المحتويات
شفاط مطبخ قوي أصبح هو الأساس في طرد أي روائح دخان أو أبخرة متراكمة في المطبخ ممكن تسبب رائحة غير محببة لأغلب الناس، وتراكم الدخان ممكن يسبب أحيانًا تلف أخشاب المطبخ وبالتالي بتزيد أهمية شفاط المطبخ اللي لازم تختار نوع جودته عالية وقادر على امتصاص أكبر قدر ممكن من الدخان بأقل صوت ممكن.
مكونات شفاط المطبخ
- بيحتوي على لوحة كبيرة لتجميع الهواء المليان بالروائح والدخان والحرارة واللي بتحصل نتيجة الطبخ
- أو مروحة كبيرة بتشفط الهواء المحمّل بالحرارة داخل المطبخ عشان يدخل في الشفاط
- بعض أنواع الشفاطات مش بتطرد الهواء خارج البيت ولكنّها بتدخّله على فلاتر معيْنة وبتوزّعه تاني داخل المطبخ وبالتالي إعادة تدوير الهواء داخل المطبخ
- وبالتالي بتنقسم شفاطات المطبخ لنوع بيحتوي على أنبوب بيطرد الهواء للخارج ونوع تاني خالي من الأنبوب ولكنّه بيحتوي على فلاتر لتنقية الهواء
الشفاط المدمج والهرمي
- هو شفاط عبارة عن لوحة مسطّحة فوق البوتجاز مباشرة
- منها أنواع بتطلب أنابيب لطرد الهواء للخارج وبالتالي مش بتحتاج تغيير فلاتر داخلية عكس النوع الخالي من الأنابيب اللي بيعيد تدوير الهواء مرة تانية واللي بيحتاج تغيير الفلاتر باستمرار لأنها بتتلوث باستمرار
- ممكن تركّب الشفاط المدمج داخل دولاب المطبخ اللي فوق البوتجاز أو تحت دولاب المطبخ مباشرة
- أما الشفاط الهرمي فهو على شكل الهرم وسواء كان مزوّد بأنبوب أو لأ فهو مناسب للمطابخ الواسعة لأنه متّصل بالسقف مباشرة
عوامل اختيار شفاط مناسب
- ضروري تعرف CFM الخاص بالشفاط اللي هتشتريه وهو قوة الشفط بالقدم المكعب في الدقيقة وبالتالي زيادة الرقم معناها قوة أعلى للشفاط
- اختار شفاط بيحتوي على سرعات مختلفة عشان تتحكم فيه حسب عدد الأشياء اللي بتطبخها خصوصًا لو بتطبخ حاجات كتير في نفس الوقت
- بعض المستخدمين بيفضّلوا الأنواع اللي فيها سرعتين فقط ولكن ده مناسب أكتر لو بتطبخ كميات بسيطة تكفّي شخصين أو تلاتة
- اختار شفاط مصنوع من مادة مقاومة للصدأ عشان تقلل فرص تراكم الصدأ عليه اللي ممكن يأثر على جودة الشفاط ويقلل الشكل الجذّاب لديكور مطبخك
- أغلب الشفاطات ليها صوت لكن ضروري تتأكد إن الشفاط اللي هتشتريه يبقى صوته ضعيف قدر المستطاع
- وحدة قياس الصوت اسمه Sone عشان كده ضروري تسأل عن مدى قوة الصوت اللي بينتج عن عمل الشفاط
- مثلًا لو اكتشفت إن قوّته (Sone 2) يبقى الشفاط صوته مريح وضعيف أما لو قوّته (Sone 4) اعرف إنه من الأنواع اللي بتسبب صوت عالي
- اسأل الأشخاص اللي تعرفهم عن نوع الشفاط اللي بيستخدموه عشان تحدد أكتر نوع مناسب ليك
- ابحث عن اسم العلامة التجارية المصنّعة للنوع ده واقرأ تقييمات المستخدمين على الشفاط قبل شرائه
تنضيف شفاط المطبخ
الفلتر
- المصنوع من القماش غير قابل للتنضيف وبيتم تغييره كل 3 شهور لكن المصنوع من الكربون اغسله بمياه سخنة وسيبه لحد ما ينشف كويس والأفضل تغيره كل 6 شهور أو سنة
الشفاط المعدني
- مصنوع من الأستانليس ستيل
- فك الفلتر من الشفاط ثم رشه بمذيب الدهون الكيميائي أو خليط من بيكربونات الصوديوم والخل
- بعد 5 دقايق انقعه في مياه دافية وصابون أطباق لمدة 10 دقايق وبعدها استخدم إسفنجة وافركه كويس لحد ما تتخلص من الدهون والبقع وممكن تحطه في غسالة الأطباق
المروحة
- مهم تنضف المروحة مرة كل سنة على الأقل عشان تتخلص من الدهون اللي بتسبب ضعف في أدائها ولتخفيف الضغط الزائد على المحرك
- انقع المروحة في مياه دافية وصابون أطباق وخل لمدة 15 دقيقة
- استخدم فرشة أسنان قديمة.. افرك أجزاء المروحة لحد ما تتخلص من الأوساخ والدهون
جسم الشفاط الخارجي
- اخلط كمية من بيكربونات الصوديوم أو النشادر مع مياه واستخدم فوطة أو إسفنجة عشان تتخلص من الدهون والأوساخ
- مهم تتأكد من عدم انسداد فتحات التهوية عشان تتجنب احتراق المحرك وبيتم تنضيفه من خلال متخصص الصيانة
أسعار شفاط المطبخ
- الشفاط العادي مقاس 20 سم بيتراوح سعره بين 250 جنيه لـ 400 جنيه
- شفاط مقاس 60×70 سعره بيتراوح بين 1200 جنيه لـ 1550 جنيه
- الشفاط المسطح مقاس 60 سم سعره بيتراوح بين 1100 جنيه لـ 2200 جنيه لكن لو مقاس 90 سم سعره بيتراوح بين 1500 جنيه لـ 7300 جنيه
- الأسعار بتختلف حسب نوع العلامة التجارية ومدة الضمان وعوامل تانية
