المحتويات
كمادات العين السخنة أو الباردة من أشهر العلاجات المنزلية الفعالة، اللي بتساعد في تخفيف الألم والتورم لبعض حالات العين البسيطة زي جفاف العين وتهيجها واحمرارها نتيجة السهر أو العياط لفترة طويلة وكمان التهاب الجفن والانتفاخات بعد النوم، والتهاب الملتحمة، وغيرها.
كمادات العين الباردة
- مهمتها هي تخفيف الحرارة المحسوسة نتيجة تهيج العين والحكة، وبالتالي تحقيق الراحة الفورية
- بتساعد في حماية أنسجة العين عن طريق إبطاء الدورة الدموية، وبالتالي تخفيف التورم
- بتقلل الإحساس بالحرقة والوخز والكحة نتيجة حساسية العين تجاه محفزات زي الأتربة والغبار وحبوب اللقاح
- مفيدة في علاج إصابات الأنسجة الرخوة زي الصدمات الشديدة والكدمات
- بتحسن الدورة الدموية في منطقة العين وبتعالج جفاف العين
- بتخفف شعور الألم والحرقان نتيجة إجهاد العين بعد العياط لفترة طويلة
- بتقلل الصداع والتهيج بعد الجلوس لفترة طويلة قدام شاشة الموبايل أو اللاب توب
- لو كانت مشاكل العين متكررة.. ضروري تروح لدكتور عيون فورا
طريقة تطبيقها
- استخدم قطع من القطن أو الشاش المعقم وفوطة نضيفة واغمرها في مياه باردة وحطها على العين
- شيل القطنة أو الفوطة بعد ما تسخن، ورجعها في المياه الباردة مرة تانية
- كرر الكمادات لمدة 20 دقيقة
- في حال وجود تورمات أو صدمات شديدة وكدمات على منطقة العين.. استخدم كيس التلج وحركه على المنطقة لمدة 20 دقيقة وكرره تاني بعد ساعتين
نصائح مهمة قبل استخدامها
- تجنب استخدام كمادات العين الباردة لو منطقة العين في إصابة أو جرح
- مهم الكمادات ماتكونش شديدة البرودة أو لف التلج قبل وضعها مباشرة على بشرتك، عشان تتجنب الإصابة بقضمة الصقيع أو عضة البرد
كمادات العين السخنة
- الحرارة والرطوبة بتساعد على تخفيف الألم والالتهابات وبعض المشاكل زي تهيج العين والتهاب الجفن وجفاف العين والحكة
- بتساعد في التخلص من التشنجات العضلية من خلال تحسين الدورة الدموية
- بتقلل التهاب الجفن وبتعالج الدمل
- تساعد في التخفيف من جفاف العين لأنها بتحفز الغدد على إنتاج الدموع
طريقة تطبيقها
- سخن كمية من المياه بدرجة متوسطة وفرغها في بولة نضيفة
- اغمر قطعة قطن أو شاش معقمة في المياه وحطها على العين، لمدة 10-15 دقيقة
- بعد ما القماشة تبرد، رجعها للمياه السخنة تاني وحطها على العين كررها 3-5 مرات
نصائح مهمة قبل استخدامها
- مهم المياه ماتكونش شديدة الحرارة، لأن الجلد المحيط بالعينين وعلى الجفون رقيق وشديد الحساسية، ممكن يصاب بحرق بسهولة
- تجنب الضغط ومحاولة فتح الدمل لأنه ممكن يزود التهيج والالتهاب، وكمان مهم تستخدم قطنة مختلفة لكل عين عشان تقلل فرصة انتشار العدوى من عين للتانية
