تطعيم الشهرين أول مجموعة لقاحات بياخدها الطفل، ويعتبر من أهم التطعيمات في سنين الطفل الأولى لأنه بيشمل لقاحات ضد أمراض كتيرة، وبتلزمه وزارة الصحة وبتوفره في المراكز الصحية المختلفة، وبيصاحبه أعراض متوقعة بتواجهها الأم مع رضيعها، وهنقولك نصايح بسيطة للتغلب عليها.
ما هو تطعيم الشهرين؟
- تطعيم الشهرين من التطعيمات الإجبارية اللي بتمنحها وزارة الصحة بالمجان للرضع، وهو عبارة عن نقط بالفم مع حقنة أو حقنتين بالفخد
- وبتختلف مكونات التطعيم من دولة للتانية، لكنها في الأغلب مجموعة من الجرعات لمقاومة بعض الأمراض، وبتحتوى الجرعة في مصر على:
- الحقنة بتشمل: (الثلاثي البكتيري:السعال الديكي والدفتريا والتيتانوس/الكبد الوبائي (ب)/الإنفلونزا البكتيرية (اللي بتسبب اللاتهابات الرئوية والالتهاب السحائي))
- نقط بالفم بتشمل شلل الأطفال
- تطعيم الروتا: نقط بالفم وبيحمي من الفيروس اللي بيسبب نزلات معوية شديدة خاصة بين الرضع
- تطعيم المكورات الرئوية: وهو حقنة بالفخد، وبيحمي من بكتيريا المكورات الرئوية اللي بتسبب التهابات الأذن الوسطى والتهابات رئوية عند الأطفال
- الروتا والمكروات الرئوية من التطعيمات الغير إلزامية في مصر لكن مهم تديه لطفلك، وعادة بيتم إعطاء التطعيمات الإضافية في نفس اليوم مع التطعيمات الإلزامية أو بعدها بأسبوعين
أعراض تطعيم الشهرين
- سخونية لمدة يومين بحد أقصى
- تورم مكان الحقنة بالفخد
- البكاء المستمر
- فقدان الشهية
- الانزعاج
- القيء
- النعاس
لكن بعض الأعراض ظهورها بيحتاج استشارة فورية للدكتور زي:
- في نسبة قليلة من الأطفال بتتعرض لتشنجات بسبب تطعيم السعال الديكي
- ارتفاع شديد في درجة حرارة (أكتر من 39 درجة مئوية)وعدم الاستجابة لخافض الحرارة
- استمرار التورم والاحمرار مكان الحقن لأكتر من أسبوع
- طفح جلدي
نصايح لتخفيف أعراض التطعيم
- للأم.. رضعي الطفل قبل التطعيم بساعة عشان ما يتقيأش التطعيم الفموي
- وقت التطعيم.. خليك حاضن طفلك أو ماسك إيده علشان يحس بالأمان
- لما ترجع البيت.. نيمه في مكان هادي ودرجة حرارة معتدلة مع ملابس مريحة
- اتأكد من ارتفاع درجة حرارته قبل ما تديله خافض حرارة، والتزم بالجرعة المناسبة اللي قالها الدكتور مناسبة لوزنه
- اعمل كمادات مياه فاترة على مكان الحقن لتقليل التورم، وممكن تستخدم كمادات الجل المخصصة للأطفال
- ادهن مرهم مسكن ومهديء زي (ريباريل جل) أو (إكستروما جل) لو التورم زاد بشكل ملحوظ
