معلومات عن كلية التجارة جامعة القاهرة وأقسامها ونظام الدراسة

كلية التجارة جامعة القاهرة بتنفرد بوجود برامج تعليمية متميزة سواء في مراحل البكالوريوس أو الدراسات العليا، وبعض برامجها بتتعاون مع جامعات خارج مصر زي جامعة ولاية جورجيا وجامعة سيتي وجامعة كنت في بريطانيا، وبالتالي ضروري تعرف أقسامها ومصاريفها وطبيعة الدراسة في كل قسم.

البرامج الدراسية في الكلية

برنامج الدراسة باللغة العربية 

• بيضم 3 أقسام وهم المحاسبة وإدارة الأعمال والرياضة والتأمين
• قسم المحاسبة بيسعى لزيادة معرفة الطالب بالمجال المالي والمحاسبة وتعميق البحث العلمي فيها
• أما قسم إدارة الأعمال بيقدم المعلومات اللي يقدر الطالب يشتغل بيها في المناصب الإدارية داخل المؤسسات الكبيرة
• ويقدر الخريج البدء في تأسيس شركته الخاصة أو إدارة مشروع بنفسه بجانب الدخول في مجالات تانية زي التخطيط والتسويق والموارد البشرية
• قسم الرياضة والتأمين مخصص للمهتمين بدراسة الإحصائيات التطبيقية والرياضيات المتخصصة في مجال التأمين
• وبيجهّز أغلب الخريجين للعمل في جهاز التعبئة والإحصاء
• التخصص في السنة التالتة قبل التخرج في القسم العربي
• وفي السنة الرابعة بتختار تخصص فرعي من كل تخصص من التخصصات الـ 3
• في قسم المحاسبة يقدر الطالب يختار من (محاسبة التكاليف أو المحاسبة المالية أو محاسبة الاستثمار والتمويل)
• أما في قسم إدارة الأعمال متاح للطالب دراسة (إدارة الأعمال أو إدارة التمويل والاستثمار أو إدارة التسويق أو إدارة الموارد البشرية أو إدارة المؤسسات الخدمية أو الإدارة الدولية)
• ولكن في قسم الرياضة والتأمين متاح 3 تخصصات فرعية وهم (التأمين أو إدارة أخطار المؤسسات المالية أو العلوم الاكتوارية)

الدراسة باللغة الإنجليزية 

• بتنقسم لبرنامج الدراسة بشعبة اللغة الإنجليزية بكلية التجارة جامعة القاهرة
• الأقسام باللغة الإنجليزية هي Business Adminstration و Accounting وFinance (إدارة أعمال ومحاسبة واقتصاد)
• الالتحاق بيها على حسب المجموع الاعتباري وهو (المجموع الكلي + درجة اللغة الإنجليزية في الثانوية العامة)
• بيتغير المجموع كل سنة حسب طبيعة التنسيق والحد الأدنى للقبول فيها من مختلف الشعب الدراسية سواء أدبي أو علمي علوم أو علمي تجارة
• امتحانات الفصول الدراسية كلها بنظام البابل شيت وبتتصحح إلكترونيًا بدون أي تدخل بشري
• بيدرس الطالب على مدار الـ 4 سنوات مواد مختلفة زي الـ Accounting ( المحاسبة) والقانون التجاري (Business Law) ورياضيات 1 ورياضيات 2 والتفكير النقدي
• نظام الدراسة في قسم اللغة الإنجليزية بنظام الساعات المعتمدة

برنامج جورجيا الدراسي في كلية تجارة جامعة القاهرة 

• هو برنامج بمصاريف إضافية تابع لجامعة القاهرة بالتعاون مع جامعة ولاية جورجيا
• منهج المستوى الأول والتاني (سنة أولى وتانية) مطابق لمنهج كلية تجارة إنجليزي جامعة القاهرة أما منهج سنة تالتة ورابعة نفس منهج اللي بيدرس في جامعة ولاية جورجيا
• بيحصل الخريج على شهادتين معتمدتين من جامعة القاهرة وجامعة جورجيا
• التخصصات هي اقتصاد/ Finance ومحاسبة/Accounting  وتسويق/ Marketing

البرنامج المخصص لدراسة العلوم الاكتوارية 

• مخصص في دراسة علم الإحصائيات وحسابات التأمين
• وبيعتمد على دراسة الرياضيات للوصول لمعادلات تقيم نسبة الخطر في المجالات وتحديدًا الصناعات المختلفة
• بيعد القسم الخريجين للتعيين كخبراء ائتمان في البنوك المختلفة
• لأنك مثلًا لو عايز تاخد قرض من البنك لإنشاء مؤسسة معينة لازم يدرسوا حالة الشركة دي ومدى قدرتها على سداد الديون
• الدراسة فيه باللغة الإنجليزية وبتدرس بعض المواد زي التفاضل والتكامل والاقتصاد والرياضيات والجبر والتسويق والإدارة والاقتصاد

المستندات المطلوبة للتقديم على كلية تجارة جامعة القاهرة 

• 10 صور مقاس 4X6 مكتوب عليهم اسم الطالب من الخلف
• ورقة الترشيح الأصل و10 صور منها
• صورة البطاقة الشخصية
• 10 صور من شهادة الميلاد المميكنة مع الأصل
• شهادة الثانوية العامة الأصل مع 10 صور منها

التقديم على برامج اللغة الإتجليزية وإكتواري

• ضروري تتابع موقع كلية تجارة جامعة القاهرة عشان تعرف مواعيد التقديم سواء أونلاين أو أوفلاين
• بتحضّر الأوراق وبتدخل على الرابط اللي هيتنشر على موقع الكلية في أقرب وقت
• بتدخل بعدها على رابط الخدمات الإلكترونية لجامعة القاهرة وبتختار طبيعة البرنامج اللي هتقدم فيه
• بتدفع المبلغ المطلوب (حوالي 400 لكل برنامج منهم باستثناء جورجيا اللي رسوم التقديم فيها 800 جنيه)  في أقرب فرع لفوري وبتستلم رقم بتدخله وقت التقديم
• ولازم تحتفظ بالأصل لأنك هتقدمه إذا كان التقديم في الكلية أو هتصوره وترفعه على الموقع لو التقديم أونلاين

المجموع الاعتباري 

• هو مجموع بيتحدد سنويًا حسب الحد الأدني للكلية من سنة للتانية وبيتضاف على المجموع درجة اللغة الإنجليزية
• في حالة كنت معفي من اللغة التانية ومجموعة من 370 بتضرب مجموعك في 410 والناتج بتقسمه على 370
• ناتج العملية دي بتضيف عليه درجتك في اللغة الإنجليزية
• ولو الإنجليزي هو لغتك الثانية مش الأولى بتضرب درجة الإنجليزي بتاعتك في 50 وبعدها بتقسم على 40
• وبعدها بتجمع الناتج على مجموع الثانوية العامة الخاص بيك (المجموع من 410 مش المجموع المئوي)

المصروفات الدراسية 

• لطلاب الشعبة الإنجليزية واكتواري حوالي 19 ألف جنيه في السنة الدراسية الواحدة مقسمين على قسطين
• أما طلاب جورجيا فالمصاريف وصلت لـ 40 ألف جنية في السنة الدراسية الواحدة