معدل السكر الطبيعي للبالغين والأطفال وطريقة اختيار جهاز قياسه

معدل السكر الطبيعي في جسم الإنسان بيتعرف عن طريق نسبة الجلوكوز في الدم اللي مهم تقيسها باستمرار عشان تكتشف من بدري لو كنت مصاب بالسكر، أو تعرف تسيطر على حالتك الصحية حسب مستوى السكر سواء كان عالي أو منخفض، ولو وصلتلك أي قراءة غير طبيعية لازم تستشير طبيب متخصص فورًا.

المعدل الطبيعي 

• بتختلف نسبة السكر في الدم سواء قبل الأكل في الصباح أو بعد الأكل من 60 لـ 90 دقيقة 
• بيتقاس بعدة مقاييس مختلفة أهمها مليجرام/  ديسيلتر 
• أقل من 200 مليجرام/  ديسيلتر يعتبر طبيعي أثناء الفحص العشوائي (في أي وقت خلال اليوم) تعتبر نسبة طبيعية 

أثناء الصيام 

• المقصود هنا الصيام عن الأكل لمدة مش أقل من 8 ساعات، وعادة بيتقاس سكر الصايم بعد الاستيقاظ مباشرة 
• الطبيعي لازم يكون أقل من 100 مليجرام/  ديسيلتر 
• النسبة من 100 لـ 125 مليجرام/  ديسيلتر  قبل الأكل (أثناء الصيام) يبقى بيزيد عندك خطر الإصابة بالسكر 
• القراءة فوق الـ 125 مليجرام/  ديسيلتر يبقى إنت مريض سكر ولازم تستشير طبيب متخصص فورًا 

بعد الأكل بساعتين 

• الطبيعي لازم يكون أقل من 140 مليجرام/  ديسيلتر 
• لو النتيجة من 140 لـ 199 مليجرام/  ديسيلتر يبقى إنت عندك بوادر الإصابة، ولازم تلتزم بنظام صحي صارم عشان تقلل الخطر 
• القراءة الأعلى من 200  مليجرام/  ديسيلتر يبقى إنت مريض سكر ولازم تستشير طبيب متخصص فورًا 

السكر الطبيعي عند الأطفال 

حديث الولادة لحد 6 سنين 

• قبل الأكل أقل من 150 مليجرام/ ديسيلتر
• بعد الأكل أقل من 190 مليجرام/ ديسيلتر 

من 6  لـ 12 سنة 

• قبل الأكل أقل من 140 مليجرام/ ديسيلتر
• بعد الأكل أقل من 180  مليجرام/ ديسيلتر

فوق الـ 12  لحد 18 سنة 

• قبل الأكل أقل من 125 مليجرام/ ديسيلتر
• بعد الأكل أقل من 140 مليجرام/  ديسيلتر 

السكر التراكمي

• هو قياس نسبة السكر في الدم خلال الـ 3 شهور السابقين لإجراء التحليل، سواء للتأكد إذا كان الشخص مصاب بالسكر ولا لأ 
• بيتسمى بالهيموجلوبين السكري، لأن الجلوكوز في الدم بيلتصق بكرات الدم الحمراء، وبالتالي بيبقى صعب على الجسم الاستفادة منّه وبيتراكم في مجرى الدم 
• كرات الدم الحمراء بتتراوح مدة فاعليتها من شهرين لـ 3 شهور، وبالتالي ده السبب اللي بيخلي التحليل يتعمل خلال المدة دي 
• النسبة الطبيعية من 4% لـ 5.6%، لكن لو أعلى من كده يبقى فيه فرص أعلى سواء للإصابة بالسكر أو حتى ظهور مضاعفاته الخطيرة 

أوقات قياس معدل السكر 

• قبل النوم 
• بعد الأكل بساعتين 
• قبل الإفطار مباشرة 
• وقت الاستعداد للقيادة لمسافة طويلة 
• لو حسيت بأعراض ارتفاع/ انخفاض السكر بصورة مفاجئة 

اختيار جهاز قياس السكر 

• اسأل الدكتور أو جهة التأمين على أفضل نوع لأن في أنواع كتير بأسعار متفاوتة
• اختار نوع سهل الاستخدام (له شاشة كبيرة تسهل القراية)
• لو عندك مشكلة في الرؤية في أنواع ناطقة
• ضروري يكون معاه شهادة ضمان أو خدمة ما بعد البيع لدى الموزع أو الشركة  
• يكون فيه ميزة تخزين المعلومات والقياسات تقدر تسترجعها لما تحتاج
• بيحتاج نوع شرايح متوفرة بسهولة 
• يكون سهل الاستخدام ونفس النوع متجرّب من شخص تعرفه 

أسباب خطأ قياس معدل السكر 

• ارتفاع درجة حرارة الجهازة بسبب تخزينه في مكان معرض لأشعة الشمس المباشرة 
• انتهاء صلاحية الأشرطة  أو تلفها
• قلة كمية الدم الموجودة على الشريط 
• تراكم الأوساخ على الإيدين أو مكان نزول الدم اللي بتحلل نتيجته على شريط الجهاز 
• فقر الدم وانخفاض نسبة السوايل فيه 
• تناول كمية كبيرة زيادة عن الطبيعي من السكريات والنشويات وقياس السكر قبل مرور ساعتين على تناول الوجبة 

خفض السكر بعد ارتفاع معدلاته

• اشرب مياه كتير حتى لو قل إحساس العطش
• استشير طبيبك فورًا لظبط كمية الدواء المناسبة سواء أقراص أو جرعة حقن الأنسولين
• قلل تناولك للسكريات والنشويات قدر المستطاع والتزم بنظام غذائي صحي
• حركتك الخفيفة بتساعد على تنشيط الدورة الدموية في جسمك

رفع السكر بعد انخفاض معدلاته

• استشير طبيب متخصص فورًا، وبيتكرر انخفاض السكر مع المرضى من النوع الأول
• اشرب مياه وتناول وجبة سكرية خفيفة بس تجنب الإفراط فيها
• تجنب القيادة أو القيام بأعمال بتحتاج تركيز عالي
• وقّف أي نشاط بدني قوي بتعمله فورًا وكرر قياس السكر كل 15 دقيقة