المحتويات
ترجمة جوجل حل أمثل وسريع لناس كتير عايزين يترجموا كلمات او جمل بلغات مختلفة عن لغاتهم الاصلية، ولكن أحيانًا ممكن ترجمة جوجل تبعدك عن المعنى الأساسي وبالتالي ضروري تعرف طريقة استخدام ترجمة جوجل بالشكل الأمثل عشان تحقق أكبر استفادة منّه.
تعريف ترجمة جوجل
- هي خدمة من شركة جوجل لترجمة المفردات والجمل والنصوص من لغة للتانية بسرعة
- بتترجم من خلالها أكتر من 150 لغة عالمية سواء منها أو إليها
- بتعتمد بشكل أساسي على الذكاء الاصطناعي وبالتالي ضروري تستخدمها بحذر
- ممكن تفهم منها معنى كلمات أو بعض تراكيب الجمل لكن صعب تعتمد عليها في الأبحاث العلمية والمقالات الأكاديمية
- خصوصًا لو بتبحث عن مصطلح باللغة العامية لأنها بتترجم الكلام من اللغة الأصلية
- بتترجم الكلمة في أسرع وقت وبتوفّر وقت البحث في قاموس معيّن لمعرفة معنى الكلمة
عيوب ترجمة جوجل
- صعب تعتمد عليها لإتمام عملية ترجمة مهنية دقيقة لأنها في الأساس بتوفرلك معاني الكلمات وبعض التراكيب مش بتقدم ترجمة احترافية
- مش بتوفّر ترابط بين النص لأنها بتترجم الكلمات ترجمة حرفية وبالتالي صعب تفهم النص ككل لو عملتله نسخ/ Copy وقرأته مرة واحدة
- صعب الاعتماد عليها لصناعة محتوى تسويقي أو إبداعي موجه لشعوب بتستخدم لغات مختلفة لأنها بتفتقد للمنطق والصياغة الاحترافية المناسبة
- ممكن تستخدمه فقط لفهم بعض الكلمات ومحاولة فهم السياق بعد ترجمة الكلمات منفصلة عن بعضها
- خوارزميات ترجمة جوجل بتعتمد بشكل كبير على ترجمة الأشخاص للكلمات وبالتالي بتقل أحيانًا الدقة وبتوفر بعض المعاني ممكن تبقى غير دقيقة
- بعض الاختلافات الثقافية بتفسر المصطلحات والكلمات بطريقة مختلفة وبالتالي الترجمة عن طريق جوجل مش بتساعدك تفهم النص بعمق خصوصًا لو بتترجم جمل من محادثة أو نص أدبي
- وبالتالي دور المترجم المحترف ضروري ولا غنى عنّه رغم أهمية ترجمة جوجل في حياتنا اليومية
ترجمة صفحة ويب باستخدام ترجمة جوجل
- اعمل نسخ/ Copy لرابط الصفحة اللي عايز تترجم محتواها وبعدها افتح رابط Google Translate
- اعمل لصق/Paste لرابط الصفحة في صندوق اللغة اللي هتترجم منها
- حدد اللغات اللي هتترجم منها أو إليها وبعدها اضغط على الرابط في الصندوق الخاص باللغة اللي اختارتها
الترجمة باستخدام الكاميرا
- افتح تطبيق جوجل على تليفونك واختار الكاميرا عشان تتفتح الكاميرا كأنك هتصور
- اختار من تحت translate أو ترجمة
- مرر الكاميرا على أي نص عايز تترجمه واضغط على العلامة الدائرية أسفل الشاشة
- هتظهر أعلى الشاشة قائمة مستطيلة صغيرة اختار منها اللغة اللي عايز تترجم منها وإليها
- تقدر من خلالها تترجم أي نص شفته مكتوب في لوحة أو كتاب وبتوفر مجهود إنك تكتبه وتنقله
خطوات الحصول على أدق نتيجة
- خلي استخدامك لترجمة جوجل في حالات الكلمات البسيطة وبلاش تترجم عليها مصطلح فيه أكتر من كلمة
- بلاش تكتب عليه نص طويل وتطلب منه ترجمته والأحسن تنمي قدرتك على بناء جملة باستخدام اللغة اللي عايز تترجم إليها
- اعتمد عليه للتدقيق الإملائي لأن من أهم خواصه هو التدقيق اللغوي في كتابة الحروف خصوصًا لو بتكتب باللغة الأصلية مش العامية
- ركّز في معاني الكلمات التانية المكتوبة لأنك ممكن تلاقي المعنى المناسب لسياق الكلام فيها تحت وبلاش تعتمد فقط على الكلمة الأصلية
- استخدام الميكروفون لازم يبقى في أضيق الحدود ومبني على نطق دقيق للكلمة اللي عايز تعرف معناها
- وبالتالي بلاش تستخدمه لو مش عارف النطق الصحيح واعتمد عليه لو قاعد مع شخص بيتكلم بلغة مختلفة عنّك وعايز تفهمه صح
- مواقع كتير تقدر تعتمد عليها عشان توصل لنتيجة دقيقة في الترجمة هتساعدك توصل لأدق معنى وهتشجعك تنمي مهارتك فيها
