المحتويات
الفريك من الحبوب الكاملة بيحتوي على عدد كبير من العناصر الغذائية الضرورية للصحة وبتساعد في حماية الجسم من الأمراض، أهمها فيتامين ب 6 والكالسيوم والحديد والزنك والمغنسيوم والنحاس، مع الألياف ومضادات الأكسدة، عادة بيتم تقديمه ضمن وصفات الحمام المحشي والفراخ لكن في طرق مختلفة ممكن تاكله بها.
القيمة الغذائية في الفريك
الكوباية (182 جرام) فيها:
- 151 سعرة حرارية
- 34 جرام كربوهيدرات
- 6 جرام بروتين
- 8 جرام ألياف
- بين 6-8% من الاحتياج اليومي لفيتامين ب
- 55% من الاحتياج اليومي للمنجنيز
- 15% من الاحتياج اليومي للمغنيسيوم
- 10% من الاحتياج اليومي للحديد
فوائده الصحية
- بيحتوي على مواد مضادة للأكسدة زي اللوتين والزاكسانين، بتساهم في حماية العين وتقوية النظر
- غني بالألياف بتساعد على حماية الجهاز الهضمي من الإمساك، وكمان بيساعد في التخلص من السموم والفضلات الموجودة في الجسم
- الألياف ومضادات الأكسدة لها دور في حماية الجسم من السرطان خاصة سرطان القولون
- بيساهم في تنظيم نسبة السكر بالدم والحماية من الإصابة بمرض السكري، لأنه بيحتوي على مؤشر جلايسمي قليل
- بيحتوي على فيتامين ب المركب وفيتامين هـ، وهي من الفيتامينات اللي بتعمل على استرخاء العضلات وتعديل الحالة المزاجية
- بيساعد على تقليل نسبة الكوليسترول السئ في الدم والحفاظ على صحة القلب
- غني بالبوتاسيوم اللي بيساعد في الوقاية من النوبات والجلطات القلبية بسبب السيطرة على نسبة ضغط الدم المرتفع
- بيحتوي على بروتينات وألياف بتساهم في زيادة الشعور في الشبع لفترة أطول وبالتالي بيسهل خسارة الوزن
فوائده للأطفال
- بيسهل الهضم
- بيمد جسم الطفل بالطاقة والنشاط بسبب البروتين
- بيقوي العضلات
- بيساعد في نمو وتطور جسم الطفل بشكل سليم
- بيقوي الأسنان
وصفات مختلفة
فريك بالكبد والقوانص
المكونات
- كوبايتين فريك خشن
- ربع كيلو كبد وقوانص
- بصلة كبيرة مفرومة
- معلقة كبيرة خل
- ملح وفلفل أسود
- معلقة صغيرة كركم
- معلقة صغيرة بهارات
- 3 معالق كبار زيت
- كوباية شوربة فراخ
- ربع كوباية لوز
- ربع كوباية عين جمل
الطريقة
- نقي الفريك واغسله كويس جدا، وانقعه في مياه سخنة لمدة 15 دقيقة
- بعد ما تغسل الكبد والقوانص كويس.. قطعهم في حجم متوسط
- شوح البصلة في معلقتين زيت وضيف الملح والفلفل الأسود والكركم والبهارات وقلب لحد ما لونه يبقى دهبي
- ضيف الفريك وقلب لمدة 3 دقايق وضيف الشوربة وهدي النار وسيبه لحد ما يستوي
- في طاسة غويطة.. شوح الكبد والقوانص وتبلها بالملح والفلفل الأسود وكمل تقليب لحد ما تستوي
- حمر اللوز وعين الجمل في كمية صغيرة من الزيت أو الزبدة
- في طبق التقديم.. حط الفريك ووزع عليه الكبد والقوانص وزينهم باللوز وعين الجمل
شوربة الفريك
المكونات
- كوباية فريك
- 2 ثمرة طماطم مفرومة
- بصلة مفرومة
- 4 فصوص توم مفروم
- معلقتين كبار صلصة
- كوباية شوربة فراخ
- كوبايتين مياه
- عودين قرفة
- معلقتين كبار زيت
- معلقة صغيرة بهارات
- ملح وفلفل أسود
الطريقة
- اغسل الفريك كويس وانقعه في مياه سخنة لمدة ساعة
- شوح التوم والبصل في الزيت لحد ما يدبلوا، ضيف الصلصة والطماطم المفرومة وقلب لمدة 5 دقايق
- تبل بالملح والفلفل الأسود والبهارات والقرفة
- ضيف الفريك والشوربة والمياه وسيب الشوربة تغلي
- هدي النار وغطي الشوربة وسيبها لمدة 20 دقيقة
طاجن اللحمة
المكونات
- نص كيلو مكعبات لحمة مسلوقة
- بصلة كبيرة مبشورة
- كوباية عصير طماطم
- كوباية فريك
- 3 كوبايات مياه
- معلقتين كبار سمنة
- ملح وفلفل أسود
الطريقة
- اغسل الفريك كويس وانقعه في مياه سخنة لمدة ساعة
- تبل البصلة بالملح والفلفل الأسود
- ادهن الطاجن بمعلقة سمنة
- ضيف البصل وعصير الطماطم والفريك وتبله بالملح والفلفل الأسود
- حط نص مقدار الفريك في الطاجن وعليه اللحم المسلوق وبعد كده باقي الكمية
- وزع المياه المغلية على سطح الطاجن وباقي السمنة على السطح
- دخل الطاجن الفرن لمدة 45 دقيقة على درجة حرارة 200
