المحتويات
تقوية المناعة بتحتاج نظام غذائي متوازن ومشروبات صحية لمواجهة الأمراض المختلفة وحماية الجسم من نزلات البرد وإصابات الجهاز التنفسي.
مشروبات مختلفة لتقوية المناعة
مشروب التوم
- افرم فصين توم وسيبهم 10 دقايق
- اخلطهم مع معلقة صغيرة عسل ونص معلقة صغيرة كركم مع كوباية مياه دافية
- اشربهم بعد وجبة الفطار في بداية اليوم
مشروب تقوية المناعة ومضادات للأكسدة
- اضرب في الخلاط كوب سبانخ متقطعة مع كوب ونص حليب لوز
- ضيف كوب ونص من 3 أنواع فاكهة فيها مضادات أكسدة زي التوت والفراولة والبرتقال
- زود نص معلقة صغيرة جنزبيل فريش وعصير نص ليمونة
- لو الفاكهة فريش وغير مجمدة.. قلل حليب اللوز لكوباية واحدة
- ممكن تضيف مكعبات تلج
مشروب الجنزبيل وخل التفاح
- اخلط نص كوب مياه دافية مع معلقتين صغيرين عسل لحد ما يدوب
- زود نص معلقة صغيرة جنزبيل وخل تفاح وعصير ليمونة
- حط رشة بسيطة كركم وفلفل أسود عليهم.. الفلفل أسود ضروري لامتصاص الجسم للكركم والاستفادة بيه
- الكمية دي تعمل 4 جرعات
مشروب تقوية المناعة بالليمون
- اخلط 3 جزرات مع ليمونة متقشرة ومعلقة صغيرة جنزبيل
- ضيف نص معلقة صغيرة كركم مع كمية أقل من الفلفل الأسود
- زود المياه عشان توصل للكثافة اللي عايزها
مشروب تقوية المناعة بالبنجر
- اخلط حبة بنجر مع ليمونة متقشرة وشرايح تفاح
- زود المياه بناء على الكثافة اللي عايزها
مشروب الزنجبيل
- اضرب في الخلاط كوب مياه دافية مع معلقة كبيرة زنجبيل فريش
- ضيف معلقتين عصير ليمون مع معلقة صغيرة عسل
- يفضل شربه فريش.. ولو اتخزن يبقى مقفول كويس وليومين كأقصى وقت
مشروب الفاكهة
- اضرب في الخلاط شرايح تفاحة وبرتقالة وحبة كيوي وجزرة متوسطة
- زود حبة فراولة معلقة صغيرة خل تفاح
- ضيف نص كوب مياه وممكن تزود مكعبات تلج عشان يكون أشبه بالسموذي
