نصائح مهمة قبل شراء كلب وطرق تغذيته وتدريبه

اقتناء كلب لأول مرة سواء كان جرو أو كبير، اشتريته أو تبني، هي مغامرة بيشملها الحب والمسؤولية في نفس الوقت لأنه التزام طويل الأمد، ومهم قبل ما تاخد القرار ده، تعرف طبيعة نمط حياتك وتختار سلالة احتياجاتها تتماشى معاك، وكمان تعرف أكتر عن طرق العناية والتربية الصحيحة، زي التطعيمات والأكل وغيرها.

قبل ما تشتري

• تجنب قرارك يكون مندفع ومش مدروس ولازم تكون مدرك الآثار المترتبة على الالتزام بملكية الكلاب
• لأنه مش مجرد متعة وتسلية، وهيكلفك فلوس ووقت وكمان طاقة ومجهود في لعبه وأكله والتمشية والنضافة
• اعمل سيرش وأسأل على سلالات الكلاب المختلفة، وإيه السلالة الأفضل لشكل ونمط حياتك على حسب طبيعته سواء اجتماعي أو نشيط أو بيحتاج مساحة وغيرها 
• بعد اختيار السلالة.. اقرى وافهم كتير عن احتياجاتها والطباع الخاصة بها 
• هتحتاج تعرف إذا كنت محتاج جرو أو كلب كبير، الجرو الصغير بيكون ممتع أكتر لكنه بيطلب طاقة أكبر في الاهتمام والتربية
• مهم تكون عارف هتقدر تدربه ولا محتاج مدرب أو يكون مدرب بالفعل
• ممكن تروح شيلتر قبل تنفيذ قرارك، واتعامل مع الكلاب بشكل يومي أو لفترة محددة عشان تقدر تحدد قدرتك 
• التبني فكرة أفضل من الشراء.. ممكن بعد زيارتك للشلتر أكتر من مرة تختار كلب من هناك تراعيه 

جهز بيتك للضيف الجديد

• تقريبا نفس طريقة حماية الأطفال.. الكلاب فضولية وبتحب الاستكشاف وهتلحس أي شيء يعترض طريقها
• الأفضل تعود كلبك على مناطق معينة في البيت
• تأكد من عدم وجود نباتات منزلية سامة
• ابعد وأقفل أدوات التنظيف والأدوية
• امنع وصوله للأسلاك الكهربائية
• ابدأ بالتدريب في أسرع وقت ممكن 

طريقة تحديد السلالة الأصلية

• اعمل سيرش على مواصفات فصيلة الكلب اللي حابب تشتريه
• اكتب في ورقة خصائص مميزة زي: (الأذن الكبيرة المدببة والبنية المتوسطة والكسحة/ طول الوجه/ كثافة ونوع الشعر في الجيرمن)
• أغلب الكلاب المهجنة مع كلاب بلدي.. بتظهر نقط أو مسحة بيضاء على أخر الديل والكفوف
• خلي معاك شريط قياس.. واعرف طوله متماشي مع صفات السلالة الأصلية ولا لأ
• قيم لون الشعر أو الوبر.. بعض السلالات بتتميز بلونين أو لون واحد فقط.. لو لاقيت أكتر من لون ممكن يكون هجين
• في الكلاب الجيرمن.. لاحظ ضوافره لازم تكون سودة
• الكلاب زي البيتبول وروت فيلر وبوسطن تيرير بتكون جمجمتها دائرية
• اعرف متوسط وزن كل سلالة واعرف وزن الكلب
• لو مفيش ميزان للحيوانات الأليفة.. اوزن نفسك وبعدين شيله واوزن نفسك وفرق الوزن هو وزن الكلب

لو اشتريت/اتبنيت جرو

• حضر صندوق يكون حجمه مناسب ويكون مكانه هادي ودافي 
• افرش الصندوق بغطاء لتدفئة الجرو وممكن تحط زجاجة فيها مياه دافية ولفها في فوطة
• اشتري اللبن الخاص من محلات مستلزمات الحيوانات الأليفة أو لبن الأطفال أو الخالي من اللاكتوز
•  تجنب استخدام اللبن البقري لأنه بيسبب أمراض معوية
•  مدة رضاعة الجرو تتراوح ما بين 4 أو 5 أسابيع وبعد كده يبدأ ياكل عادي
• الرضاعات بتكون كل ساعتين أو 3 ساعات عن طريق الببرونة أو السرنجة والكمية بتكون لحد ما يشبع ويبطل رضاعة
• راقب وزن الجراوي عشان تتأكد من نموها بشكل طبيعي
• امسح فم الجرو بقطنة مبللة مياه دافية عشان تتأكد من نضافته وحمايته من البكتيريا
• افرك منطقة الإخراج بفوطة قطنية مبللة بمياه دافية بعد الرضاعة وقبلها عشان تحفز عملية الإخراج 
• بيحتاج الجرو من 3 أسابيع لشهر عشان يبدأ بقضاء حاجته بشكل تلقائي بدون مساعدة  
• بتبدأ تطعيمات الجرو لطرد الديدان بعد أسبوعين من وقت الولادة وبعد 6 أسابيع هياخد تطعيم ضد البراغيت والثنائي أو الخماسي

لو كلب أكبر

• كل كلب عند دخوله البيت مع صاحبه لأول مرة بيكون له رد فعل مختلف بتبقى على حسب شخصيته وسلالته وتجاربه السابقة
• في أنواع بتكون نشيطة وتجري وتلعب وتستكشف البيت وأنواع تانية بتخاف وبتعزل نفسها أو تستخبى
• مهم تراقب سلوك الكلب وعدم اقتحام خصوصيته في لحظات وصوله الأولى
• جهز له المكان المحيط به وسيبه يتحرك ويستكشف بنفسه
• عامله بلطف وتجنب الصراخ أو القسوة حتى لو عمل شيء غلط أو تبول في أي مكان لأن دي علامة من علامات التعود والقسوة ممكن تخليه يكره المكان 
• بعد 3 ساعات.. اصطحبه لمكان أكله وشرب المياه عشان يعرف المكان ده
• حاول التقرب من الكلب والتودد له بالبسكويت الخاص بالكلاب (Treats) وحاول تقديمها بإيدك لو رفض سيبه نص ساعة وكرر المحاولة 
• بعد تعوده على البيت.. تيجي خطوة التدريب على الطاعة 

التدريب على الطاعة

 تدريب الجلوس

1. هتسيب الكلب يمشي عشوائي
2. ابدأ قوله الكلمة الخاصة بالأمر ده (اقعد- Sit)
3. كرر الكلمة لحد ما ينفذ الأمر صح
4. كافئه وبينه له إنك مبسوط منه (سقفله/ طبطب عليه/ احضنه/ أكله)

  تدريب النداء

1. استخدم سلسلة طولها مترين في مكان مقفول
2. نادي على الكلب باسمه أو بكلمة تعبر للتدريب ده (تعالى – Come)
3. كرر الكلمة لحد ما الكلب ينفذ الأمر وكافئه
4. زود طول السلسة وكرر نفس الخطوات
5. في المرحلة الأخيرة كرر الخطوات من غير السلسلة

التعود على اسمه

1. مهم تعلم جروك اسمه قبل ما تبدأ في تدريبه على الأوامر
2. ممكن تختار اسمه بعد ما تلاحظ سمات شخصيته زي مثلا لو إنه كسول أو عنده طاقة كبيرة وشقي
3. اختار اسم سهل مكون من جزء واحد لأن الكلاب بتستجيب بشكل أفضل للأصوات القصيرة
4. استخدم الأسماء بحروف ساكنة وواضحة زي (ك = كوكا)
5. تجنب أي اسم ممكن يتناغم مع أسماء أشخاص أو أشياء تانية
6. انده لجروك باسمه أكتر من مرة وكافئه لما يستجيب للنداء
7. في حالة إنه ماستجبش لك.. شده ناحيتك وابعده وانده عليه تاني
8. قلل المكافآت بالتدريج
9. تجنب استخدام اسمه مع الأوامر السلبية زي (لأ) أو (اقعد – Sit) أو (ٍStop)
10. بعد انتهاء التدريب.. استمر في استخدام اسمه

تدريب النوم

1. خلي الكلب في وضع الجلوس
2. قوله الكلمة المخصصة للتدريب زي (نام-Sleep)
3. شد السلسلة لتحت عشان تساعد الكلب
4. كرر نفس الكلمة مع حركة السلسلة لحد ما يستجيب
5.  كافئه وكرر الخطوات عشان يحفظ
6. ممكن تساعده إنك تشد رجله في وضعية النوم
7. سيب الكلب في الوضعية دقايق

استخراج رخصة الكلب

• رخصة الكلب هي حلقة معدن عليها رقم ترخيصه وتاريخ السريان
• تقدر تستخرج الرخصة بعد أول تطعيم مرض السعار في الشهر الـ6 من عمر الكلب من مديرية الطب البيطري أو الإدارة البيطرية

خطوات الحصول عليها

• تقديم بطاقة تسجيل الكلب (فيها اسم الكلب/ فصيلته /نوعه/ اسم صاحب الكلب/ ورقمه القومي) وطلب الرخصة 
• دفع رسوم إصدار الرخصة الكلب والتطعيم ضد السعار (50 لـ80 جنيه)
• الكشف الطبي للكلب وتطعيمه ضد الأمراض المشتركة والسعار
• وضع (إستيكر) أمبول حقن التطعيمات في بطاقة التسجيل
• تقديم صورة إيصالات الرسوم والتطعيمات وبتحصل على الرخصة

تغذية الكلب

الأكل المفيد

• اللحوم والفراخ 
• الخضار المسلوق (جزر/بسلة/ كوسة/ بطاطس) 
• البيض المسلوق
• مكسرات (كاجو/ فول سوداني) 
• الفاكهة (تفاح/ بطيخ/ كانتالوب/ مانجا/ موز/ فراولة/ برتقال) 
• اللبن
• العيش 
• الشوفان 
• البطاطا
• الفشار
• الأرز
• المشروم
•  الجمبري
• الزبادي
• الجبنة بكميات محدودة
• عسل النحل

الأكل الضار

•  العضم 
• اللحوم الدهنية (بيكون/ سجق) 
• الشوكولاتة 
• التوم والبصل
• الليمون 
• السكريات خاصة الحلوى واللبان 
• الآيس كريم 
• الكافيين 
• العنب والزبيب
• الأفوكادو
•  اللوز

تجنب السكريات لأنها:

1. بتسبب اضطرابات في المعدة وإسهال بدم وقيء، ده بسبب تأثر بعض أنواع بكتيريا والكائنات الدقيقة
2. لأنها بتأدي لزيادة الوزن وإصابته بمرض السكري وتسوس الأسنان بسبب نشاط البكتيريا في الفم
3. حذرت الجمعية البيطرية البريطانية (BVA) من الحلويات الصناعية والمعجنات ولأن فيها مادة إكسيليتول
4. مادة (إكسيليتول) بتقلل نسبة السكر في الدم وده بيأدي لفشل في الكبد
5. الشوكولاتات فيها سعرات حرارية عالية وبتسبب قيء وجفاف وسرعة خفقان ضربات القلب وارتفاع حرارة أجسامهم
6. العنب والكريز بيسبب فشل كلوي

التطعيمات والأدوية الدورية

• التطعيمات بتبدأ الثنائي عشان تقوي مناعة الجرو وبعد 45 يوم بيكمل الثماني وبيتكرر مرة كل سنة وبيشمل السعار

تطعيمات الحشرات

• من أهم الحشرات القراد والبراغيث
• الريفلوشن أو البارص من الأدوية الأساسية المستخدمة
• الجرعة عبارة عن أمبول لكل 10 كيلو من وزن الكلب وبتفرغ على ظهر الكلب ولا يتعرض للمياه إلا بعد 3 أيام

للديدان

• أشهر أدوية ضد الديدان الدرونتال ووبارافيران  والفلوفيرمال
• الجرعة الدورية مرة كل 3 شهور على أسبوعين 
• قرص لكل 10 كيلوجرام من وزن الكلب
• لو وزن الكلب 5 كيلو بياخد نص قرص ولو 20 كيلو لأكتر بياخد قرصين 
• بتتاخد الجرعة على معدة فاضية (يصوم قبلها بـ3 ساعات وبعدها 3 ساعات)
• اهتم بنضافة الكلب وعدم إصابته بأي نوع حشرات خاصة البراغيت لأنها بتنقل يرقات الديدان لدمه  
•  أول جرعة بعد 45 يوم من ولادته

النضافة

• الاهتمام بتنظيف الكلب من وقت للتاني بيمنع انتشار الجراثيم والأمراض المتعلقة بالطفيليات والبكتيريا والتخلص من الروايح الكريهة
• اشتري الأدوات والمستلزمات الخاصة بالكلب زي الصابون/ الشامبو/ منظف آذان الكلاب/ مقلم أظافر/ فوط خاص له/قطن/ وليفة بلاستيكية/ فرشة على حسب نوع الشعر أو الوبر/ فرشة أسنان
•  مهم تقليم أظافر الكلب بشكل أسبوعي لشهري (حسب الكلب وسلالته)، لأنها مكان لتجمع البكتيريا والجراثيم والطفيليات
• اشطف جسم الكلب كويس عشان تتخلص من بقايا الصابون والشامبو عشان تتجنب إصابته بحساسية وحكة وتساقط الشعر
• اسأل الدكتور عن عدد مرات الاستحمام للكلب
• حمي الكلب في الصيف والشتاء بمياه دافئة، لأن المياه السخنة ممكن تسبب حروق والتهابات الجلد
• حط قطعة قطن صغيرة في اذن الكلب عند تحميمه عشان تحميه من دخول المياه
• نظف أسنانه بشكل يومي عشان تتجنب الريحة الكريهة ومشاكل اللثة والتسوس

حماية الكلب من القراد 

• القراد حشرة طفيلية بتتغذى على دم الحيوان ومن أكتر الأمراض الجلدية اللي بتصيب الكلاب
• بيمسك في جلد الضهر والراس وتحت الإبط أكتر لأنها أماكن الكلب مش بيوصلها
•  اهتم بنضافته باستمرار
• بلاش تمشيه في جناين مش نضيفة
•  لو عندك جنينة اهتم بنضافتها وقص الحشيش
• تجنب اختلاطه بكلاب غريبة أو مصابة
• اهتم بالتطعيمات الدورية زي الفرونتلين أو الريفوليوشن (نقط موضعية بتتحط في الرقبة من ورا)
• افحص جلده وشعره باستمرار
•  لو اكتشفت أي قرادة بلاش تشيلها بإيدك
• استخدم ملقاط مخصوص اشتريه من محلات الحيوانات الأليفة
•  افرك شعره بمغلي البابونج أو الليمون

طريقة فهم كلب من حركات جسمه 

•  لو ديل الكلب مرفوع بشكل أفقي وبيحركه بسرعة: متحمس أو مبسوط
• مرفوع بشكل أفقي وبيحركه ببطء: بيستكشف حاجة
• ملفوف بين رجله: خايف
• مرفوع بشكل رأسي ومشدود لفوق: بيستعد للهجوم
• الودن لو مرفوعة وثابتة: مركز ومستعد للأوامر
• رجعها لورا: ده وضع الخضوع والراحة لصاحبه
• لو بدأ يلحس فمه من غير أكل: يعني متحمس
• بيّن سنانه ورجع شفايفه ورا: يبقى في حالة عدوانية
• لو بيتاوب: حاسس بملل أو نعسان
• الحركات العدوانية زي تقطيع أو تحريك أي حاجة: يعني زهقان أو حزين
• لو قعد جنبك ووجه جسمه ليك: بيحاول يشد انتباهك أو يعبرلك عن حبه

اختيار لعبة مناسبة

• الألعاب المطاطية بفتحات لـ(Treats) بتشغله يحركها عشان ياكل اللي جواها
• اهتم بتغيير الـTreats مرة كل أسبوع عشان تتجنب تعفنها والبكتيريا بسبب لعاب الكلب
• الكرة المطاطية أو التنس لأن معظم الكلاب بتحب لعب الجري والبحث لكن مهم تكون حجمها مناسب لفكه
• اتأكد إنها مصنوعة من مادة متينة عشان ما يقطعهاش لقطع صغيرة ويمضغها
• الدمية المحشية بالقطن لأنها مريحة وبتحسسه بالاسترخاء