل بالملح والفلفل الأسود
- بعد ما البطاطس تبدأ تستوي.. ضيف الدرة وربع كوباية لبن
- اخلط الدقيق مع باقي اللبن والشوربة وضيفهم للخليط السابق وقلب كويس لحد ما يبقى قوامه تقيل
- ضيف الجبنة وقلب لحد ما تسيح وارفع الشوربة من على النار
سلطة البطاطس مع الفاصوليا
المكونات
- 6 حبات بطاطس متوسطة الحجم مقطعة مكعبات
- معلقة كبيرة عصير ليمون
- بصلة حمراء كبيرة مقطعة مكعبات
- معلقتين كبار زيت زيتون
- ربع كيلو فاصوليا خضراء مقطعة لنصين
- معلقتين كبار خل تفاح
- معلقة كبيرة مسطردة
- ملح وفلفل أسود (حسب الرغبة)
- معلقة كبيرة زعتر
الطريقة
- في صينية.. اخلط البطاطس والبصل والفاصوليا مع معلقتين كبار زيت الزيتون والملح والفلفل الأسود
- دخل الصينية الفرن لمدة 30 دقيقة
- اخلط باقي زيت الزيتون والخل والزعتر والمسطردة
- ضيف الخليط على الخضار وقلب وزود ملح أو فلفل أسود لو محتاج
بطاطس بالتوم والأعشاب
المكونات
- نص كيلو بطاطس مقطعة مكعبات ومسلوقة
- معلقتين كبار زبدة
- نص كوباية لبن حليب
- معلقة كبيرة بقدونس مفروم
- فصين توم مفروم
- معلقة كبيرة ريحان مجفف
- ملح وفلفل أسود
- معلقة كبيرة بصل أخضر مفروم
الطريقة
- اهرس البطاطس ناعم وضيف اللبن ويكون دافي وقلب لحد ما يتجانس مع البطاطس
- شوح التوم في الزبدة وضيف البصل الأخضر والبقدونس والزعتر والريحان
- ضيف الخليط على البطاطس وقلب كويس وتبل بالملح والفلفل الأسود
