أنواع الشوكولاتة وفوايدها وطرق مختلفة لتناولها

الشوكولاتة من الحلوى المفضلة للجميع كبار وصغار، وبجانب أنها لذيذة بتحتوي على فوائد صحية، لأن الكاكاو (المكون الرئيسي) غني بالفلافونويد المضاد للأكسدة وله دور كبير في تعزيز صحة القلب والشرايين وخفض مستويات الكولسترول في الدم، وكمان بتحسن المزاج.

أنواع الشوكولاتة

 الغامقة – Dark Chocolate

• نسبة الكاكاو فيها مابتقلش عن 55% وممكن توصل لـ95%
• بتحتوي على نسبة سكر قليلة عشان تكون صالحة للأكل أو استخدامها في الحلويات والمخبوزات
• وتعتبر هي الأكتر فايدة لأنها غنية بمضادات أكسدة وعناصر غذائية تانية مقابل نسبة أقل من السكريات والدهون اللي ممكن تأدي للسمنة والإصابة بالسكري

المرة الحلوة ونصف الحلوة – Bittersweet and Semisweet Chocolate

• بيحتوي النوعين دول من الشوكولاتة على 35% كاكاو في مقابل سكر ومكسبات نكهة
• وغالبا بتكون نسبة السكر في الشوكولاتة نصف الحلوة أكتر من الشوكولاتة المرة الحلوة، لكن ممكن تستخدم واحدة بدل التانية في أي وصفة.

الكوفرتيور – Couverture

• عالية الجودة وبتحتوي على 32% على الأقل من الكاكاو، وعادة بيفضلها الخبازين لأن انسيابيتها أعلى عن أنواع الشوكولاتة التانية لما بتدوب، بجانب أنها بتتوافر بمجموعة متنوعة من النكهات (المر الحلو ونصف الحلو والحليب) 
• بتستحدم كطبقة تزيين أو حشو ناعمة رفيعة للحلويات والمخبوزات

الحلوة – Sweet Chocolate

• بتحتوي على كاكاو بنسبة 15%، بجانب نسب مختلفة من السكر وبودرة اللبن ومكسبات النكهة

بالحليب – Milk Chocolate

• أكتر نوع مفضل ومنتشر بين الأنواع التانية
• بتحتوي على نسبة مرتفعة من السكر والفانيليا وبودرة اللبن مع مكسبات الطعم، ونسبة الكاكاو مبتزدش عن 10% 
• أقل صلاحية للاستخدام في أغراض الخبيز لأنها سهل تتحرق وبسرعة، لكن ممكن تدوبها على حمام بخار ببطء وتستخدمها في الحلويات الباردة 

غير محلاة – Unsweetened Chocolate

• بدون أي إضافة سكر أو بودرة لبن، وبتستخدم في الخبز ومعروفة باسم شوكولاتة الخبيز
• بتحتوي على 53% زبدة الكاكاو و47% مسحوق الكاكاو
• غير صالحة للأكل بدون إضافات 

فوائد الشوكولاتة

• الشوكولاتة الداكنة هي الأفضل لأنها غنية بالكاكاو مصدر مضادات الأكسدة عكس الأنواع التانية اللي بتحتوي على نسب عالية من السكر والدهون وده بيأدي للسمنة والسكري وغيرها
• وتعتبر مفيدة للمخ لأنها بتعزز مستوى السيروتونين المسؤول عن انتظام الهرمونات بالجسم وتقوبة المخ
• مناسبة جدا لتحسين المزاج لأنها بتعمل على إنتاج مادة الأندورفين اللي بيعزز خلايا المخ، وبتساعد على الاسترخاء
• بتساعد في الحفاظ على صحة القلب والأوعية الدموية بسبب مضادات الأكسدة وبتحمي من الإصابة بالسكتة الدماغية ومنع الجلطات
• بتحفز مركبات الفلافانول الموجودة فيها بطانة الشرايين لإنتاج أكسيد النيتريك المسؤول عن إرسال إشارات للشرايين للاسترخاء، وبالتالي بتقل مقاومة ضغط الدم
• دراسة قالت إن تناول الكاكاو الغني بالفلافانول لمدة 5 أيام بيحسن تدفق الدم للمخ ويقلل الإصابة بالزهايمر
• كل 70% من كل 100 جرام بيحتوي على معادن الحديد والمغنيسيوم والنحاس والمنجنيز، وده بيساعد على حماية المرأة من الإصابة بفقر الدم بعد انقطاع الطمث، وكمان بتقلل نسبة التشنجات خلال الدورة الشهرية
• بتقلل علامات التقدم في العمر والتجاعيد بسبب مضادات الأكسدة

طريقة عمل بار شوكولاتة في البيت

تقدر تعمل بار شوكولاتة بالأحجام اللي عايزها وتضيف له  أي إضافات صحية ولذيذة زي المكسرات والبذور، وتعتبر آمنة لأطفالك بعيدَا عن المواد الحافظة

الطريقة الأولى

المكونات 

• كوبايتين بودرة كاكاو خام
• تلت أربع كوباية زبدة طرية
• نص كوباية سكر بودرة
• تلت أربع كوباية لبن حليب
• رشة ملح 

الطريقة

• اخلط الكاكاو مع الزبدة لحد ما يبقى عجينة
• حط العجينة في بولة فوق حمام مائي على نار متوسطة
• ضيف السكر واللبن تدريجي مع التقليب المستمر عشان الخليط مايتحرقش
• ضيف رشة الملح
• استمر في التقليب لحد ما تتجانس المكونات وتبقى خليط سايل 
• في قالب التلج السيليكون.. قسم مزيج الشوكولاتة 
• ممكن تضيف مكسرات زي البندق أو عين الجمل أو اللوز أو الفواكه المجففة في القالب قبل ما تحط الشوكولاتة
• دخلها الفريزر لمدة ساعة 

الطريقة التانية

المكونات 

• كوبايتين كاكاو خام
• كوباية كريمة
• معلقة كبيرة زبدة
• نص كوباية سكر بودرة 

الطريقة

• في طاسة.. حط الكريمة وقلبها لحد ما تغلي وتتبخر شوية 
• اخلط الكاكو مع الزبدة والسكر البودرة 
• ضيف خليط الكاكاو على الكريمة وقلب كويس لحد ما يبقى خليط سايل سميك
• وزع الخليط في قالب التلج السيليكون ودخلها الفريزر لمدة ساعة 

وصفات مختلفة بالشوكولاتة

الفادج 

 المكونات

• معلقة كبيرة زبدة
• علبة حليب مكثف
• معلقة صغيرة فانيليا
• 240 جرام شوكولاتة خام
• كوباية شوكولاتة سايلة
• 3 معالق كبيرة زبدة

الطريقة

•  ادهن صينية صغيرة بالزبدة وافرد عليها ورق زبدة
• في بولة.. اخلط اللبن المكثف والفانيليا والشوكولاتة الخام مع السايلة وقطع الزبدة
• حط البولة فوق حمام مياه بتغلي على نار متوسطة
• قلب الخليط لحد ما يسيح ويتجانس مع بعضه
• وزع الخليط في الصينية وحطه ساعتين في التلاجة
• سخن سكينة في مياه سخنة وبعدين نشفها وافصل الأطراف عن ورق الزبدة
• قطع الفادج مكعبات بنفس الحجم ورش عليها كاكاو بودرة

كرات الشوكولاتة

المكونات

• 300 جرام بسكويت سادة
• تلتين كوباية لبن مكثف
• معلقة كبيرة زبدة
• 3 معالق كبيرة كاكاو

الطريقة

• اطحن البسكويت في الكبة
• اخلط الكاكاو مع اللبن المكثف والزبدة
• ضيف البسكويت على خليط الشوكولاتة لحد ما يبقى عجينة
• شكل العجينة لكرات صغيرة وحطها في طبق في التلاجة عشان تتماسك

الموس 

 المكونات

• تلت أربع كوباية كريمة لباني (حلويات)
•  4 صفار بيض
• ربع كوباية لبن
• رشة ملح
• 3 معالق كبار سكر
• 300 جرام شوكولاتة خام
• 2 بياض بيض

الطريقة

•  اضرب نص كمية الكريمة بالمضرب الكهربائي وحطها في التلاجة
• اخلط صفار البيض مع اللبن والملح والسكر
• حط الخليط على حمام مائي وقلب كويس لحد ما الخليط يزيد حجمه ولونه يبقى أصفر فاتح
• ضيف الشوكولاتة لحد ما تسيح وتبقى متجانسة مع باقي المكونات
•  اضرب بياض البيض بالمضرب الكهربائي وضيف معلقة سكر لحد ما يبقى حجمه أزيد ولونه أبيض
• ضيف خليط الشوكولاتة وقلب لحد ما يبقى مزيج متجانس 
•  وزع الخليط في كوبايات صغيرة وحطها في التلاجة ساعتين
• زين الكوبايات بالكريمة 

مربعات الشوكولاتة بالبندق

المكونات

• 500 جرام شوكولاتة خام
• كوباية بندق مجروش
• 500 جرام بسكويت سادة
  
• معلقة كبيرة زبدة
  
• علبة لبن مكثف
  
• معلقتين كبار سكر
  
• علبة قشطة (حلويات)
  

الطريقة

• سيح الشوكولاتة في حمام مائي أو في الميكروويف لمدة دقيقة
•  ضيف معلقة الزبدة والسكر وقلب كويس لحد ما السكر يدوب، وضيف البندق وقلب كويس
• اخلط البسكويت مع اللبن المكثف وقلب لحد ما يبقى عجينة
• افرد ورق زبدة في صينية ووزع عليه عجينة البسكويت
• وزع الخليط ودخل الصينية التلاجة لمدة 3 ساعات
• قطع الشكولاتة مربعات بالحجم المفضل