المحتويات
الغيرة شعور اجتماعي معقد بيتولد لما الشخص بيقارن نفسه بحد تاني وبتحصل المقارنات دي بنسب متفاوتة ومن وقت للتاني وبقصد أو حتى من غير، وبالتالي مهم تعرف إزاي الغيرة بتتولد وطريقة التحكم فيها وإزاي تحمي نفسك من الشعور اللي ممكن يدمّر علاقتك بالمحيطين بيك.
نشأة مشاعر الغيرة
- نظرية المحاكاة اللي وضعها الفيلسوف الفرنسي رينيه جيرار بتأكد إن رغباتنا أغلبها مش نابعة من داخلنا
- أغلب الرغبات مبنية على أساس نمط الحياة المحيط بينا واللي بنحاول نقلده ونتكيف معاه عشان نحس بالانتماء للمجتمع اللي عايشين فيه
- مع الوقت بتطور الرغبات مع تطور المجتمع وبتظهر احتياجات جديدة بتختلف قدرة الناس على تلبيتها
- مش كل الناس بتقدر تحقق المعايير أو الأنماط الجديدة في المجتمع وبالتالي بتتولد مشاعر الغيرة أو التطلع للأفضل حتى لو على حساب الآخرين
- دراسة في جامعة توبنجن الألمانية بتقول إن مواقع التواصل الاجتماعي بقت تلعب دور كبير في إشعال الإحساس بالغيرة
- لأنك لما بتتابع أخبار وصور الآخرين وتفاصيل حياتهم بتترسم في دماغك صورة عن مستواهم المادي والمهني والاجتماعي
- الصورة دي ممكن تحرك مشاعر سلبية عندك لو شايف إنك أحق بالحياة اللي غيرك عايشها
التفسير العلمي لمشاعر الغيرة في المخ
- الموضوع بيحصل عن طريق عملية معينة في المخ بتشرحها دراسة في جامعة يابانية من خلال تجربة على القرود
- الباحثون حرموا قرد من كمية الأكل المناسبة ليه وفي نفس الوقت منحوا قرد تاني كمية أكل أكبر
- ولاحظ الباحثين زيادة في الإشارات اللي بترسلها قشرة الفص الجبهي للجزء الأوسط من جذع الدماغ
- وهي المنطقة المسؤولة عن جمع المعلومات واتخاذ القرارات للتكيف مع البيئة المحيطة وتحقيق الأهداف
- زيادة النشاط الملحوظة في دماغ القرد بتخليه مستعد يتصرف بأي شكل مقابل تحقيق الحاجة اللي شاف حد تاني بيستمتع بيها
أسباب الغيرة
- دراسات كتير بتقول إن من أسباب الغيرة الرئيسية عدم الرضا عن النفس واحتقارها
- بجانب الإحساس بالنقص اللي بيخلي الشخص دايمًا يفكر في الحاجات اللي في إيد غيره وشعوره بإن الناس أحسن منه رغم إنه ممكن مايبقاش صح
- ومن أسبابها برضه الأنانية اللي بتخلي الإنسان بيفكر في نفسه بس بجانب إنه صاحب حق في الحصول على كل حاجة سواء مسموح له بيها أو لا الغيرة موجودة عند الناس بدرجات متفاوتة
تأثير الغيرة
- الأشخاص اللي مستويات الغيرة عندهم أعلى بيبقوا أميل لممارسة سلوك عدواني مع الأشخاص اللي بيغيروا منهم
- في أوقات كتير بيبقوا عصبيين وصوتهم عالي وبيحاولوا بكل الطرق يقللوا من قدرات الآخرين
- لدرجة إنهم ممكن يطلعوا إشاعات تشكك فيهم وفي قدراتهم
- أو يبذلوا مجهود عشان يفتكروا أي ذكريات مؤلمة أو مواقف سيئة عشان يجرحوا بيها الشخص اللي بيغيروا منه
- دراسة بريطانية بتقول إن الغيرة بتأثر بشكل كبير على كفاءة المخ والمهارات العقلية وبتضعف التركيز وبتزود فرص الإصابة بالأمراض النفسية و الاكتئاب والقلق والتوتر
طريقة التخلص من الغيرة
- دراسة بتقول إنك ضروري تطور مشاعر الغيرة الإيجابية ولازم تستفيد من تجربة الآخر وافهم سبب نجاحه ووجوده في مكانة بتتمناها
- زي إنه وصل لمنصب قيادي في سن صغير إو إنه بيتقاضى مرتب كبير
- ذاكر شخصيته وطريقة شغله كويس، ولو قريب منك اعرف منه الطريقة اللي وصل بيها
- لازم تبطل تحط نفسك في مقارنة مع الآخرين لكن قارن في الوضع الحالي بنفسك زمان وشوف اتطورت قد إيه
- في كتاب العادات الذرية (atomic habits) بيشرح الكاتب جيمس كلير إن تفكيرك في أضرار مشاعر معينة هيمكنك تتحكم فيها
- عشان تتجنب الضرر تخيل حياتك لو سيطرت عليها مشاعر الغيرة قد إيه هتأذيك وهتهدر طاقتك وهتفضل مكانك
- ركز في حياتك واسعى دايمًا لتجارب جديدة لإن مع مرور الوقت والانغماس في التجارب و النضج مشاعر الغيرة بتقل
- وبتختفي المقارنات اللي بتحط نفسك فيها مع الآخرين لصالح حاجات تانية أهم زي تعلم مهارات جديدة أو الاستمتاع بالوقت مع المقربين ليك
- افتكر دايمًا إن النجاح مفهوم ومتغير وإن البشر مختلفين في قدراتهم واهتماماتهم لإن انغماسك في المقارنة والغيرة مش مفيد
