المحتويات
العلماء بيقولوا إن تأكيد أو نفي انتقال عدوى كورونا من الحيوان للإنسان أو العكس محتاج دراسات كتير عشان توصل لحقيقة المعلومة، لكن عمومًا أغلب المراكز البحثية والخبراء بيقولوا إن احتمال كبير يكون فيروس كورونا اتنقل من الحيوان للإنسان عن طريق الخفاش، لكن لحد دلوقتي مفيش دليل علمي بيقول إن اعتبار فيروس كورونا كوباء عالمي سببه انتشار الفيروس من الحيوانات للبشر، لأن أغلب حالات الإصابة انتقلت بين البشر وبعضهم، ومنظمة الصحة العالمية وكل الجامعات والخبراء بينصحوا بالحذر قبل أي تعامل مع الحيوانات في الوقت الحالي والحفاظ على مواعيد تطعيماتها وفي نفس الوقت تجنب الاختلاط بيها وقت الإصابة بكورونا.
تعريف فيروس كورونا
هو فصيلة من الفيروسات واسعة الانتشار المعروفة بأنها بتسبب أمراض قليلة التأثير زي نزلات البرد الشائعة أو أمراض أخطر زي متلازمة الشرق الأوسط التنفسية (MERS) ومتلازمة الالتهاب الرئوي الحاد (السارس).
ببساطة هو فيروس بيستهدف الجهاز التنفسي وبيسبب التهابات التنفسية الحادة، واسمه العلمي: فيروس المتلازمة التنفسية الحادة الوخيمة كورونا 2 (سارز كوف 2)، لكن المرض الناتج عنه اسمه ( كوفيد 19)، وأعلنت منظمة الصحة العالمية إنه وباء عالمي في مارس 2020.
انتقال كورونا من الحيوانات للبشر
سنة 2002 سجلت بعض حالات انتقال فيروس كورونا المسبب لمتلازمة الالتهاب الرئوي الحاد الوخيم (السارس) من القطط للبشر، واتنقل فيروس كورونا المسبب لمتلازمة الشرق الأوسط التنفسية (Mers) من الإبل إلى البشر في المملكة العربية السعودية عام 2012، وحسب تقرير لمنظمة الصحة العالمية بتأكد فيه إن فيروس كورونا اتنقل من الخفاش للبشر، وحذر التقرير من انتقال الحيوانات البرية من دولة للتانية وأكدت إنها مسؤولة عن حوالي 70% من الفيروسات المنتشرة حول العالم.
طريقة انتقال الفيروسات من الحيوانات للبشر والعكس
بتنتقل الفيروسات من الحيوان المصاب للإنسان عن طريق لعاب الحيوان وإفرازاته وفضلاته، سواء من خلال الاحتكاك المباشر معاها أو حتى عن طريق التعرض للأسطح اللي بيلمسها وبيمر عليها، وبتشمل العدوى مجموعة أمراض بكتيرية وفيروسية بتتسمي (zoonosis)، لكن على الرغم من ده سجلت منظمة الصحة العالمية حالات قليلة للحيوانات المصابة بفيروس كورونا، والتقطت الحيوانات العدوى من أشخاص مصابين اتعاملوا معاها مباشرة.
الحيوانات اللي سجلت إصابة بكورونا
القطط والكلاب والغوريلا والمنك والنمور والبوما والفئران.
انتقال العدوى من الحيوانات للإنسان
مفيش دليل قطعي حتى الآن على خطورة انتقال العدوى من الحيوان الإنسان، على الرغم من تأكد بعض التجارب على انتقاله، والبعض التاني فشل في تسجيل التقاط الفيروس وأهم الحيوانات اللي فشلت في التقاطه الفئران والدجاج.
حماية نفسك وحيوانك الأليف من كورونا
- خلي حيوانك الأليف جوه البيت قدر المستطاع وبلاش تخرّجه إلا في أضيق الحدود وتحت إشرافك، وقلل فرص اختلاطه بأشخاص تانيين
- اتعامل معاه وإنت لابس الكمامة والجوانتي ونضّف مكانه باستمرار وبلاش تسمحله باللعب في هدومك أو متعلقاتك الشخصية، والأحسن تحطها في مكان بعيد عن متناول إيده
- خليه يزور طبيبه فورًا لو لاحظت عليه أي أعراض برد زي احمرار العين وسيلان الأنف والقيء والحمى لأنها ممكن تبقى حاملة للمرض