المحتويات
الدهون ليها أنواع مختلفة، وفي منها أنواع صحية الجسم محتاجها لأنها بتمده بالطاقة وأنواع تانية مضرة وبتأثر على الصحة وبتسبب زيادة الوزن، فمهم تختار الأنواع الأفيد لجسمك.
حقائق عن الدهون
الجسم بينتج دهونه الخاصة من السعرات الحرارية الزايدة، فالبعض منها موجود في الأطعمة النباتية وأنواع تانية موجودة في الأطعمة الحيوانية ومعروفة بإسم الدهون الغذائية
وهي بتمد الجسم بالطاقة وضرورية لوظائف مختلفة فيه، فمثلا بعض الفيتامينات بتحتاجها عشان الجسم يمتصها ويستفيد بيه زي فيتامين د وفيتامين هـ وفيتامين أ
أكلها بكميات كبيرة بيسبب زيادة الوزن وأمراض زي الكوليسترول وأمراض القلب والأوعية الدموية وداء السكري من نوع 2
مهم تختار الأنواع الصحية منها بالكميات المناسبة لتجنب تأثيرها الضار على الصحة
أنواع الدهون
الأوميجا 3
- مفيدة للقلب وبتحميه من الأمراض
- بتقلل خطر الإصابة بالزهايمر
- بتحسن نشاط العقل
- موجودة في السلمون وبذر الكتان وزيت الزيتون والمكسرات
الدهون المشبعة (Saturated Fats)
هي من الأنواع الضارة في حالة تناولها بشكل زايد وتخطي الكمية اليومية المسموح بيها وهي:
- 30 جم يوميا كحد أقصى للرجال
- 20 جم يوميا كحد أقصى للسيدات
- موجودة في الزبدة والسمنة والأجبان خاصة الأنواع الصلبة واللحوم ومنتجاتها وبعض أنواع المعجنات
الدهون المتحولة (Trans Fats)
من الأنواع الضارة لأنها بتأثر على معدل الكوليسترول في الجسم، والأفضل لا تتخطى الكمية اليومية منها (5 جم)، وفي منها نوعين:
- أنواع متحولة طبيعية وموجودة بكميات قليلة في اللحوم والأجبان
- متحولة مصنعة وموجودة بكميات كبيرة في المنتجات المصنعة زي الزيوت النباتية المهدرجة واللحوم المصنعة
بتسبب:
- انسداد الشرايين
- تلف الكبد مع الوقت
- بتعلي خطر الإصابة بأمراض القلب
دهون غير مشبعة (Unsaturated Fats)
مفيدة للجسم وبتساعد على خفض الكوليسترول الضار وزيادة معدل الكوليسترول الجيد، وليها أكتر من نوع ومنهم (أوميجا 3) و(أوميجا 6)، وموجودة في:
- الزيوت النباتية الطبيعية زي زيت الكانولا وزيت الزيتون
- الأسماك الدهنية زي الساردين والرنجة والسلمون والمكاريل
- المكسرات زي اللوز
- البذور زي بذور الكتان وعباد الشمس وبذور الشيا
- بعض أنواع الخضار والفاكهة زي الأفوكادو
- الشوكولاتة الغامقة
الأحادية:
- بتظبط مستوى السكر في الدم
- بتساعد على حرق الدهون
- بتحمي الجسم من أمراض الشيخوخة
- مفيدة للأشخاص المصابة بداء السكري 2
- موجودة في الأفوكادو وزيت الزيتون
أعراض نقصها في الجسم
- مواجهة صعوبة في إنقاص وزنك
- لو دايما جعان
- جفاف البشرة والجلد
- لو طاقتك منخفضة بشكل ملحوظ وعلى طول تعبان
- لو بتواجه صعوبة في التركيز وحاسس بتشوش عقلي
- في حالة الانتظام على الفيتامينات لكن مفيش تأثر واضح على جسمك وصحتك لأن فيتامينات أ/ سي/ ك/ هـ/ د محتاجة دهون عشان الجسم يمتصها
- لو بتحس بالبرد بشكل مستمر
- التقلبات هرمونية
- لو شعرك جاف وأضافرك بتتكسر
- جفاف العين
طريقة تحديد كمية الدهون من الملصق الغذائي
- أغذية عالية بالدهون: كل 100 جرام من المنتج فيه 17.5 جرام أو أكتر منها
- منخفضة: لو كل 100 جرام من المنتج فيه 3 جرام أو أقل من الدهون
أما للتمييز بين الأغذية العالية بالدهون المشبعة من المنخفضة:
- أغذية عالية بالأنواع المشبعة: كل 100 جرام فيه 5 جرام أو أكتر
- أغذية منخفضة بالأنواع المشبعة: فكل 100 جرام فيه 1.5 جرام أو أقل
