المحتويات
طريقة عمل السجق بوصفات مختلفة مع إضافات بتضيف له نكهة لذيذة، بخطوات سهلة وسريعة، تقدر تحضره كطبق مقبلات على الغداء أو في ساندوتشات مع بطاطس محمرة، أو مع المكرونة وصلصلة الطماطم، ويعتبر طبق شهي مفضل للكبار والأطفال، وخاصة اللي بيفضلوا الوجبات السريعة.
طريقة عمل السجق الإسكندراني
المكونات
- كيلو سجق بلدي
- 3 بصلات بحجم متوسط
- 5 ثمرات فلفل أخضر
- 4 ثمرات طماطم
- معلقتين كبار زيت
- ملح وفلفل أسود
- معلقتين صغيرين صلصة طماطم
الطريقة
- قطع السجق بحجم متوسط وشوحه في الزيت لمدة 5 أو 10 دقايق لحد ما يبدأ يتحمر
- تبل بالملح والفلفل الأسود
- قطع البصل مكعبات صغيرة وضيفها للسجق، قطع الفلفل الأخضر والطماطم قطع صغيرة وضيفهم للسجق والبصل
- بعد 5 دقايق.. ضيف الصلصة وربع كوباية مياه وقلب الخليط كويس
- ممكن تضيف قرن فلفل أخضر حار
- سيب الخليط على النار لمدة 15 دقيقة على نار هادية
طريقة عمل فاهيتا السجق
المكونات
- نص كيلو سجق بلدي
- بصلة متوسطة الحجم
- 4 فصوص ثوم مفروم
- بهارات فاهيتا
- ملح وفلفل أسود
- رشة جوزة الطيب
- ثمرتين فلفل أخضر مقطع شرايح
- ثمرتين فلفل ألوان مقطع شرايح
- معلقة كبيرة زيت
الطريقة
- شوح السجق في الزيت لحد ما يتحمر
- ضيف التوم والبصل وقلب لمدة 5 دقايق، وبعد كدة ضيف الفلفل الأخضر والألوان
- قلب لمدة 5 دقايق.. وتبل بالملح والفلفل الأسود وبهارات الفاهيتا وجوزة الطيب
- هدي النار وسيب السجق يستوي لمدة 10 – 15 دقيقة
- قدمه مع البطاطس المحمرة
طريقة عمل السجق بالجبنة
المكونات
- نص كيلو سجق بلدي
- بصلة متوسطة مفرومة
- فصين توم مفرومين
- ثمرة فلفل أخضر مقطع شرائح
- ثمرة طماطم صغيرة مقطعة مكعبات
- كوباية جبنة موتزاريلا
- كوب جبنة شيدر مبشورة
- نص معلقة صغيرة بهارات
- ملح وفلفل أسود
- معلقتين كبار زيت
الطريقة
- على نار متوسطة، شوح السجق لمدة 5 دقايق لحد ما يتغير لونه
- ضيف البصل والتوم وقلب لمدة 5 دقايق أو لحد ما يدبلوا، وضيف الطماطم والفلفل الأخضر
- تبل بالملح والفلفل الأسود والبهارات، وقلب الخليط لمدة 5 دقايق
- في طاجن.. وزع نص كمية الجبن وعليهم خليط السجق وضيف باقي كمية الجبن
- دخل الطاجن الفرن لمدة 5 – 8 دقائق لحد ما الجبنة تسيح
طريقة عمل سجق بدبس الرمان
المكونات
- كيلو سجق
- 3 بصلات متوسطة مقطعة شرايح رفيعة
- معلقة كبيرة زيت زيتون
- ربع كوباية عصير ليمون
- معلقة صغيرة بهارات
- ملح وفلفل أسود
- معلقة صغيرة سماق
- معلقتين كبار دبس رمان
- معلقة كبيرة صنوبر محمص
- معلقة كبيرة حبات رمان
الطريقة
- شوح السجق في زيت الزيتون لمدة 5 دقايق
- ضيف البصل وعصير الليمون ودبس الرمان والسماق والملح والفلفل والبهارات
- قلب المكونات عشان تتجانس
- ضيف ربع كوباية مياه.. غطيه وسيبه على نار هادية لمدة 10 دقايق أو لحد ما السجق يستوي والصوص يبقى سميك
