علاج تساقط الشعر وأسبابه وطرق الوقاية منّه للرجال والسيدات

علاج تساقط الشعر عند الرجال والسيدات اللي بيعتبر من أكبر المشاكل اللي بتواجههم، سواء تساقطه على فترات متباعدة، أو باستمرار في شكل كتل كبيرة على المشط أو فرشة الشعر، لازم تحدد أسبابه عن طريق طبيب متخصص عشان تلتزم بالعلاج المناسب، وفي نفس الوقت ممكن تتبّع طرق طبيعية تخفف من حدة تساقطه. 

أنواع تساقط الشعر

• تساقط الشعر بيعاني منه حوالي 30% من الشباب والبنات 
• نوع التساقط بيتحدد حسب السبب أو مدى انتشاره 
• في بعض الأحيان تساقط الشعر بيكون مصاحب لمرض عضوي زي اضطرابات الغدة الدرقية أو كأثر جانبي لبعض الأدوية 
• لكن في أنواع التساقط بيكون هو المرض زي:

 التعلبة (ذكرية الشكل)

• حالة مرضية وراثية بتصيب الرجال والسيدات
• بتظهر في نهاية فترة المراهقة 
• بيحصل تراجع وانحسار تدريجي وترقق للشعر من المقدمة 

التعلبة البقعية

• بتظهر بقعة أو مساحة دائرية صغيرة خالية من الشعر في فروة الرأس 
• في أغلب الحالات بيرجع الشعر ينمو مرة تانية خلال 3 لـ6 شهور 
• بعض الحالات بينمو الشعر بلون أبيض وبتتكاثر البقع دي وممكن تنتشر في فروة الرأس كلها
•  سببها مرض مناعي بيهاجم بصيلات الشعر 

  صلع الشد 

• بيحصل بسبب الضفيرة أو الكعكة القوية أو ديل الحصان المشدود وبيجذب الشعر بقوة

هوس نتف أو قصف الشعر 

• عادة سيئة لاشعورية بيقوم الشخص بنتف أو تني أو قصف شعره أثناء القلق والتوتر

 تساقط بسبب سعفة الرأس

• سعفة الرأس مرض جلدي فطري بيأدي لظهور فراغات في فروة الرأس

تساقط الشعر الكربي

• بيدخل الشعر في مرحلة الراحة وهي المرحلة الأخيرة في عملية نمو الشعر
• بيتسبب في تساقط مؤقت للشعر وترققه لكنه مش بيأدي للصلع وبينمو شعر بديل خلال فترة قصيرة 
• بعض العوامل بتحفز سقوطه زي التوتر أو خسارة الوزن، والدايت، والحمل، والولادة، والعمليات الجراحية

أسباب تساقط الشعر 

• الدراسات بتقول إن أغلب أسباب تساقط الشعر وراثية بسبب جينات موروثة من الأب أو الأم
•  استخدام مستحضرات تجميل ضارة فيها مواد كيميائية خطيرة على الصحة
• زي صبغات الشعر، ومواد تفتيح اللون، ومواد تمليس الشعر 
• الإفراط في استخدامها بيزوّد فرص تلف الشعر وتقصّفه وسقوطه 
•  المشاكل الهرمونية زي اضطراب نشاط الغدة الدرقية، واضطرابات بتحصل بعد الحمل، والولادة، وقبل انقطاع الدورة الشهرية
• الدراسات بتأكد إن التوتر بيزوّد فرص تساقط الشعر وإن البعد عنّه أساس علاج تساقط الشعر

الأدوية المسببة لتساقط الشعر 

• مهم تقرأ النشرة الموجودة مع الدواء وتعرف آثاره الجانبية عشان تتأكد لو هيسبب تساقط الشعر ولا لأ
• أدوية علاج حب الشباب
• مضادات الالتهابات زي نابروكس (Naprox)، وإندوسين (Indocin)
• بعض أدوية علاج السرطان زي ميثوتريكسات (Methotrexate)
• أدوية علاج الاكتئاب زي نورتريبتيلين (Nortriptyline)، و بيرتوفراني (Pertofrane)، والليثيوم (Lithium)
• حبوب منع الحمل
• أدوية علاج قرح المعدة زي زانتاك (Zantac)، و بيبسيد (Pepcid)
• أغلب أدوية العلاج الكيميائي
• أدوية الضغط زي بلوكادرين (Blocarden)، وكورجارد (Corgard)

أعراض الصلع عند الرجال 

• تساقط كمية شعر كبيرة في شكل بقع بمناطق متفرقة في الرأس
•  بداية التساقط من مقدمة الشعر والجوانب 
• زيادة الإحساس بالألم والحكة أثناء التساقط 
•  ترقق وضعف الشعر فجأة
• احمرار فروة الرأس وزيادة بقع القشرة
• زيادة الإفرازات من فروة الرأس 
•  بقع صلع دائرية وغير مكتملة في الدقن والحاجبين 
• زيادة حب الشباب في فروة الرأس 

علامات تساقط الشعر عند السيدات 

• سقوط الشعر بكميات كبيرة على الوسادة عند الاستيقاظ
• ظهور الشعر في المشط أو الفرشة بكميات كبيرة
• ظهور علامات مشابهة لأعراض الصلع عند الرجال

المشاكل الصحية المرتبطة بتساقط الشعر

• سقوط الشعر من أماكن تانية في الجسم زي الحواجب أو الرموش أو تساقط شعر الرأس من مكان واحد بكميات كبيرة دليل على مرض الثعلبة 
•  لو بيصاحبه قلة الطاقة والشعور بالتعب يبقى سببه نقص العناصر الغذائية في أكلك زي الزنك، أو فيتامين ب، أو المغنيسيوم
• ارتباطه بآلام العضلات ممكن يبقى سببه خمول الغدة الدرقية
• بيزيد وقتها الإصابة بأعراض زي الحساسية تجاه البرد، والإمساك، وجفاف البشرة،وزيادة الوزن، وانتفاخ الوجه
•  ضعف وتكسر الأظافر مع تساقط الشعر في الغالب سببه نقص الحديد في الجسم
• بتحس أعراض زي التعب الشديد، وقلة التركيز، والصداع المستمر، وألم الصدر، وبرودة الأطراف
• أعراض زي طفح جلدي على الجسم أو الوجه ممكن يبقى سببه الإصابة بالذئبة
• الطفح الجلدي بيظهر ويختفي مع الوقت، وبيصاحبه أعراض زي جفاف العين، وآلام المفاصل، والإرهاق، وتحول أصابع الإيدين، والقدمين للون الأزرق أو الأبيض 
• ظهور الشعر الأبيض سببه التوتر الشديد، أو نقص مادة الميلانين المسؤولة عن تحديد لون الشعر بسبب نقص فيتامينات B6/ B12 والحديد
• ده بيفسر ضرورة تناول مكملات B12 وB6 لزيادة فرص علاج تساقط الشعر
• ضعف القدرة على نمو الشعر أحيانًا بيبقى سببه نقص البروتين في النظام الغذائي
• أو صعوبة امتصاص الجسم للبروتين والاستفادة بيه اللي بيسبب ضعف الشعر العام

طرق العلاج 

• عمليات ترميم الشعر لعلاج الصلع الظاهر بسبب الحروق
• زرع الشعر عن طريق أخذ شعر من مكان سليم وزرعه في منطقة الصلع
• تقليص فروة الرأس عن طريق عملية بيزيل فيها الأطباء منطقة الصلع، ووبيربطوا المناطق المحيطة بيها عن طريق الخياطة
• توسيع فروة الرأس عن طريق شد الأنسجة من خلال تركيب أجهزة تحت الجلد لمدة من 3 لـ 4 أسابيع عشان تنشّط الجلد اللي بيحمل الشعر

ملء فراغات الرأس 

•  اعمل مساج للمكان بكمية من زيت الروزماري يوميا قبل النوم
• ادعك المكان بكمية من زيت النعناع قبل النوم واستخدم شامبو الزيت من ضمن مكوناته
•  اعمل مساج للمكان بجل الصبار قبل الاستحمام وممكن تخلطه مع زيت جوز الهند أو جنين القمح
• خلي مدة المساج من 5 لـ 10 دقايق برفق لتنشيط الدورة الدموية وبصيلات الشعر
• استخدم في المساج زيت الجوجوبا خصوصًا قبل النوم لأنه بيخترق بصيلات الشعر وبيقويها من الداخل
• ابعد عن مصادر التوتر وانتظم على نظام غذائي صحي ومتوازن فيه أطعمة زي البيض، والسبانخ، والسلمون، واللحوم
• اتأكد من نسبة فيتامين د، والحديد، والفيريتين، فيتامين ب في الجسم
• استخدم منتجات الشعر اللي فيها مكون الـ(Licorice) لأنه بيحمي من تساقط الشعر
• تجنب تسريح شعرك وهو مبلل واستخدم مشط خشب سنونه واسعة
•  غسل الشعر بخل التفاح مفيد لتنضيف فروة الرأس وزيادة نموها

علاج تساقط الشعر عند السيدات بوصفات طبيعية 

• عصير البصل بيعزز الدورة الدموية لبصيلات الشعر ومضاد لالتهابات فروة الراس
• افرمي بصلة وصفي العصير منها واستخدمي عيدان القطن عشان تحطيه على فروة شعرك
• سيبيه نص ساعة واغسليه بمياه فاترة وشامبو
• افرمي معلقة كبيرة من الكركديه مع نص علبة زبادي، وسيبيه على شعرك ساعة واغسليه بشامبو
• اخلطي 2 بياض بيضة مع معلقتين صغيرين زيت زيتون ومعلقة صغيرة من العسل وحطيه على شعرك من الجذور للأطراف، وسيبيه ساعة واغسليه بمياه فاترة وشامبو
• حطي معلقتين زيت جوز الهند على شعرك المغسول بمياه وسيبيه ساعتين واغسليه 
• اعملي مساج  لفروة راسك بخمس قطرات زيت روزماري وجوجوبا وسيبيهم ساعة، أو بمعلقتين كبار زيت بذور القرع العسلي و5 قطرات زيت نعناع
• افرمي 3 فصوص توم مع زيت جوز هند سخن واعملي مساج لفروة راسك وسيبيه نص ساعة، واغسلي شعرك كويس بعدها لأن التوم ريحته بتثبت فيه
• تجنبي تسريح شعرك وهو مبلول وشده لورا في التسريحات المختلفة

نصايح للوقاية من الصلع عند الرجال

•  استخدم مشط أسنانه واسعة عشان تقلل فرص نتف الشعر
•  بلاش تستخدم الجل أو مستلزمات تثبيت الشعر لأنها بتزود فرص جفافه وسقوطه
•  استبدل المواد الكيميائية اللي بتستخدمها على شعرك بزيوت طبيعية
• دراسة يابانية بتقول إن تدليك الشعر برفق بينشط البصيلات وبيقلل فرص تساقط الشعر
• فرّق بين التدليك برفق وبين نتف الشعر اللي بيزود فرص الصلع
• بلاش تسرّح شعرك بعنف وبسرعة
• بلاش تصبغ شعرك بنفسك في البيت والأحسن تستعين بشخص متخصص
• نشّف شعرك كويس بعد الاستحمام، وقلل استخدامك للسشوار
• ابعد عن التوتر قدر المستطاع وركّز دايمًا في أفكار إيجابية
• حافظ على نظام غذائي صحي متوازن غني بالحديد والبروتين والأوميجا 3، واشرب مياه مش أقل من 3 لتر يوميًا
• اوقف التدخين فورًا وابعد عن أي مدخن ومارس رياضة باستمرار، لأن دراسة بتأكد إن الرياضة خصوصًا المشي بتحميك منه
• استشير طبيب متخصص فورًا لو لاحظت تساقط شعرك