ديب فريزر متعدد الأدراج وسعة تخزينه عالية هو الاختيار الأمثل لو بتبحث عن فريزر، خصوصًا لو بتحب تخزّن الأكل من السنة للسنة أو بتحتفظ بالأكل مجمّد بعد طبخه لفترات طويلة قبل إعادة تسخينه، بس عشان تتأكد من سلامة أكلك قبل تناوله لازم تختار علامة تجارية معروفة وأشخاص تعرفهم استخدموها قبلك.
نصائح قبل شراء ديب فريزر جديد
- ضروري تحدد المكان اللي هتحط فيه الديب فريزر واعرف مقاساته عشان تشتري ديب فريزر مناسب للمكان وسهل الدخول من باب بيتك
- حدد هدفك من الشراء سواء كان تخزين أكبر قدر ممكن من الأكل سواء لحوم أو خضروات وفواكه وبالتالي هتحتاج سعة تخزين كبيرة
- ولا هتحتاج ديب فريزر مكمّل لفريزر التلاجة لتخزين بعض الضروريات مش لكميات كبيرة من الأكل
- اختار فريزر تقدر تتحكم في درجة حرارته وبيتمتع بخاصية ذوبان التلج التلقائي وفيه خاصية الإضاءة الداخلية عند فتح أو غلق باب الفريزر
- بلاش تشتري فريزر رخيص جدًا لأن الأنواع الرخيصة بتتلف بسرعة وهتزيد خسارتك المادية وقت تصليحها
- اسأل الشخص اللي بتشتري منّه إذا كان الفريزر بيتمتع بخاصية توفير الطاقة ولا لأ
- اعرف إن فيه نوعين الأول بفاتحة علوية (مشابه لفريزر الآيس كريم في السوبر ماركت)
- بيحتوي على سعة أكبر لتخزين الطعام ولكن صعب الوصول إليه وبتحتاج مدة طويلة للوصول للشيء اللي محتاجه
- بياخد مساحة كبيرة من الأرضية المسطحة ولكن البعض بيفضلها لأن سعرها أقل وبتوفّر أكتر في الطاقة لأن إذابة التلج فيها بتحصل بشكل يدوي
- أما الديب فريزر بفتحة أمامية بيحتوي على أدراج بتقدر تخزّن فيها الأكل براحتك وتوصلّه بسهولة بس ممكن تبقى سعتها أضيق من الفريزر بالفتحة العلوية
- اختار الديب فريزر المناسب لإمكانياتك المادية وقبلها اسأل أشخاص تعرفهم عندهم ديب فريزر عن النوع الأفضل من وجهة نظرهم
- لو ماتعرفش حد عنده ديب فريزر راجع تعليقات العملاء على الصفحة الرسمية للعلامة التجارية اللي حابب تشتري منها
- ضروري تهتم بوجود قفل ومفتاح للفريزر اللي هتشتريه لو عندك أطفال لأنه من الأجهزة المغرية للعب بالنسبة لهم خصوصًا لو بيحتوي على أدراج كتير
- النوع المزوّد بفتحة علوية ممكن يبقى سبب لمشكلة كبيرة لو حاول الأطفال الاختباء فيه أثناء اللعب
الحفاظ عليه لأطول فترة
- افصل عنّه الكهرباء كل 3 شهور ونضّفه كويس من الداخل والخارج
- ركّز على فتحات التصريف والأجزاء الداخلية واحتفظ بالأكل في أيس بوكس لو مش متجمد كفاية
- نضف ضهر الفريزر بالمكنسة لتقليل تراكم التراب عليه
- افتحه واقفله لما تحتاج حاجة مش طول الوقت والخبراء بينصحوا إنك لازم تخزن فيه حاجات كتير عشان تضمن إنه هيشتغل بأعلى كفاءة لكن مهم تنظّم الأدراج الداخلية وبلاش تكدّسها زيادة عن اللزوم
- اتأكد من سلامة الجزء المطاطي في الباب لمنع أي تسريب وغيّره كل سنتين أو عند الحاجة وخليه على مسافة مناسبة من الحائط وبلاش تخليه ملتصق بيه واختار مكان مناسب له في بيتك وثبّته لأن تحريكه كتير بيزود فرص تلفه
