الكروكس انتشر في الفترة الأخيرة لأنه مريح للقدم وفي نفس الوقت سهل خلعه ولبسه وتخزينه، بجانب إنه مناسب أوقات السفر لأنه مش بياخد مساحة كبيرة في الشنطة، لكن بعض الخبراء بيحذروا من بعض الأضرار اللي ممكن يسببها مع ارتدائه لمدة طويلة، وفي نفس الوقت بيأكدوا إن استخدامه في بعض الأوقات بيحمي القدم لو بتعاني من تشوهات في العظام.
تاريخ ظهور الكروكس
- الكروكس ظهر لأول مرة سنة 2002 في كندا وكان الهدف منها ارتداء أحذية تحمي القدمين من الانزلاق أثناء ركوب الزوارق
- شركة كروكس (وهي شركة أمريكية-كندية) ظهرت سنة 2002 على إيد ليندون هانسون وجورج بوديكر جونيور
- الشركة استمرت في خط إنتاج لتصنيع أحذية مطاطية لأصحاب اليخوت والقوارب عشان تبقى أحذية مش بتتأثر بالبلل
- نجاح الأحذية المطاطية شجعها على الانتشار والفكرة اتنفذت على إيد أكبر العلامات التجارية في العالم زي أديداس ونايك
تأثير الكروكس على القدم
- الخبراء بيأكدوا إن أحذية الكروكس بتقلل آلام كعب القدم
- بتعتبر من أكتر الأحذية المريحة للأشخاص اللي بيعانوا من مشاكل وتشوهات في عظام القدم زي بروز العظام
- بتقلل فرص تراكم البكتيريا في القدم خصوصًا لمرضى السكر وبالتالي بتقل فرص ظهور تقرحات القدم عندهم وقت ارتداء الكروكس
- الراحة اللي بيسببها الكروكس للقدم بتساعد على تدفق الدورة الدموية بصورة طبيعية في القدم
- ارتداء الكروكس لمدة طويلة وقت الوقوف بيقلل فرص آلام الظهر
- لكن ارتدائه لفترة طويلة على المدى البعيد ممكن يسبب تفاعل تحسسي مع الجلد خصوصًا لو مصنوع من مواد بلاستيكية منخفضة الجودة
- الحذاء المطاطي المفتوح ممكن يزوّد فرص جروح القدمين من أي مسمار وبالتالي لازم تختار نوع معين موثوق في البلاستيك المصنوع منه
- الأفضل تختار علامة تجارية معروفة ومغلفة من جميع النواحي عشان تقلل التأثير السلبي لاحتكاك الجلد بالبلاستيك
- الخبراء بينصحوا بارتداء جوارب تقيلة لتقليل احتكاك الجلد مع البلاستيك اللي ممكن يسبب رد فعل تحسسي
- تنضيف الكروكس باستمرار بيقلل فرص تراكم الروائح الكريهة داخله اللي ممكن تسبب فطريات تنقل عدوى خطيرة للجلد
طريقة تنضيف الكروكس
- رش جواه بيكنج صودا لمدة نص ساعة عشان تمتص أي روايح كريهة
- اشطفه بالمياه العادية قبل ما تبدأ تنضفه عشان تشيل أي أتربة وتحدد الأماكن اللي محتاجة تدعكها أكتر
- املا الحوض أو وعاء كبير بالمياه الدافية وضيف عليها مقدار بسيط من كلور الألوان وصابون غسيل الأطباق
- ادعكه من كل الجوانب بفرشة التنضيف وركز على أماكن تراكم البقع والأوساخ
- استخدم فرشة أسنان قديمة عشان تنضّف فتحات التهوية أو الأماكن الدقيقة اللي صعب الوصول إليها
- اشطفه تاني بمياه باردة ونشّفه كويس بقطعة قماش أو إسفنج عشان تمتص المياه بسرعة
- سيبه في الهواء الطلق بس ابعده عن التعرض لأشعة الشمس لمدة طويلة لأنها ممكن تتلفه
- لو بتلبسه في البيت فقط ممكن تحطه في الغسالة مع فوط المطبخ القديمة
- بلاش تحطه في الغسالة مباشرة لأن تراكم الأوساخ اللاصقة فيه ممكن تضرها
