المحتويات
الايس كريم من أكتر الحلويات المفضلة في فصل الصيف خاصة للأطفال، وناس كتير بتحب تعمله بنفسها في البيت بنكهات مميزة ومختلفة زي الفانيليا والشوكولاتة والفواكه المختلفة، بنقدملك طريقة عمل الأيس كريم بأنواعه المختلفة في البيت في خطوات سهلة وسريعة.
ايس كريم فانيليا
المكونات
- كوبايتين كريمة خفق مثلجة
- نص كوباية لبن
- كوبايتين لبن مكثف ومحلى
- كيس فانيليا بودرة
- معلقة صغيرة فانيليا سايلة
الطريقة
- اخلط الفانيليا باللبن وعلى نار متوسطة سيبه لحد ما يغلي
- ارفع الخليط من على النار وسيبه يهدى شوية وحطه في الفريزر لمدة 40 دقيقة
- حط الكريمة واللبن المكثف والفانيليا السايلة واللبن في طبق واضربهم بالمضرب لحد ما يبقى كريمي
- دخل الأيس كريم في الفريزر لمدة ماتقلش عن 4 ساعات
ايس كريم شوكولاتة
المكونات
- 200 جرام شوكولاتة غامقة
- كوباية لبن بودرة
- علبة كريمة
- كوباية لبن سايل
- نص كوباية سكر
- 4 معالق كبار بودرة كاكاو
- بيضتين
- مكسرات متنوعة
الطريقة
- اخلط اللبن والكريمة والكاكاو وقلبهم كويس لحد ما يبقى متجانس
- ضيف بيضتين للخليط واخفق كويس
- كسر الشوكولاتة قطع صغيرة وحطها في طبق وضيف عليها السكر والمكسرات
- اخلط المكونات مع خليط الكريمة
- فرغ الخليط في علبة وحطها في الفريزر
- سيبها مدة ماتقلش عن 6 ساعات
ايس كريم فراولة
المكونات
- كيلو فراولة
- كوباية سكر
- كيسين كريمة خفق
- كوباية وربع لبن
- علبة لبن مكثف
- كوباية مياه
الطريقة
- اخلط بودرة الكريم شانتي مع اللبن بالمضرب الكهربائي
- اضرب الفراولة مع مياه في الخلاط الكهربائي
- على النار.. اخلط كوبايتين عصير فراولة مع كوباية سكر وسيب الخليط لحد ما قوامه يتقل
- ضيف اللبن المكثف وباقي عصير الفراولة للكريم شانتيه
- حطه في علبة ودخله الفريزر
ايس كريم مانجو
المكونات
- 3 حبات مانجو
- كوباية ونص كريمة خفق
- معلقة كبيرة فانيليا
- نص كوباية سكر
الطريقة
- قشر المانجو وقطعها قطع صغيرة
- اهرسها مع ربع كوباية السكر بالبلندر
- اخفق الكريمة بالمضرب الكهربائي وضيف عليها باقي السكر
- ضيف خليط المانجو والفانيليا
- وزع الخليط في بولة بلاستيك ودخلها الفريزر لمدة 4 ساعات
- اضرب الخليط في الخلاط الكهربائي لحد ما يبقى مزيج ناعم
- حط الآيس كريم في البولة مرة تانية وحطها في الرف الأعلى للتلاجة
ايس كريم قهوة
المكونات
- كوباية ونص لبن حليب
- نص معلقة صغيرة فانيليا
- 4 معالق كبار سكر
- ربع معلقة صغيرة بن مطحون ناعم (سادة)
- كوباية ونص حبوب قهوة كاملة
- 5 صفار بيض
- كوباية ونص كريمة
الطريقة
- على نار متوسطة.. اخلط اللبن مع حبوب القهوة والسكر
- خلي الخليط يسخن وشيله قبل ما يغلي
- اخفق صفار البيض مع الفانيليا والقهوة المطحونة
- صفي خليط اللبن وضيف مقدار كوباية على صفار البيض عشان تعادل الحرارة
- ضيف خليط البيض على باقي خليط القهوة
- سيب الخليط على نار متوسطة لحد ما يبقى خليط سميك
- اخفق الكريمة وضيفها على خليط القهوة بعد ما يبرد
- وزعها في قالب سيلكون ودخله الفريزر لمدة 3 ساعات
ايس كريم كراميل
المكونات
- كوبايتين كريمة لباني
- علبتين كريم كراميل جاهز
- نص علبة لبن مكثف
- صوص كراميل جاهز
- مكسرات مجروشة
الطريقة
- اخلط الكريمة مع بودرة كريم كراميل واللبن المكثف بالمضرب الكهربائي
- ضيف صوص الكراميل
- وزع الخليط في بولة بلاستيك وعليها المكسرات
- دخل البولة في الفريزر لمدة 3 ساعات
زبادي توت
المكونات
- علبتين زبادي
- ربع كوباية مربى توت أحمر
- ربع كيلو توت أحمر
- كوباية كريمة خفق
- علبة لبن مكثف
الطريقة
- اغسل التوت وقطعه نصين
- اخلط اللبن المكثف مع الزبادي والكريمة والتوت والمربى
- وزعه في بولة بلاستيك ودخله الفريزر لمدة 4 ساعات
ايس كريم دايت
المكونات
- نص كوباية لبن خالي الدسم
- معلقة صغيرة فانيليا
- نص كوباية كريمة خفق خالية أو نص دسم
- معلقتين كبار سكر دايت أو عسل أبيض
- كوباية فاكهة متقطعة (موز/ فراولة/ توت/ مانجا)
الطريقة
- اخلط اللبن والكريمة والسكر أو العسل مع الفاكهة في الخلاط
- ممكن تستبدل الفاكهة بمعلقتين كبار كاكاو خام أو معلقة كبيرة نسكافيه
- فرغ الخليط في علبة بلاستيك ودخلها الفريزر 3 ساعات
