– شراء اللحمة من الجزار: 

– تجنب شراء اللحوم المعروضة عند الجزار لأنها بتتعرض لتلوث طول الوقت واختار أقرب قطعة للشكل والجزء اللي إنت عايزه تبقى مخزنة في تلاجة العرض، واختار بنفسك القطعة اللي عايزها واطلب منّه إزالة الزيادات وتقطيعها بالشكل المطلوب، واشتري من محل موثوق في جودة لحمته وأمانته، واطلب لحمة مختلفة عن اللي معروضة في التلاجة لو بتشتري من سوبر ماركت كبير لأن أغلبها بيبقى معروض بهدف بيعه بأسرع وقت، والأفضل تبحث عن اللحمة الطازجة. 

– اتأكد إن نسيج اللحمة متماسك خصوصًا في القطع بين اللحم والدهن، والألياف يبقى ملمسها ناعم ومفيش أي ملمس لزج فيها، وعشان تتأكد من صحّتها ممكن تضغط بإيدك عليها، لو لقيت إن اللحمة نزلت لتحت يبقى القطعة مش سليمة لكن لو رجعت لمستواها الطبيعي تاني واستقر النسيج عند مستواه تبقى سليمة مش بايظة، مهم تشم اللحمة كويس عشان تتأكد إن مفيش أي ريحة نفّاذة أو منفرة. 

– تراكم السوايل فيها زيادة عن اللزوم أو نزيف السوايل والدم المستمر منها دليل علي فساد اللحمة. 

– راجع الختم الموجود عليها، واعرف إن الختم المستطيل للحوم صغيرة السن، والختم المثلث للحوم كبيرة السن. 

2- تخزين اللحمة بعد شرائها: 

– لازم تحدد مصير اللحمة سواء هتطبخها أو هتحطها في الفريزر لما ترجع بيتك فورًا، لو هتخزّنها هات ورق ألومنيوم أو أكياس تلاجة وفرّغ منها الهواء كويس وحط فيها اللحمة، والزق عليها ورقة بنوع اللحمة وتاريخ التخزين لو هتحطها في الفريزر، وافصلها عن أي حاجة تانية في الفريزر، افتكر إن مدة تخزينها فيه من 6 لـ 12 شهر، لكن لو في التلاجة غلّفها كويس وحط تحتها طبق وافصلها عن الخضروات واللحوم المستوية أو أي حاجة في الفريزر لمدة من 3 لـ 5 أيام بس. 

3- فك اللحمة المجمدة: 

– ابعد عن أخطاء فك اللحمة زي تركها على أرفف المطبخ عشان تفك في درجة حرارة الغرفة أو فكها في وعاء مليان مياه دافية أو حتى باردة، الخبراء بيأكدوا إن فكّها بالطريقة دي بيزوّد خطر فسادها وبيعرّضك للتسمم الغذائي.

– الأحسن تحطها في آخر رف في التلاجة قبلها بـ 12 ساعة على طبق عشان تمنع تراكم السوايل في كيس اللحمة على الأرفف، وابعدها عن أي أطعمة تانية. 

4- غسل اللحمة: 

الخبراء بيأكدوا إن غسل اللحمة بيزود خطر تلوّثها بالجراثيم والميكروبات لأن البكتيريا اللي فيها بتموت في درجات الحرارة العالية خصوصًا مع تعريضها المباشر للمياه لمدة طويلة قبل الطهي، وبالتالي الأفضل نقل اللحوم مباشرة من كيسها لوعاء فيه مياه وغليها لقتل أي ميكروبات ضارة، لأن الميكروبات بتموت عند درجة حرارة 72، ودراسات كتير أكدت إن غسلها مباشرة من المياه داخل الحوض بينشر الجراثيم والميكروبات على الأسطح والأطباق التانية وبتزيد فرص إصابة أفراد المنزل بالتسمم الغذائي، ومن أشهر الجراثيم دي السالمونيلا، والتوكسوبلازما، والعنقودية الذهبية، والليستريا، والإشريكية القولونية. 

5- تسوية اللحمة: 

لازم اللحمة تستوي على درجة حرارة أقلها من 72 لـ 75 درجة مئوية، ومهم تراقب تغيّر لونها لبني ممزوج بالرمادي أثناء التسوية، وبلاش تسيبها أكتر من ساعتين بعد التسوية عشان البكتيريا والجراثيم ممكن تنشط فيها تاني، والدراسات بتأكد إن درجة الحرارة شديدة الانخفاض (أقل من الصفر) أو شديدة السخونة (أكتر من 75 درجة مئوية) بيقتلوا معظم البكتيريا الضارة.