المحتويات
دراجة هوائية سهل السير بيها ومريحة وفي نفس الوقت مناسبة لطولك هي الاختيار المثالي لو بتفكر تشتري دراجة، لكن ضروري تعرف الفرق بين أنواعها قبل الشراء وتفهم تأثيرها على صحتك.
اختيار دراجة هوائية مناسبة
دراجات الطريق
- إطاراتها نحيفة وقاعدة العجلات قصيرة
- مرنة وخفيفة وبتحتاج للياقة بدنية عالية
- تقدر تقطع مسافات طويلة على سرعة عالية
- بتستخدم في البطولات الرسمية والمهرجانات وفيها خاصية الأيروديناميك وهي إكساب الدراج مرونة وتوزيع أبعاد الجسم على العجلة وده بيقلل احتكاك الجسم مع الهوا وبيحسن الأداء
الدراجات الجبلية
- مصممة للطرق الوعرة والترابية
- كراسيها مريحة وسعرها أقل من دراجات الطريق
- عجلها عريض وفيها مقاومات للمطبات للتخفيف من تأثيرها
- الجادون طولي عشان الدراج يرتاح أكتر
- غير مناسبة لقطع المسافات الطويلة على الأسفلت
دراجات هجينة (Hybrid Bikes)
- خليط من دراجة الطريق والدراجة الجبلية
- جادونها مريح وإطاراتها عريضة بس أقل من إطارات الدراجة الجبلية
- مش بتستخدم في قطع المسافات الطويلة أو السرعات العالية ولكنها مناسبة للتمارين والتنزه فقط
دراجات الترحال
- مصممة للسفر مسافات طويلة والرحلات والتخييم
- فيها حوامل أمامية وخلفية لحمل الحقائب وبتتحمل الطرق الخشنة
دراجات الـ (Fat Bike)
- مخصصة للسير بمثالية على الرمل والتلج
الدراجة القابلة للطي
- صغيرة وهيكلها بسيط بجانب إنها سهلة التخزين والحمل وممكن تستخدمها عشان تروح الشغل
نصائح قبل الشراء
- حدد ميزانيتك عشان تعرف تشتري العجلة المناسبة فالأسعار بتبدأ من ألف لـ 50 ألف جنيه حسب النوع واحتياجك الشخصي
- حدد الهدف منها بناء على أنواع الدراجات المختلفة والأفضل تسأل شخص تعرفه متخصص وعنده هواية ركوب العجل
- مواقع كتير تقدر تحدد منها المقاس المناسب ليك ومنها موقع ebicycles
طريقة التدريب على ركوبها
- اختار مكان بعيد عن العربيات وتكون الأرض مستوية فيه
- ابعد عن التدريب على الرصيف عشان سلامتك الشخصية وسلامة المارة
- البس الخوذة وأدوات الحماية لكوعك وركبتك
- اتدرب بالنهار عشان تبقى الرؤية أوضح واختار الوقت اللي الشمس فيه هادية
- اظبط الكرسي وخلي رجليك لامسة الأرض عشان تلحق نفسك لو اختل توازنك
- اختبر الفرامل قبل ما تركبها ومشيها بإيدك وجرب توقفها بالفرامل
- حاول توزن نفسك وسط الدراجة وخلي رجل واحدة ثابتة على الأرض
- امشي بيها بسرعة بسيطة ورجليك على الأرض وبعد شوية ارفعها على البدال لثواني ونزلها
- حافظ على توازنك لأطول فترة ولو حسيت إنك هتقع استخدم الفرامل بالراحة ونزل رجليك الاتنين على الأرض
- خلي عينك على الطريق قدامك وسيب الدراجة تتحرك وحاول تحافظ على توازنك معاها
- ماتوجهش الدراجة بحركة مفاجئة يمين أو شمال وهي بتلف لأنها بنسبة كبيرة هتتقلب بيك
- أول ما تثبت توازنك لمدة عليها خلي رجليك الاتنين على البدال وزود سرعتك بالتدريج
- ماتبالغش في السرعة عشان ممكن تقلل سيطرتك عليها
- الأفضل توقفها بالفرامل مش برجليك وماتدوسش عليها مرة واحدة
- خلي إيدك على الفرامل دايمًا لو الأرض منحدرة وسيبها تمشي لوحدها
- ماتستخدمش السماعات عشان تسمع تنبيهات الناس ليك
طريقة تنضيف دراجة هوائية
- املا وعاء مياه عليه نقطتين صابون ومررها على كل أجزاء العجلة
- اظبط الجنزير الأمامي على أعلى سرعة والجنزير الخلفي على أقل سرعة عشان تضمن وصول المياه لأضيق الأماكن
- استخدم مزيل الشحوم بكمية مناسبة عشان تقلل تراكمها وابعده عن الفرامل
- حط كمية بسيطة منه على قطعة قماش جافة ونضّف بيها أسلاك العجلة
- اخلط كوباية بيكنج صودا وكوباية مياه وادهن المعجون بفرشة الرسم على الأجزاء المعدنية في العجلة
- سيب المعجون لمدة 15 دقيقة وبعدها ادعك المعجون بسلك التنضيف الناعم
- هتشيل كل آثار الصدأ خصوصًا لو متراكم بكمية كبيرة
- نضّف تروس العجلة برفق عشان تقلل فرص تلفها وقلل تدفق المياه من الخرطوم أثناء غسيل العجلة بالمياه
- املا زجاجة بخاخ بالخل ورش منها على أماكن البقع أو الصدأ صعبة الإزالة وادعكها بفرشة تنضيف كبيرة أو صغيرة حسب حجم البقعة
- جفف العجلة كويس بعد تنضيفها بقطعة قماش نضيفة
