ضيق التنفس: أعراضه وأسبابه المرضية وطرق علاجه

ضيق التنفس هو الشعور بعدم الحصول على الهواء الكافي للرئة، أو بشيء تقيل على الصدر، الإنسان الطبيعي بيقوم بالشهيق والزفير 20 مرة في الدقيقة، وحوالي 30 ألف مرة في اليوم، وممكن نزلات البرد أو المجهود الشاق زي التمارين والجري وغيرها، تسبب تغير النمط الطبيعي، لكن ممكن ضيق التنفس المستمر لفترة يكون علامة تحذير لمشكلة صحية محتاجة علاج فوري.

أعراض ضيق التنفس

•  الشعور باللهاث وصعوبة التقاط النفس
• ضيق في صدر
• عدم القدرة على التنفس بعمق
• الإحساس بالاختناق

 ضيق التنفس المفاجئ ممكن يكون حاد، بيبدأ في خلال دقايق وممكن يستمر ساعات، وممكن يصاحبه حمى أو طفح جلدي أو كحة، وممكن يكون مزمن وده بيزيد مع أداء المهام اليومية، زي المشي من مكان لمكان أو الوقوف.

أحيانا بيتحسن ضيق التنفس أو بيزيد سوء مع تغيرات في أوضاع الجسم، زي الاستلقاء للأشخاص المصابين ببعض أمراض القلب والرئة

حالات بيكون فيها ضيق التنفس خطير

• بعد مجهود بسيط أو خلال الاستراحة
• عند الاستيقاظ من النوم في الليل
• لو لازم ترفع رأسك بالمخدات أثناء النوم  عشان تتجنب ضيق التنفس

حالات عادية

• بعد أي نشاط بدني زايد زي الجري
• مع التأثر زي الخوف الشديد المفاجيء والوقتي
• عند انسداد الأنف 

أسباب ضيق التنفس

ممكن يكون ضيق التنفس عرض لمرض أو  متعلق بالحالة النفسية أو بعض العادات اليومية 

أسباب مرضية لضيق التنفس 

• الإنفلونزا: لأنها بتسبب انسداد مجاري التنفس (انسداد الأنف/ التهاب الحلق) وبيأدي لتضرر عملية الشهيق والزفير 
• الربو: من أمراض الصدر اللي بتسبب ضيق وتضخم الرئتين وخاصة مع بذل مجهود بدني
• الالتهاب الرئوي: وبيكون نتيجة الإصابة بالبكتيريا العقدية الرئوية، وبيأدي لتراكم للسوايل في مجاري الرئة وصعوبات في التنفس
• الانصمام الرئوي: وهي حالة مرضية لتعرض الرئتين لجلطة وبيكون ضيق التنفس المفاجئ عرض مع انتفاخات في القدم
• متلازمة فرط التهوية: حالة مرضية بتسبب تنفس المصاب أكتر من حاجته، بسبب خوف أو قلق، وبيصاحبها أعراض تانية زي الشعور بالتتميل أو اللسع في الأصابع
• مشاكل القلب: بتأثر كتير من مشاكل القلب على التنفس زي الذبحة الصدرية والنوبة القلبية والعيوب الخلقية في القلب، وعدم انتظام ضربات القلب 
• فقر الدم: بسبب نقص كريات الدم الحمراء اللي بتحمل الأكسجين في الدم 
• السمنة: الوزن الزايد بيأدي لمتاعب أثناء التنفس، وخاصة مع القيام ببذل أي مجهود زائد

 أسباب نفسية

• مع زيادة القلق والتوتر والعصبية محتمل يواجه الشخص صعوبات في التنفس 
• الاكتئاب من المشاكل النفسية اللي ممكن تسبب الإصابة بضيق التنفس 

 عادات يومية خاطئة

• التدخين أو التواجد في أماكن ملياتة بالدخان: لأن الهواء الملوث بيأثر على الجهاز التنفسي وبيعيق عملية التنفس بسبب المواد الضارة في السجاير و المواد الكيماوية في المنظفات
• التعرض للغبار والأتربة: بيسبب تهيج وحساسية للمجرى التنفسي   
• بذل مجهود كبير يفوق قدرات الجسم: خاصة  لو  الشخص مصاب بمشكلة في الجهاز التنفسي أو أمراض القلب، زي صعود السلم بسرعة كبيرة، وممارسة رياضات مجهدة، أو حمل أشياء تقيلة.

  فترة الحمل

• بعض الحوامل بتعاني من صعوبة التنفس خلال الحمل، بسبب ضغط الجنين على الحجاب الحاجز، مع اكتساب المرأة وزن زائد، أو في حالة إصابتها بأمراض زي حساسية الصدر، أو فقر الدم

العلاج

• تجنب محفزات صعوبة التنفس: زي لهواء الملوث والمواد الكيماوية الضارة.. الأفضل ارتداء كمامة مع استخدام المنظفات القوية أو في الأيام اللي بتشهد أتربة وغبار
• عدم بذل مجهود كبير  لأن كل شخص له مقدار جهد بيتلائم مع صحته وطبيعة جسمه 
• مارس رياضة مناسبة 
• تناول أكل صحي لتقوية جهاز المناعة وتجنب السمنة   
• التهوية الجيدة في المنزل عشان تضمن استنشاق هواء نقي والتخلص من أي روائح كريهة، أو فيروسات في الجو 
• الابتعاد عن مصادر التوتر والقلق لأنه بيحفز عدم التنفس السليم 
• مارس تمارين التنفس العميق لأنها بتساعد على الاسترخاء والتنفس الصحيح