المحتويات
البسبوسة من الحلويات الشرقية التقليدية، أصلها بيرجع للعصر العثماني، وفي مصر أضيف لها السميد وجوز الهند، قوامها طري ومميز وطعمها غني بالسكر والسمنة، عادة بتتقدم بالقشطة أو المكسرات زي البندق واللوز، لكن بنقدم لك طريقة عمل البسبوسة بنكهات مختلفة ولذيذة:
طريقة عمل البسبوسة التقليدية
المكونات
- كوباية وربع سميد
- نص كوباية سمنة
- نص كوباية سكر
- نص كوباية زبادي
- نص كوباية جوز هند
- معلقة صغيرة بيكنج بودر
- معلقة كبيرة سمنة (لتغطية الصينية)
للشربات
- كوباية سكر
- كوباية مياه
- عصير نص حبة ليمون
- معلقتين كبار عسل نحل
- نص معلقة صغيرة فانيليا
الطريقة
- اخلط السميد في بولة مع السكر وجوز الهند وبيكنج بودر
- سيح السمنة وضيفها على السميد وضيف الزبادي
- قلب كويس لحد ما تتجانس وتبقى عجينة طرية
- ممكن تخفف العجينة بكمية قليلة من اللبن لو احتاجت
- ادهن صينية بالسمنة ووزع عليها خليط البسبوسة ودخلها الفرن لمدة 15 -20 دقيقة لحد ما وشها يحمر
- اغلي السكر مع المياه والليمون والفانيليا لحد ما يبقى شربات وضيفه سخن عليها وسيبها تبرد
طريقة عمل البسبوسة بالكريمة
المكونات
- نص كوباية سكر
- نص كوباية زيت
- نص كوباية لبن حليب
- كوباية دقيق سميد
- معلقة صغيرة بيكنج بودر
- بشر قشر برتقالة
- جوز هند
الكريمة
- كوباية لبن حليب
- 3 معالق كبار سكر
- نص كوباية جوز هند
- 3 معالق كبيرة نشا
- بشر قشر برتقالة
الشربات
- كوباية سكر
- كوباية ونص مياه
- بشر قشر برتقالة
الطريقة
- اخلط مكونات الكريمة وقلبها كويس عشان النشا ميكلكعش
- ارفع الخليط على نار هادية وقلب باستمرار لحد ما يبقى تقيل
- حط السكر والمياه وقشر البرتقال على النار لحد ما السكر يدوب ويبقى شربات خفيف
- في الخلاط.. حط الزيت واللبن والسكر واضربهم كويس
- اخلط البيكنج بودر مع السميد
- ضيف خليط السكر مع السميد وقلب لحد ما يتجانس
- قسم العجين جزئين وافرد جزء في صينية مدهونة زبدة ودقيق سميد
- دخلها الفرن لحد ما تستوي وخرجها عشان تفرد الكريمة والباقي من العجين
- دخل الصينية في الفرن ويكون شغال من فوق بس
- بعد ما تستوي اسقيها بالشربات
طريقة عمل البسبوسة بالتمر
المكونات
- تلت أربع كوباية دقيق سميد
- كوباية زيت
- معلقة صغيرة فانيليا
- نص كوباية زبادي
- كوباية تمر من غير نواة
- لوز مقشر للتزيين
- شربات
الطريقة
- اضرب الزبادي والتمر والزيت في الخلاط كويس
- فرغ خليط الزبادي والتمر في بولة وضيف السميد
- ضيف الفانيليا وقلب لحد ما يبقى متجانس
- ادهن صينية بالزيت ورشة دقيق سميد وفرغ خليط البسبوسة وزينها باللوز
- دخلها الفرن على درجة حرارة 180 لمدة 20 دقيقة
- خرج الصينية لما وشها يحمر ووزع عليها الشربات السخن
طريقة عمل البسبوسة بالموتزاريلا
المكونات
- 3 كوبايات دقيق سميد
- تلت أربع كوباية سمنة سايحة
- كوباية و ½ زبادي
- كوباية إلا ربع سكر
- كوبايتين جبنة موتزاريلا
- معلقة صغيرة ونص بيكينج بودر
- معلقتين كبار جوزهند
- شربات
الطريقة
- اخلط دقيق السميد مع السكر وجوز الهند والبيكنج بودر
- ضيف الزبادي وقلب كويس عشان يتجانس الخليط
- افرد نص الخليط في صينية مدهونة بالسمنة
- افرد الجبنة الموتزاريلا وغطيها بباقي خليط السميد
- دخل البسبوسة الفرن على درجة حرارة 180 لحد ما تحمر
- اسقيها بالشربات السخن وقطعها
