المحتويات
الفاصوليا الخضراء مصدر للألياف والفيتامينات والمعادن، وبتحمي الجسم من بعض الأمراض، سهلة الهضم وتقدر تحضرها بأكتر من طريقة بخطوات بسيطة.
فوايد الفاصوليا
- بتحتوي على فيتامين أ مع مضادات الأكسدة زي البيتا كاروتين واللوتين، بتلعب دور مهم في مقاومة الشيخوخة
- مصدر لحمض الفوليك وهو أحد العناصر المهمة في تكوين خلايا الـ DNA بتساعد في تكوين الجنين وحمايته من الإصابة بالتشوهات الخلقية
- غنية بفيتامين سي وب 6 وب1 وبتساعد في تقوية المناعة وحماية الجسم من العدوى بالأمراض
- بتحفز التمثيل الغذائي لأنها بتحتوي على نسبة كبيرة من الأملاح المعدنية المفيدة للجسم (زي الحديد والكالسيوم والمغنسيوم والمنجنيز والبوتاسيوم)
- مصدر غني بالألياف الطبيعية بتساعد في تنظيم عملية الهضم والوقاية من سرطان القولون وخفض نسبة الكوليسترول في الدم
- بتساهم في تقليل الوزن لأنها بتساعد على الشبع بسبب الألياف وسعراتها الحرارية قليلة
- بتحتوي علي مركب Zea-xanthin من مضادات الأكسدة اللي بيحافظ على سلامة العين وبيحميها من أضرار الأشعة فوق البنفسجية وأمراض الشيخوخة
- بتحتوي على فيتامين ك، اللي بيساعد في الحفاظ على بنية العظام وقوتها وحمايتها من الكسور والهشاشة
وصفات بالفاصوليا الخضراء
بالجبنة
المكونات
- نص كيلو فاصوليا خضراء
- فصين توم مفرومين
- نص كوباية كريمة
- معلقتين صغيرين قشر ليمون
- كوباية جبنة موتزاريلا
- نص كوباية جبنة شيدر مبشورة
- ملح وفلفل أسود (حسب الرغبة)
الطريقة
- وزع الفاصوليا في طاجن أو بايركس
- اخلط الكريمة مع التوم والملح والفلفل الأسود وقشر الليمون
- وزع الكريمة فوق الفاصوليا وعليها الجبنة الموتزاريلا والشيدر
- دخل الطاجن الفرن لمدة 30 دقيقة
السلطة اليوناني
المكونات
- ربع كيلو فاصوليا خضراء
- 4 معالق كبيرة جبنة فيتا
- ربع كوباية فلفل أحمر مفروم
- معلقة كبيرة بقدونس مفروم
- ربع كوباية قطع طماطم صغيرة
الدريسنج
- 3 معالق كبيرة زيت زيتون
- معلقة كبيرة خل
- فص توم مفروم
- ربع معلقة صغيرة زعتر مجفف
- ملح وفلفل أسود
- ربع معلقة صغيرة مسطردة
الطريقة
- اسلق الفاصوليا في مياه مع ربع معلقة بيكربونات الصوديوم لمدة 10 دقايق
- صفيها وحطها في بولة مياه ساقعة (عشان تحافظ على لونها الأخضر)
- اخلط زيت الزيتون مع الخل والتوم والمسطردة والزعتر وتبل بالملح والفلفل الأسود
- في بولة التقديم.. حط الفاصوليا مع الفلفل الأحمر والطماطم ووزع عليهم الجبنة الفيتا
- وزع الدريسنج على الوش
مع سمك الماكريل
المكونات
- ربع كيلو فاصوليا
- معلقة كبيرة زيت زيتون
- سمكة ماكريل مخلية
- ربع كوباية أوراق بقدونس
- معلقة صغيرة صوص حار
- عصير حبة ليمون
- معلقة صغيرة مسطردة
الطريقة
- اخلط زيت الزيتون وعصير الليمون والمسطردة والصوص الحار
- اسلق الفاصوليا لمدة 10 دقايق وقطعها بالحجم المفضل
- في بولة.. اخلطها مع السمك والبقدونس وضيف الدريسنج وممكن تزيينها بالشبت وشرايح الليمون
