المحتويات
الكاتشب من أكتر الصوصات للي بتتقدم مع الوجبات السريعة زي البرجر والبطاطس المحمرة والفراخ المقلية وغيرها من الوجبات، ومكونه الرئيسي هو الطماطم، مع التوابل والخل والسكر، وممكن يضاف له نكهة حارة، وطريقة عمل الكاتشب رغم أنها بتاخد وقت إلا إنه أفضل وأمن أكتر لأنه خالي من المواد المصنعة والحافظة.
طريقة عمل الكاتشب
المكونات
- 7 ثمرات طماطم
- 6 فصوص توم مفروم
- بصلة صغيرة مبشورة ناعم
- ربع كوباية خل
- 4 معالق كبار سكر
- معلقة صغيرة ملح
- معلقتين كبار نشا
- ربع كوباية مياه
الطريقة
- اغسل الطماطم وبسكينة حادة اعمل حرف الأكس في قاعدتها
- حطها في مياه مغلية لمدة 5 دقايق وارفعها لمياه باردة أو متلجة لمدة دقيقتين
- الخطوة دي هتساعدك تتخلص بسهولة من القشرة
- اعصر الطماطم وصفيها كويس
- على نار متوسطة.. ارفع عصير الطماطم مع البصل والتوم لحد ما الخليط يغلي
- ضيف السكر والملح والخل وسيبه على نار هادية لمدة 5 دقايق
- دوب النشا في المياه وضيفها لخليط الطماطم بالتدريج مع التقليب المستمر
- كمل تقليب لحد ما يبقى خليط بقوام متماسك
- بعد ما الكاتشب بيبرد.. خزنه في زجاجة أو برطمان محكم الغلق في التلاجة لمدة 10 أيام
طريقة عمل الكاتشب بالصلصة
المكونات
- 5 معالق كبار صلصة طماطم
- معلقة صغيرة ونص نشا
- نص كوباية خل
- معلقة صغيرة ونص توم مهروس
- نص معلقة صغيرة دقيق
- معلقة صغيرة فلفل أسود
- عصير نص حبة ليمون
- معلقة كبيرة ملح
- 3 معالق كبار سكر
- معلقة صغيرة بودرة بصل
- ربع كوباية مياه
- معلقة صغيرة بودرة توم
الطريقة
- اخلط الدقيق والنشا مع المياه وقلب لحد ما يتجانسوا كويس
- اخلط الصلصة مع خليط النشا والدقيق والخل وباقي المكونات وقلبها كويس
- ارفع المكونات على نار متوسطة لحد ما تبدأ تغلي ويبقى قوامها متماسك
- بعد ما الكاتشاب يبرد.. خزنه في برطمان زجاجي محكم الغلق في التلاجة لمدة 10 أيام
طريقة عمل الكاتشب الحار
المكونات
- كيلو طماطم
- تلت أربع كوباية خل
- ربع معلقة كبيرة ملح
- تلت أربع كوباية سكر
- معلقة صغيرة نشا
- نص معلقة صغيرة بودة توم
- معلقة صغيرة بودرة بصل
- ربع معلقة صغيرة قرنفل مطحون
- معلقة صغيرة بابريكا
- ملعقة كبيرة شطة
الطريقة
- اعصر الطماطم مع كوباية مياه وصفيها كويس
- على نار متوسطة.. ارفع عصير الطماطم لحد ما تغلي
- ضيف الخل والسكر والملح والبابريكا والشطة وقلب كويس
- قلل النار.. وسيب خليط الكاتشب مع التقليب كل شوية لحد ما يتكاثف ويتخلص من المياه الزيادة
- دوب النشا مع معلقتين كبار مياه وضيفهم للكاتشب وقلب لحد ما يبقى قوامه متماسك
- سيب الكاتشب يغلي مع التقليب بين الحين والآخر، عشان تزداد كثافته ويتخلص من الماء الزائد
- ارفع الكاتشب من على النار وبعد ما يبرد.. خزنه في زجاجة أو برطمان محكم الغلق لمدة أسبوع
طريقة عمل كاتشب لايت
المكونات
- تلت أربع كوباية صلصة طماطم
- 3 معالق كبار خل تفاح
- معلقة كبيرة نشا
- كوباية مياه
- معلقة صغيرة ملح
- نص معلقة صغيرة بابريكا
- 3 معالق كبار سكر دايت
-
معلقة صغيرة بودرة توم
- نص معلقة صغيرة فلفل أسود
-
معلقة صغيرة بودرة بصل
الطريقة
- دوب النشا في المياه
- ارفع الصلصة وخليط النشا والخل على نار متوسطة
- ضيف التوم والبصل البودرة والبابريكا والملح والفلفل الأسود وقلب كويس
- بعد ما قوام الكاتشب يبقى متماسك.. ضيف سكر الدايت وقلب كويس
- ارفعه من على النار وسيبه يبرد وخزنه في برطمان محكم الغلق لمدة أسبوع
