طريقة عمل الكنافة بطرق مختلفة وخطوات سهلة

الكنافة من الحلويات الشرقية، وجزء من سفرة رمضان، بيتم إضافة الكريمة أو المكسرات والفواكه خاصة المانجا أو القشطة، و بتتقدم بأشكال كتير سواء ملفوفة أسطوانية أو مقطعة مربعات، هنقدم لك طريقة عمل الكنافة بطرق مختلفة سهلة ولذيذة.

طريقة عمل الكنافة السادة

المكونات

• نص كيلو كنافة
• معلقة صغيرة فانيليا
• مكسرات مجروشة (حسب الرغبة)
• كوباية سكر بودرة 
• نص كوباية سمنة 
• شربات

الطريقة

• فكك الكنافة كويس
• ضيف السكر البودرة والسمنة وافرك الكنافة كويس 
• وزع الكنافة في صينية مدهونة سمنة
• وزع المكسرات على السطح (وممكن تستغنى عنها) واضغط عليها كويس 
• دخل الكنافة في الفرن لمدة 20 دقيقة على درجة حرارة 180 درجة لحد ما يبقى لونها دهبي
• اسقي الكنافة بالشربات 

طريقة عمل الكنافة بالكريمة

المكونات

• نص كيلو كنافة 
• كوباية لبن 
• 5 معالق كبار سمنة 
• معلقتينن كبار نشا 
• معلقة كبيرة سكر
• كوباية مياه
• كوبايتين شربات

الطريقة

• ارفع اللبن مع السكر على النار وقلب لحد ما السكر يدوب
• دوب النشا مع المياه وضيفها لخليط اللبن
• قلب الخليط على نار هادية لحد ما يبقى سميك زي المهلبية 
• فكك الكنافة كويس وضيف عليها كمية السمنة بعد ما تسيحها 
• قسم الكنافة لجزئين ووزعها في صينية مدهونة بالسمنة 
• اضغط كويس على الكنافة وضيف عليها خليط النشا 
•  وزع عليها باقي كمية الكنافة واضغط كويس عشان تتأكد إن الكنافة غطت الكريمة خاصة الأطراف
• دخل الصينية الفرن لحد ما تحمر ووزع عليها الشربات 

طريقة عمل الكنافة بالنوتيلا والبندق

المكونات

• نص كيلو كنافة
• نص كوباية زبدة سايحة
• كوباية ونص شربات
• كوباية ونص نوتيلا 
• نص كوباية بندق مجروش

الطريقة

• في بولة كبيرة.. فكك الكنافة 
• سيح الزبدة وضيفها على الكنافة واتأكد إنها غلفت الكنافة بشكل كامل 
• قسم الكنافة لجزئين 
• ادهن صينيتين بنفس الحجم بالزبدة 
• افرد كل كمية كنافة في صينية واضغط عليها ببطن إيدك لحد ما سطحها يبقى متساوي
• دخل الكنافة الفرن لمدة 15 دقيقة لحد ما يبقى لونها دهبي 
• اسقي الكنافة بالشربات البارد 
• ادهن أول طبقة بالنوتيلا ووزع عليها البندق وحط عليها الطبقة التانية 
• اضغط بلطف عشان تتماسك 

طريقة عمل الكنافة العثمانلية بالكريمة

المكونات

• نص كيلو كنافة
• نص كوباية سمنة سايحة
• كوباية شربات
• 3 معالق كبار سكر
• نص كوباية زيت
• فسدق مطحون 
• كوباية لبن حليب
• معلقتين كبار نشا
• نص كوباية كريمة مخفوقة أو قشطة
• معلقتين كبار دقيق

الطريقة

• اخلط الدقيق والنشا مع اللبن والسكر كويس وارفعهم على نار هادية لمدة 10 دقايق 
• بعد ما الخليط يبقى قوامه سميك.. ضيف الكريمة أو القشطة وقلب كويس
• افرك الكنافة كويس ووزعها على صنيتين بنفس الحجم مدهونين سمنة واضغط كويس 
•  وزعهم على الصواني بالتساوي
•  اخلط السمنة والزيت على النار لحد ما يتدفوا 
• وزعهم على الكنافة بالتساوي ودخلها الفرن لمدة 15 – 20 دقيقة لحد ما يبقى لونها دهبي
• اقلب صينية الكنافة على طبق مسطح ووزع عليها كمية من الشربات 
• وزع الكريمة وحط الطبقة التانية من الكنافة ووزع عليها باقي كمية الشربات
• زينها بالفسدق

أصابع كنافة بالقشطة

المكونات

• نص كيلو كنافة شعر
• كوباية وربع سمنة سايحة
• علبتين قشطة
• شربات

الطريقة

• افرد كمية كنافة وادهنها بالسمنة 
• ضيف معلقة صغيرة قشطة ولفها في شكل رول واتني الأطراف لجوه 
• كرر الخطوتين مع باقي كمية الكنافة والقشطة 
• رص الرولز في صينية وادهنها بالسمنة 
• دخلها في الفرن لمدة 15 دقيقة واسقيها بالشربات 

طريقة عمل الكنافة بالتمر

المكونات

• نص كيلو كنافة
• كيلو تمر منزوع النواة
• نص كوباية زبدة
• معلقة صغيرة مياه ورد
• معلقتين كبار زيت
• ربع معلقة صغيرة قرفة
• نص كوباية مكسرات مجروشة
• شربات 

الطريقة

• اخلط التمر مع الزيت والقرفة ومياه الورد واعجنهم لحد ما يبقى شبه العجوة 
• سيح الزبدة وضيفها على الكنافة وفككها كويس 
• في صينية أو قالب مدهون زبدة.. حط نص كمية الكنافة واضغط كويس 
• وزع خليط التمر على الكنافة وضيف باقيتها 
• وزع معلقتين كبار زبدة على سطح الكنافة واضغط كويس 
• دخل الكنافة الفرن لمدة 15 دقيقة لحد ما تحمر 
• اقلبها على الوجه التاني ودخلها مرة تانية لحد ما تحمر 
• اسقيها بالشربات وزينها بالمكسرات