المحتويات
التوابل المستخدمة يوميا ليها فوائد صحية مختلفة، فهي مفيدة لصحة القلب والكوليسترول وغنية بمضادات الأكسدة اللي بتحمي الجسم من الأمراض الخطيرة.
الكركم
- فيه مادة الكركمين اللي الدراسات أثبتت إنها بتقلل التهاب المخ، وهو سبب أساسي للإصابة بالزهايمر والاكتئاب
- بيساعد على تقليل الألم والتورم عند الأشخاص المصابة بالتهاب المفاصل
- مهم تاخده مع الفلفل الأسود لأنه بيزود امتصاصه في الجسم بدرجة عالية والجسم لا يمتص إلا كمية بسيطة منه في حالة تناوله لوحده
- أو ممكن تعتمد على المكملات الغذائية المعتمدة على مستخلص الكركم
القرفة من أهم التوابل المفيدة
- مناسب للأشخاص المصابة بداء السكري لأنها بتساعد على خفض مستوى السكر في الدم، وممكن تستبدل السكر بيها في المشروبات المختلفة
- مفيدة لصحة القلب لأنها بتقلل الكوليسترول الضار والدهون الثلاثية، وبالتالي تقليل فرصة الإصابة بامراض القلب
- سهل تستخدمها على المشروبات المختلفة زي القهوة أو على الشوفان والمخبوزات وتتبيلة اللحمة
التوم
- الدراسات أثبتت إن الانتظام على أكله بيحمي القلب من أمراض خطيرة وبيقلل خطر الإصابة بانسداد الشرايين
- ارتفاع ضغط الدم والكوليسترول والتدخين من العوامل اللي بتاثر على شرايين القلب وبتسبب تضييقها، لكن الدراسات ربطت بين تناوله وبين توسعها مع الوقت وتجنب تراكم البلاك فيها
- بيساعد على تقليل الكوليسترول الضار والدهون الثلاثية في الجسم
- ممكن تستخدمه ني أو باودر على الأطعمة المختلفة زي الشوربات والسلطات وتتبيلة اللحوم والفراخ
الفلفل الأحمر (Cayenne)
- نوع من أنواع الفلفل الحراق وغني بمادة الكابسيسين اللي الخبراء بيعتبروه مسكن للألم
- الكابسيسين بيقلل إشارات الألم المرسلة للمخ وبالتالي تقليل مشاعرك بعدم الارتياح
- الدراسات أثبتت إنها مادة مفيدة لإتقاص الوزن وتنشيط الدورة الدموية
الحبهان من أفيد التوابل
- بيقلل مشاكل المعدة وأعراضها زي الشعور بعدم الارتياح
- الدراسات أثبتت إنه بيقلل مؤشرات الالتهاب في الجسم
- غني بعناصر مهمة زي الزنك والمغنيسيوم
الزنجبيل
- الدراسات أثبتت إن الزنجبيل بيساعد على تقليل مشاكل المعدة والأعراض المصاحبة ليها
- بيقلل الغثيان والقيء
- غني بمضادات الأكسدة والالتهاب اللي بتحمي الجسم من الأمراض المختلفة زي أمراض القلب والتقدم في العمر
الروزماري
- غني بأنواع مضادات أكسدة اللي بتحمي خلايا الجسم من التلف خاصة مع التقدم في العمر
- دراسة أثبتت إن الأشخاص اللي بيستخدموه بانتظام في أكلهم عندهم مهارات عقلية (الذاكرة والقدرة على التركيز لفترات طويلة) أعلى من غيرهم
الكمون من أفيد التوابل للجسم
- غني بمضادات الأكسدة اللي بتحمي الجسم من الأمراض والعدوى ونزلات البرد
- فيه كمية من الفيتامينات المهمة زي فيتامين أ و فيتامين ج والحديد
- بيعزز صحة الجهاز الهضمي ويقي من الإصابة بالإسهال وعسر الهضم وتهيج القولون العصبي
- ليه دور في خفض الكوليسترول العالي في الدم وضبط مستوى الدهون الثلاثية
