المحتويات
الهالات السوداء منتشرة بين السيدات والرجال، وغالبا بيصاحبها انتفاخ العين أو ظهور جيوب أسفلها، وفي الأغلب سببها هو قلة النوم، لكن في أشياء تانية غير متوقعة بتسببها.
أسباب ظهور الهالات السوداء
- الشعور بالتعب الناتج عن قلة أو زيادة أو اضطراب النوم بيسبب بهتان وتغير لون الجزء أسفل العين
- التقدم في السن لأنه بيسبب فقدان الكولاجين وترقق الجلد وبالتالي ظهور الأوعية الدموية الغامقة أسفل العين
- إجهاد العين الناتج عن الجلوس أمام التلفزيون أو الموبايل أو الكمبيوتر لفترات طويلة، وده بيسبب تضخم الأوعية الدموية أسفل العين وتغير لون الجلد
- ردود الفعل التحسسية وجفاف العين بيحفزوا الهالات السوداء، لأن الجسم بيفرز مادة الهيستامين اللي بتسبب تمدد الأوعية الدموية في العين وظهورها أكتر أسفل الجلد مع التهاب وتورم المكان، والنتيجة هي الهالات السوداء
- الجفاف وقلة شرب المياه بيسبب بهتان وتعب البشرة
- التعرض للشمس لفترات طويلة وبدون استخدام واقي الشمس بيسبب الإنتاج الزايد للميلانين (مادة صبغية مسؤولة عن لون جلد الإنسان) وتغير لون المكان حوالين العين للأغمق
- العوامل الوراثية، وجود تاريخ من الهالات السوادء بيعلي فرص وجودها عند الأطفال الأصغر سنا واللي ممكن تلحقه في الطفولة
- انخفاض مستوى الأنسجة الدهنية حوالين العين
- الإصابة بالأنيميا (قلة مستوى الحديد في الجسم)
- فرك العين المتكرر
- الإصابة بمشاكل في الغدة الدرقية
- التدخين
- النوم على أحد الجانبين أو النوم على البطن بيسبب إجهاد أو الضغط على العين
- تناول الكافيين والموالح بكميات كبيرة
أنواع الهالات السوداء
بتنقسم لـ 4 أنواع، وتحديد النوع هيساعدك في العلاج
البنية
- بتكون درجة أو اتنين أغمق من الجلد نفسه ولما تشد الجلد تحت العينين بينتقل اللون الداكن مع الجلد
- احمي منطقة العين باستخدام واقي الشمس وارتداء نضارة
- مهم تزيلي الميكاب قبل النوم بغسول مناسب لبشرتك
- اتأكدي إن منطقة العين خالية من بواقي الكحل/الماسكرا/ الآيلاينر باستخدام عود قطن مبلل بغسول
السوداء
- بتكون غامقة ولما تشد الجلد تحت العينين اللون بيبقى أفتح
- منتجات مكافحة الشيخوخة بتقدم أفضل نتيجة في علاج النوع ده
- اهتم بواقي الشمس يوميا وتناول الأطعمة الصحية وكمية مياه كافية
الزرقاء أو البنفسجية
- الهالات بتكون لما تشد الجلد تحت العينين اللون الداكن بيكون زي ما هو
- مهم تنام كويس وتتناول أكل صحي وكمية مياه كافية
- قلل تعرضك لشاشة الموبايل أو الكمبيوتر ومارس تمارين العين يوميا
- تجنب التوتر والإجهاد
- دلك منطقة العين واستخدم كمادات دافية زي الشاي الأخضر
طرق علاج الهالات السوداء
- علاجها بيعتمد في الأساس على سبب الإصابة بيها، فلو سببها مشكلة صحية لازم تعالجها الأول، ولو سببها ممارسة نمط خاطيء فممكن تغيره مع اتباع طرق العلاج الطبيعية زي:
- وضع كمادة باردة أو مكعبات التلج المغلفة في فوطة أسفل العين لتقليل انتفاخها والهالات السوداء أسفلها لمدة 20 دقيقة وكررها يوميا
- انقع كيسين شاي أخضر أو أسود أو بابونج في مياه سخنة 5 دقايق وحط أكياس شاي دافية على عينك وهي مقفولة من 10- 20 دقيقة وبعدين اغسلها بمياه باردة
- قطع شرايح خيار سميكة وحطها في التلاجة تبرد وسيبها على عينك 10 دقايق وبعدين اغسلها بمياه وكررها مرتين يوميا
- اخلط فيتامين هـ مع زيت لوز.. وقبل النوم وزع كمية بسيطة من الخليط على الهالات السوداء برفق وتجنب شد الجلد والصبح اغسلها بمياه باردة
- انقع قطع قطن في مياه ورد 5 دقايق وحطها على عينك وهي مقفولة ربع ساعة مرتين يوميا
- افرم شرايح بطاطس واعصرها عشان تستخرج منها المياه وحط قطع القطن في مياه البطاطس وسيبها أسفل عينك 10 دقايق
- اعمل مساج للمنطقة اللي تحت العين بحرص ورفق بزيت جوز الهند واغسلها الصبح بمياه باردة
- اخلط كركم مع عصير أناناس لحد ما القوام يتقل وحطه أسفل عينك وسيبه عشر دقايق وامسحه بقماشة ناعمة
عادات يومية لتقليل الهالات السوداء
- نام عدد ساعات كافي يوميا وحدد معاد للنوم والصحيان
- ارفع رأسك أثناء النوم عن طريق النوم على مخدتين لتجنب تراكم السوايل أسفل العين
- قلل تعرضك للشمس قدر المستطاع وفي حالة التعرض ليها استخدم واقي الشمس والبس نضارة
- اشرب كميات مياه كافية على مدار اليوم
- اتبع نظام غذائي متوازن بين كل المعادن والفيتامينات اللي جسمك محتاجها
- تجنب النوم على جنبك وأفضل وضع للنوم هو الضهر
- تجنب إجهاد العين أمام شاشات الكمبيوتر والتلفزيون
- اتأكد من مستوى الهيموجلوبين في الجسم للتأكد من عدم إصابتك بالأنيميا
علاج الهالات السوداء
- مرطبات أسفل العين اللي فيها مكونات زي الكافيين أو الريتينول أو حمض الهيالارونيك أو فيتامين هـ مناسبة
- استخدام فيتامين سي المخصص للبشرة بيساعد في علاجها في حالة الانتظام عليه
- الدكتور ممكن يطلب منك استخدام كريمات لتفتيح أسفل العين فيها مكونات زي حمض الأزيليك وحمض الكوجيك وحمض الجليكوليك
- العلاج بالليزر بيساعد على إنتاج الكولايجن أسفل العين
- التقشير الكيميائي لتفتيح أسفل العين والتخلص من الهالات السوداء واللي عادة بيعتمد على حمض الجليكوليك وHydroquinone
- العلاج بالفيللر واللي بيعتمد على حقن حمض الهيالارونيك للأنسجة أسفل العين
علاج الهالات السوداء بأطعمة
الانتظام على أكل بعض الأطعمة ممكن يساعد في علاج الهالات السوداء أو الوقاية منها، زي:
- التوت
- البطيخ
- الخيار
- الطماطم
- البرتقال
- البنجر
- السبانخ
- البروكلي
- اللوز
- المياه
- الكرفس
- البقدونس
