المحتويات
الرقم القومي سواء كان في البطاقة أو شهادة الميلاد المميكنة بيعتبر الرقم التعريفي للمواطن داخل الدولة، وبيبقى الرقم الملاصق له طول حياته وبتعتبر البطاقة هي مستند الهوية الخاص بالشخص، وحددت الدولة سن 16 سنة لبدأ استخراجها بطرق مختلفة سواء من مكاتب السجل المدني المختلفة أو أونلاين.
استخراج بطاقة الرقم القومي من مكتب السجل المدني
المستندات المطلوبة
- استمارة الرقم القومي الموجودة في كل مكاتب السجل المدني
- شهادة اعتماد مهنة من النقابة التابعة ليك أو هيئة العمل وشهادة قيد من المدرسة أو الجامعة لو لسه بتدرس
- في حالة عدم وجود عمل لازم تصوّر شهادة التخرج من مؤهلك الدراسي وتجيب الأصل معاك للإطّلاع
- جهّز معاك وصل كهرباء أو غاز ولازم يكون حديث ومثبت فيه بالتحديد محل الإقامة اللي هتسجّله في البطاقة
أسعار الاستمارات
- العادية سعرها 45 جنيه وبتستلم البطاقة بعد التقديم عليها بأسبوعين
- العاجلة سعرها 120 جنيه وبتستلمها بعدها بـ 3 أيام
- المميزة أو الـ vip سعرها 170 جنيه وبتستلمها بعدها بـ 24 ساعة
غرامات التأخير
- 100 جنيه في حالة التأخر عن التقديم لإصدار البطاقة بعد إتمام 16 سنة بـ 6 شهور
- 50 جنيه في حالات التأخر عن التأخر عن تحديث بيانات البطاقة بـ 3 شهور زي تغيير السكن أو الوظيفة
التقديم على بطاقة الرقم القومي إلكترونيًا
- ادخل على الموقع الإلكتروني لوزارة الداخلية واعمل حساب عليه
- بعد تسجيل الدخول بالبريد الإلكتروني وكلمة السر
- اختار الخدمات الإلكترونية ومنها هتضغط على الأحوال المدنية
- حدد خدمات الإنترنت للمواطنين (موجودة في الشريط الأحمر على اليمين)
- اختار منها بطاقة الرقم القومي
- تابع الخطوات واملا كل البيانات المطلوبة منك واعرف إنك تقدر تستخرج البطاقة أونلاين في حالات بدل تالف وبدل فاقد وتجديد البطاقة أو تحديث الحالة الاجتماعية
- لو هتستخرج بطاقة لأول مرة لازم تقدم في أحد مكاتب السجل المدني
- بعد اكتمال ملأ البيانات اختار وسيلة الدفع سواء فيزا أو فوري وبعدها اختار ارسال الطلب
- هيظهر رقم الطلب اللي ضروري تحتفظ بيه عشان تستعلم من خلاله على حالة الطلب سواء بالقبول أو الرفض
- المختصين في مصلحة الأحوال المدنية بيفحصوا الطلب وبيردّوا عليك عن طريق رسالة نصية sms على تليفونك في مدى أقصاها 72 ساعة
- وقت الموافقة على الطلب بتدخل للاستعلام عن الطلب من خلال الصفحة الرئيسية للموقع
- وبعدها بتكمّل إجراءات الدفع وبتوصلّك البطاقة لحد البيت
- نفس الخدمة متاحة على تطبيق وزارة الداخلية المصرية سواء على أندرويد أو على آيفون
الاستعداد لالتقاط صورة البطاقة
- اختار ملابس لونها غامق عشان تناسب الخلفية البيضاء
- افرد جسمك بشكل مستقيم وتجنب رفع دقنك عشان ماتظهرش أكبر من حجمها
- خلي راسك مستقيمة.. وبلاش تميّلها للخلف أو الأمام
- الابتسامة العريضة غير ملائمة والأحسن ترفع زوايا فمك في ابتسامة بسيطة
- خلي وجهك هادئ ومسترخي وتجنب ضم الحواجب
- لو بتلبس نضارة طبية الأحسن تخلعها قبل التصوير
- اهتم بشكل شعرك ولو أصلع حاول تتجنب لمعان راسك وللسيدات تجنبي تسريحة شعر تغطي حواجبك وعينك
- لو محجبة اختاري طرحة غامقة
- افتكري إن ظل العيون (الآيشادو) بيظهر انطباع لسن أكبر واختاري أحمر شفاه لونه طبيعي أو غامق وغير لامع
- ابرزي شكل العين برسم آيلاينر من الخارج وتحديد الكحل من الداخل
- حافظ على ابتسامتك الخفيفة طول فترة جلوسك أمام الكاميرا لالتقاط الصورة في أي لحظة
